Ne Jo-Hibrania
2 Mano e momiyo, moloyo kaka pile, dwarore ni waket pachwa kuom gik ma wasewinjo+ mondo kik waba yo.+ 2 Nimar ka wach ma ne owach kokalo kuom malaike+ nobedo adier, kendo ka ketho kod timbe duto mag chayo chik ne miyo ikumo ng’ato kaluwore gi bura makare,+ 3 ere kaka wabiro tony ka po ni wasejwang’o warruok maduong’ kamano?+ Nimar Ruodhwa e ma ne okwongo yale,+ kendo bang’e, jo ma ne owinje nokonyowa ng’eyo ni wachno en adier, 4 Nyasaye bende ne chiwo neno kotiyo gi ranyisi madongo gi gik miwuoro kod tije madongo mopogore opogore,+ kendo nopogo mich mag roho maler kaluwore gi dwache.+
5 Nimar piny ma biro, ma e piny ma wayalo wachne,+ ok oketo e bwo teko malaike. 6 To nitie janeno moro mosechiwo neno kamoro niya: “Dhano en ang’o ma dipare, kata wuod dhano en ang’o ma dirite?+ 7 Ne ikete obedo matin ne malaike; ne isidhone osimbo mar duong’ gi luor, mi ne ikete e wi gik ma ne ichueyo gi lweti. 8 Ne iketo gik moko duto e bwo tiende.”+ Kuom keto gik moko duto obed e bwo tekone,+ onge gimoro amora ma Nyasaye noweyo ma ok oketo e bwo tekone.+ To sani pod ok wane ka gik moko duto ni e bwo tekone.+ 9 Kata kamano, Yesu ma ne oket obedo matin moloyo malaike,+ sani osesidhne osimbo mar duong’ gi luor nikech ne oyudo lit mar tho+ mondo kokalo kuom ng’wono mogundho mar Nyasaye, obil tho ne ji duto.+
10 Jal ma gik moko duto ne obetie ne en kendo kokalo kuome, noneno ni kodwaro ni nyithinde mang’eny oyud duong’,+ to ber mondo omi Jatelo Maduong’ moseketo ma kelonegi warruok+ okadh e sand eka obed malong’o chuth.+ 11 Nimar jal ma pwodho ji mondo gibed jo maler kod jo mipwodho bende,+ gia kuom wuoro achiel,+ kendo nikech mano, wi jalo ok kuod koluongogi ni owetene,+ 12 nimar owacho niya: “Analand nyingi ne owetena; anapaki gi wer e chokruok.”+ 13 Bende, owacho kama: “Anaket genona kuome.”+ Kendo niya: “Neuru! an kaachiel gi nyithindo matindo ma Jehova* osemiya.”+
14 Kuom mano, nikech ‘nyithindo matindogo’ nigi del mar remo kod ringruok, en bende nobedo gi remo kod ringruok,+ mondo kokalo kuom thone otiek chuth jal ma nigi nyalo mar kelo tho,+ tiende ni Jachien;+ 15 kendo mondo ogony ji te ma osebedo e bwo tuech kuom ngimagi duto nikech luoro tho.+ 16 Nimar kuom adier ok okony malaike, to okonyo mana koth Ibrahim.+ 17 Nikech mano, jalno ne nyaka bed ma chal gi “owetene” e yore duto,+ mondo eka obed jadolo maduong’ ma kecho ji kendo migeno e weche motudore gi Nyasaye, mondo ochiw misango mar loso winjruok+ nikech richo mag ji.+ 18 Nimar en owuon nosandore ka ne iteme,+ omiyo, onyalo konyo jo ma itemo.+