Mokwongo ne Jo-Korintho
9 Donge an thuolo, koso? Donge an jaote? Donge aseneno Yesu Ruodhwa?+ Donge un e tich ma asetiyo kuom Ruoth, koso? 2 To kata ka jomoko ok kwana ka jaote, adier an jaote kuomu! Nikech un e alama ma nyiso gadier ni an jaote kuom Ruoth.
3 Dwoko ma achiwo ne jo ma nona en ma: 4 Donge wan gi ratiro mar chiemo kendo metho, koso? 5 Donge ng’ato ka ng’ato kuomwa nigi ratiro mar wuotho gi chiege manie yie,*+ mana kaka joote mamoko, gi owete Ruoth,+ kod Kefa,*+ koso? 6 Koso en mana Barnaba+ kod an kende e ma waonge ratiro mar weyo timo tije ma wakonyorego e ngima? 7 En askach lweny manade ma tiyo to ochulore owuon? En ng’at manade ma pidho puoth mzabibu to ok ocham olembe?+ Kata, en ng’a ma rito kueth to ok omadh moko kuom chak ma kuethno golo?
8 Be awacho wechegi kaluwore gi pach dhano? Donge Chik bende wacho wechego? 9 Nimar ondik e Chik Musa kama: “Kik itue dho ruath sa ma oywayo lodi ma idiemogo cham.”+ Be Nyasaye dewo mana ruedhi? 10 Koso owacho kamano nikech wan? Adier wachno ne ondik nikech wan, nimar ng’at ma puro gi kwe dhiang’ kod ng’at ma dino cham, gitimo kamano ka gigeno yudo moko.
11 Ka wasepidho weche mag chuny e kindu, be en gima lich ahinya ka wakayo gik ma dwakonyrego koa kuomu?+ 12 Ka jomamoko nigi ratiro ma chal kamano kuomu, wan donge wan gi ratirono moloyo, koso? Kata kamano, pok watiyo gi ratirono,+ to wanano e gik moko duto mondo kik wageng’ ne wach maber e wi Kristo e yo moro amora.+ 13 Donge ung’eyo ni jo ma tiyo ne Nyasaye e hekalu chamo gik man kuno, kendo ni jo ma pile tiyo e kendo mar misango yudo pok moro koa e kendono, koso?+ 14 Kamano bende, Ruoth nochiko ni mondo jo ma lando wach maber oyud gik ma gikonyorego e ngimagi kokalo kuom wach maber.+
15 To pok akonyora gi yorego kata dichiel.+ Kuom adier, ok andik wechegi ni mondo utimna kamano. Dine obedo maberna moloyo ka atho. Onge ng’at ma biro maya gik ma miyo apakora!+ 16 Omiyo, koro ka ayalo wach maber, mano ok onego omi apakra, nimar ochuno ni nyaka ayale. Adier, nobedna malit ka ok ayalo wach maberno!+ 17 Ka atimo kamano gi chuny moikore, abiro yudo pok; to kata ka atimo to chunya ok dwar, pod an gi tich mosemiya mar bedo jarit.+ 18 Kare pokna en mane? Ni sa ma ayalo wach maber, to mondo ayale ma ok akaw chudo, mondo kik ati marach gi ratiro ma an-go kuom wach maberno.
19 Nimar, kata obedo ni an thuolo kuom ji duto, asebedo misumba ji duto mondo aywa ji mang’eny kaka nyalore. 20 Kuom Jo-Yahudi ne abedo Ja-Yahudi mondo aywa Jo-Yahudi;+ kuom jo ma ni e bwo chik ne abedo ng’at manie bwo chik, kata obedo ni an awuon to ok an e bwo chik, mondo aywa jo ma ni e bwo chik.+ 21 Kuom jo ma onge chik ne abedo ka ng’at ma onge chik, mondo aywa jo ma onge chik, kata obedo ni an gi chik kuom Nyasaye kendo an e bwo chik kuom Kristo.+ 22 Kuom jo ma nyap ne abedo ma nyap, mondo aywa jo ma nyap.+ Asebedo gimoro amora ne ji mopogore opogore mondo ka nyalore to aresie jomoko kuomgi. 23 Atimo gik moko duto nikech wach maber mondo ayale ne jomoko.+
24 Donge ung’eyo ni jong’wech duto piem, to mana ng’ato achiel kende e ma yudo mich? Ringuru e yo ma biro miyo uyud michno.+ 25 Koro ng’ato ka ng’ato manie piem nyiso kido mar ritruok e gik moko duto. En adier ni gitimo kamano mondo giyud osimbo ma nyalo kethore,+ wan to watimo mano mondo wayud osimbo ma ok nyal kethore.+ 26 Kuom mano, ok aring ka ng’at ma riwo gi kiawa;+ ok ago ngum ni mondo ago yamo; 27 to asiko ka agoyo ringra+ kendo chike kaka misumba, mondo bang’ ka aseyalo ne jomamoko, kik yud ni ok awinjora e yo moro amora.