Ngeche

11 Jehova osin gi ratil mag miriambo,

To omor gi rapim makare.+

 2 Ka sunga obiro, wich-kuot biro luwo,+

To rieko ni kod jo ma obolore.*+

 3 Tim makare mag jo matir e ma tayogi,+

To miriambo mag jo andhoga e ma notiekgi.+

 4 Mwandu ok bi konyo chieng’ masira,+

To tim makare e ma biro reso ng’ato e tho.+

 5 Tim makare mar ng’at ma onge ketho e ma loso yorene,

To ng’at marach nopodh nikech richone.+

 6 Tim makare mag jo matir e ma noresgi,+

To jo andhoga biro moko e gombogi.+

 7 Ka ng’at marach otho genone lal nono;

Kendo gik ma ne ogeno kuom tekone bende lal nono.+

 8 Ng’at makare ireso e chandruok,

Kendo ng’at marach kawo kare.+

 9 Ng’at ma ong’anyo* ne Nyasaye hinyo nyawadgi gi dhoge,

To ng’eyo e ma reso jo makare.+

10 Ber mar jo makare kelo ne dala mor,

To ka jaricho otho, dala bedo mamor.+

11 Gueth mag jo makare miyo iting’o dala malo,+

To dho joricho goye piny.+

12 Ng’at ma onge rieko ochayo nyawadgi,

To ng’at ma pogo weche kare ling’ thi.+

13 Jaketh nying ji elo weche ma ling’ ling’,+

To ng’at migeno kano wach ma ling’ ling’.

14 Ka onge ng’at ma tayo ji gi rieko, oganda podho,

To weche dhi maber ka nitie jong’ad rieko mang’eny.+

15 Ng’at ma singore ni obiro chulo ne ng’at ma okiya gowi nyaka hinyre,+

To ng’at ma dagi riwo singruogno lwedo,* nobed gi kuwe.

16 Dhako ma chunye ng’won yudo duong’,+

To chwo makwiny yako mana mwandu.

17 Ng’at makecho ji yudo ohala,+

To ng’at makwiny kelo chandruok ne en owuon.+

18 Jaricho yudo osara mar miriambo,+

To ng’at ma chuoyo timbe makare yudo pok madier.+

19 Ng’at ma chung’ motegno ne tim makare nie yor ngima,+

To ng’at ma lawo richo nie yor tho.

20 Jehova osin gi jo ma chunygi obam,+

To chunye mor gi jo ma yoregi onge ketho.+

21 Ng’e wachni maler: Ok nowe ng’at marach ma ok okume,+

To nyithind ng’at makare biro tony.

22 Dhako ma jaber ma tamore rieko

Chalo gi tere mar dhahabu e um anguro.

23 Gombo mag jo makare kelo ber,+

To geno mar jo maricho kelo mana mirima.

24 Ng’at achiel chiwo kendo oyudo gik mang’eny;+

Ng’at machielo tuono ji gima owinjore giyudi, to pod dhier yude.+

25 Ng’at ma jachiwo nomew,+

Kendo ng’at ma duogo chuny ji en bende noduog chunye.+

26 Ji biro kuong’o ng’at ma pando cham,

To gibiro guedho ng’at ma uso cham.

27 Ng’at ma timo gima ber gi kinda yudo ng’wono,+

To ng’at ma manyo gima rach, mano e ma nobi kuome.+

28 Ng’at mogeno mwandune biro podho,+

To ng’at makare biro loth mana ka yath.+

29 Ng’at ma kelo chandruok ne ode owuon, yamo nobed pokne,+

Kendo ng’at mofuwo nobed jatij ng’at mariek.

30 Olemo ma ng’at makare nyago chalo gi yadh ngima,+

Kendo ng’at ma reso chuny ji riek.+

31 Ka ng’at makare yudo pokne,

To joricho kod joketho diyud mang’eny marom nade!+