Barua Mokwongo ne Jo-Thesalonika
4 Mogik, owetewa, ne wachikou kaka onego uwuoth mondo umor Nyasaye,+ to mano e kaka utimo sani. Koro wasayou kendo wahombou kuom Ruoth Yesu ni umed dhi nyime timo kamano moloyo. 2 Nimar ung’eyo weche ma ne wachikou kokalo kuom Ruoth Yesu.
3 Nikech dwaro mar Nyasaye e ma: ni ubed maler+ kendo uweru gi terruok.*+ 4 Ng’ato ka ng’ato kuomu onego ong’e kaka onyalo chiko ringrene+ e yo maler+ kendo e yor luor, 5 ok ka uoworu gi gombo mag terruok+ kaka ogendni ma ok ong’eyo Nyasaye timo.+ 6 Kik ng’ato kal tong’ mowinjore mi odonjre gi ratiro mag owadgi kuom wachni, nimar Jehova* biro chiwo kum kuom wechego duto, mana kaka ne wasenyisou kendo siemou. 7 Nimar Nyasaye ne oluongowa, ok ne tim ma ok ler, to mondo wabed maler.+ 8 Kuom mano, ng’at ma ochayo puonjni, ok ochayo dhano to ochayo mana Nyasaye+ ma miyou rohone maler.+
9 To kuom wach hera mar owete,+ ok ochuno ni mondo wandiknu nimar un uwegi Nyasaye puonjou ni uherru.+ 10 To adier, utimo kamano ne owete duto e Makedonia mangima. Kata kamano, owetena, wasayou ni udhi nyime timo kamano moloyo. 11 Dwarou maduong’ mondo obed dak mokue mos+ ka uketo pachu mana kuom wecheu uwegi+ kendo ka utiyo gi lwetu+ mana kaka ne wachikou; 12 mondo uwuoth e ngima mobidhore e wang’ jo ma oko,+ ma ok uchando gimoro.
13 E wi mano, owetena, wadwaro ni ung’e wach jo ma nindo e tho,+ mondo kik ubed gi kuyo kaka jomamoko ma onge geno.+ 14 Nimar ka wan gi yie ni Yesu ne otho mi nochiere kendo,+ kamano bende jo mosenindo e tho kuom Yesu, Nyasaye biro chierogi mondo gibed gi Yesu.+ 15 Nikech ma e gima wanyisou kokalo kuom wach Jehova,* ni wan ma pod wabiro bedo ka wangima e kinde ma biro yudo ka Ruoth nitie, ok wabi kwongo ngang’ ne jo mosenindo e tho; 16 nimar Ruoth owuon biro lor koa e polo ka ogolo chik gi dwol maduong’, kod dwol mar malaika maduong’,+ kendo gi ywak mar turmbeta mar Nyasaye, eka jo ma ne otho ka gin e winjruok achiel gi Kristo biro chier mokwongo.+ 17 Bang’e, wan ma noyudwa ka pod wangima, ibiro terwa malo e boche polo kanyachiel kodgi+ mondo warom gi Ruodhwa+ e kor yamo; eka wanabed gi Ruoth kinde duto.+ 18 Omiyo, dhiuru nyime ka uhoyoru gi wechegi.