Tich Joote

18 Bang’ mano, Paulo nowuok Athens modhi Korintho. 2 Kanyo noyudoe Ja-Yahudi moro ma nyinge Akula,+ ma en jal ma ne onyuol Ponto, to ne oyudo eka oa biro koa Italia ka en gi Priskila chiege, nimar Klaudio nosegolo chik ni mondo Jo-Yahudi duto owuog Rumi. Omiyo, Paulo nolimogi, 3 to nikech tijgi ne chalre, nodak e dalagi kendo notiyo kodgi+ nimar ne gin jotwang’ hema. 4 E sabato ka sabato,+ ne ojapuonjo e sunagogi+ e yo mong’ith koloko pach Jo-Yahudi gi Jo-Grik mondo girwak yie.

5 Koro ka Sila+ gi Timotheo+ noselor ka gia Makedonia, Paulo nochako bedo modich ahinya gi yalo wach Nyasaye, kochiwo neno ne Jo-Yahudi kendo kosiro gadier ni Yesu e Kristo.+ 6 To ka ne gisiko gikwede kendo wuoyone ka ginyise achaya, noteng’o lepe+ mowachonegi kama: “Rembu mondo obed e wiu uwegi.+ An to aler.+ Chakre sani, abiro dhi ir jo ogendni mamoko.”+ 7 Omiyo, ne oa kanyo* modhi e od ng’at moro ma nyinge Tito Justo, ma ne en ng’at moluoro Nyasaye, ma ode ne omakore gi sunagogi. 8 To Krispo+ ma ne en jatelo ma tayo e sunagogi ne oyie kuom Ruoth kaachiel gi joode duto. Eka thoth Jo-Korintho ma nowinjo wach nochako rwako yie mi ne obatisgi. 9 E wi mano, gotieno Ruoth nowacho ne Paulo e fweny niya: “Kik iluor, to dhi mana nyime gi yalo kendo kik iling’, 10 nimar an kodi+ kendo onge ng’at ma biro monji mondo ohinyi; nikech an gi ji mang’eny e dalani.” 11 Omiyo, nobedo kanyo kuom higa gi dweche auchiel kopuonjo wach Nyasaye e diergi.

12 E kinde ma Galio ne en jatelo mar Akaya, Jo-Yahudi noriwore e monjo Paulo kendo ne gitere e kom-bura 13 ka giwacho niya: “Ng’atni semo ji mondo gilam Nyasaye e yo mopogore gi chik.” 14 To sa ma Paulo ne chiegni chako wuoyo, Galio nowacho ne Jo-Yahudi kama: “Yaye, un Jo-Yahudi, ka da bed ni adier ng’atni otimo gimoro ma ok kare, kata oketho gi ketho moro maduong’, dikoro asehora mos mondo awinju. 15 To ka en nikech uywaru e wi weche, kod nying ji, kendo e wi chiku uwegi,+ un uwegi e ma nyaka ung’ad wachno. Ok daher bet jang’ad bura e wi wechego.” 16 Eka noriembogi gia e nyim kom-bura. 17 Omiyo, ne gimako Sosthene+ ma ne en jatelo ma tayo e sunagogi mi gichako goye e nyim kom-bura. To Galio ne ok odonjre gi gik ma ne gitimogo kata matin.

18 Kata kamano, bang’ bedo kuno kuom ndalo moko, Paulo nogoyo oriti ne owete mi noidho yie kochomo Siria, ka en gi Priskila kod Akula. Noselielo wiye ka en Kenkrea,+ nikech noyudo osetimo singruok. 19 Eka ne gichopo Efeso mi noweyogi kuno; to en nodonjo e sunagogi kendo nochako twak gi Jo-Yahudi.+ 20 Kata obedo ni ne gikwaye ni odong’ kodgi kuom kinde momedore, ne ok oyie. 21 Kar mano, ne ogoyonegi oriti kowachonegi niya: “Abiro duogo iru kendo ka Jehova* oyie.” Mi noidho yie koa Efeso 22 molor nyaka Kaisaria. Eka nodhi* mi omoso kanyakla, kae to ne olor nyaka Antiokia.+

23 Ka nosetieko ndalo moko kanyo, nowuok modhi kuonde mopogore opogore e piny Galatia kod Frugia,+ kotego jopuonjre duto.+

24 Koro Ja-Yahudi moro ma nyinge Apolo+ ma ne onyuol Aleksandria nochopo Efeso; ne en ng’at mong’eyo twak e yo mong’ith kendo ne olony ahinya gi weche manie Ndiko. 25 Ng’atni ne osepuonj yor Jehova,* kendo nikech ne en gi ilo kokalo kuom roho mar Nyasaye, ne oyalo kendo ne opuonjo weche motudore gi Yesu e yo makare, en mana ni ne olony gi batiso mar Johana kende. 26 Nochako yalo gi chir e sunagogi, to ka Priskila gi Akula+ ne owinje, ne gikawe mi gilerone yor Nyasaye e yo malong’o moloyo. 27 Bende, nikech nodwaro dhi nyaka loka Akaya, owete nondiko ne jopuonjre ma kuno ka gikwayogi mondo girwake e yo maber. Omiyo, ka nochopo kuno, nokonyo ahinya jo ma noserwako yie kuom ng’wono mogundho mar Nyasaye. 28 Nimar ne onyiso e lela kendo e yo malong’o ka en gi ilo maduong’, ni Jo-Yahudi ne ok ni kare, kotiyo gi Ndiko e nyiso ni Yesu e Kristo.+