Joshua
8 Jehova nowacho ne Joshua niya: “Kik iluor kendo kibaji kik goyi.+ Kaw jolweny duto mondo udhi umonj Jo-Ai. Aseketo ruodh Ai e lweti, en kaachiel gi joge, gi dalane, kod pinye.+ 2 Timuru ne Ai kaachiel gi ruodhe mana kaka ne utimo ne Jeriko kaachiel gi ruodhe.+ Kata kamano, unyalo peyo mwandugi kaachiel gi jambgi. To ket jolweny moko mondo obut e tok dalano.”
3 Omiyo, Joshua gi jolweny duto nodhi mondo gimonj Ai. Joshua noyiero jolweny 30,000 ma roteke mi nogologi gotieno mondo gidhi. 4 Kae to nochikogi kama: “Buturu e tok dalano, to kik udhi mabor ahinya, kendo ne ni uduto uikoru. 5 An kaachiel gi jolweny mamoko duto wabiro chomo dalano tir, to ka giwuok mondo giked kodwa mana kaka ne gitimo motelo,+ wabiro ringo. 6 Ka gichako lawowa, wabiro ringo mondo waywagi gidhi mabor gi dala, nimar gibiro wacho ni, ‘Jogi ringowa mana kaka ne giringo motelo.’+ Wan to wabiro ringo aringa. 7 Eka unuwuogi ka ma ubutoe mi ukaw dalano, kendo Jehova Nyasachu biro miyougo. 8 Ka usekawo dalano, wang’euru.+ Ne ni utimo kaka Jehova osewacho. Kamano e kaka achikou.”
9 Joshua nogologi mi giwuotho nyaka ka ma ne gidhi butoe. Ne gibuto e kind Bethel gi Ai ka ma ni yo podho chieng’ mar Ai. Joshua to nodong’ chien gi jolweny mamoko otienono.
10 Ka Joshua nochiewo gokinyi, nochoko jolweny, kendo en kaachiel gi jodong Israel, ne gitelo ne jolweny ka gidhi Ai. 11 En kaachiel gi jolweny duto+ ma ne ni kode ne gidhi ma gigoyo kambi gi ka nyim Ai. Ne gigoyo kambi gi yo nyandwat mar Ai, ka pap opogo kindgi gi Ai. 12 To gie sechego, noyudo oseketo jolweny 5,000 mondo obut+ e kind Bethel+ gi Ai, yo podho chieng’ mar dalano. 13 Omiyo, jolweny moko nogoyo kambi yo nyandwat mar dalano,+ to jolweny moko ne obuto yo podho chieng’ mar dalano.+ Joshua to ne odonjo e pap gotieno.
14 Ka ne ruodh Ai oneno kamano, nomondo wuok gi jolweny mage mapiyo piyo gokinyi mondo gidhi giked gi Jo-Israel kamoro ma nomanyore gi thim. Kata kamano, ne ok ong’eyo ni jolweny moko obutonegi gi ka tok dalagi. 15 Ka ne jolweny mag Ai omonjogi, Joshua kaachiel gi Jo-Israel duto ma ne ni kode noringo e ndara ka gichomo thim.+ 16 Kae to ne owach ne ji duto ma ne nie dalano mondo olawgi. To kaka ne gimedo lawo Joshua, e kaka ne gimedo sudo mabor gi dala. 17 Onge jalweny kata achiel ma ne odong’ Ai gi Bethel ma ok nowuok mondo olaw Jo-Israel. Dho rangach to ne giweyo koyawore malach.
18 Jehova koro nowacho ne Joshua niya: “Rie tong’ manie lweti kochomo Ai,+ nimar abiro keto Ai e lweti.”+ Omiyo, Joshua norieyo tong’ ma ne nie lwete kochomo dalano. 19 To ka norieyo arieya bade ni i, jolweny ma ne obutoka ne owuok dichiel moringo odonjo e dalano ma gikawe, kendo ne gichwinyoe mach.+
20 Ka ne Jo-Ai ogoyo machiemo, ne gineno ka yiro dum e dalagi kochomo polo, to mano nomiyo tekogi orumo ma ringo otamogi. Kendo jolwenj Israel ma ne ringo kochomo thim nolokore mochako kedo kodgi. 21 Ka ne Joshua gi Jo-Israel ma ne ni kode oneno ka jolweny ma ne obutoka osemonjo dalano mi okawe kendo yiro koro dum kochomo polo, ne giwichore ma gichako nego Jo-Ai. 22 Jolweny ma ne nie dala nobiro moriwore kodgi ma gidino ne jolwenj Ai e diere, ka Jo-Israel moko ni koni to moko ni kocha. Ne ginegogi giduto ma onge kata ng’ato achiel ma ne otony.+ 23 Ruodh Ai+ to ne gimako ma gitere ne Joshua ka ongima.
24 Ka ne Jo-Israel osenego jolweny duto mag Ai ma ne lawogi e thim ma gitiekogi pep gi ligangla, ne gidok Ai giduto ma ginego jo ma ne ni kuno gi ligangla bende. 25 Jo-Ai duto ma ne oneg ne gin ji 12,000. Onge dichwo kata dhako ma ne owe ka ngima. 26 Joshua ne osiko korieyo tong’ ma ne nie bade+ nyaka ne gitieko nego ji duto ma ne ni Ai.+ 27 Kata kamano, Jo-Israel nokawo jamni kod gik ma ne gipeyo e dalano mana kaka Jehova nosechiko Joshua ni gitim.+
28 Eka Joshua nowang’o dala mar Ai mi odong’ pith mochwere,+ kendo dalano en gunda nyaka kawuononi. 29 Ne oliero ruodh Ai e yath moweye kanyo nyaka godhiambo, to ka ne chieng’ chiegni podho, Joshua nochiko ni ogole e yadhno.+ Ne gibolo ringrene e dho ranga dalano kae to ne gibiwo kite kuome mobedo pith maduong’ ma pod ni kuno nyaka kawuononi.
30 Kindeno e ma Joshua nogeroe ne Jehova Nyasach Israel kendo mar misango e Got Ebal.+ 31 Ne gigere ka giluwo chik ma Musa jatich Jehova nomiyo Jo-Israel. Bug Chik+ Musa ne wacho ni: “Geruru kendo mar misango gi kite ma ok opa.”+ Kendo ne gitimo ne Jehova misengni miwang’o kaachiel gi misengni mag kuwe e kendono.+
32 Eka nokawo chike+ ma Musa nosendiko e wang’ Jo-Israel mondiko e kitego.+ 33 Jo-Israel duto moriwo jodonggi, jotelo, gi jong’ad bura ne ochung’ koni gi koni e bath Sandug Singruok mar Jehova ma ne jodolo ma Jo-Lawi oting’o. Jodak kaachiel gi Jo-Israel ne ni kuno.+ Nus mar oganda ne ochung’ e nyim Got Gerizim to nus machielo nochung’ e nyim Got Ebal+ (mana kaka Musa jatich Jehova nosechikogi)+ mondo giguedh oganda Israel. 34 Bang’ mano, ne osomo gi dwol maduong’ weche duto ma ne ondik e bug Chikno,+ moriwo gueth+ kod kuong’.+ Ne osomogi mana kaka ne ondikgi e bug Chik. 35 Onge wach kata achiel ma Musa nochiko ma Joshua ne ok osomo gi dwol maduong’ e nyim oganda Jo-Israel+ moriwo mine, nyithindo, gi jodak+ ma ne odak e kindgi.+