Tich Joote
14 Koro e Ikonio ne gidonjo e sunagogi mar Jo-Yahudi gi Jo-Grik, kendo ne giyalo e yo maber ahinya mi mano nomiyo oganda mang’ongo moriwo Jo-Yahudi gi Jo-Grik orwako yie. 2 To Jo-Yahudi ma ne ok oyie ne othuwo wach, kendo ne gimiyo chuny jo ma oa e ogendni mamoko osin gi owete.+ 3 Omiyo, Jehova* ne omiyogi teko mi giyalo gi chir kuom kinde mogwaro e wi wach ng’wono mogundho mar Nyasaye kendo ne gitimo honni kod tije madongo.+ 4 Kata kamano, oganda mang’ongo manie dalano ne opogore; moko kuomgi ne riwo Jo-Yahudi lwedo to moko ne odok ne joote. 5 Ka ne jo ma oa e ogendni gi Jo-Yahudi kod jotendgi notemo monjogi mondo gitimnegi timbe achaya kendo chielogi gi kite,+ 6 ne onyisgi wachno mi ne giringo gidhi e mier mag Lukaonia, gi Lustra, gi Derbe, kod gwenge mag alworago.+ 7 Ne gimedo lando wach maber kuondego.
8 Koro e Lustra, ne nitie ng’at moro ma nobet piny ma tiendene ne ong’ol. Nosebedo puth nyaka a e nyuolne kendo ne pok owuotho ngang’. 9 Ng’atno ne winjo Paulo ka wuoyo. Ka Paulo ne ong’iye tir moneno ni ne en gi yie ni nonyalo chango,+ 10 Paulo nokok gi dwol maduong’ niya: “A malo ichung’ gi tiendeni.” Mi ng’atno ne ochikore malo mochako wuotho.+ 11 Ka oganda noneno gima Paulo notimono, ne gikok e dho Lukaonia kama: “Ero nyiseche oselokore mobedo kaka dhano kendo giselor irwa!”+ 12 Mi ne gichako luongo Barnaba ni Zeu, to Paulo ni Herme, nimar en e ma ne owuoyo ahinya. 13 To jadolo mar Zeu ma hekalune ne ni e dho ranga dala mar Lustra nokelo ruedhi kod osimbo mag maua e dho rangeye mondo ochiw misengni kanyachiel gi oganda.
14 Kata kamano, ka jaote Barnaba gi jaote Paulo nowinjo mano, ne giyiecho lepgi kendo ne gidonjo mapiyo ei ogandano ka gikok niya: 15 “Yaye, ang’o momiyo utimo gigi? Wan bende wan mana dhano ma nigi nyawo kaka un.+ To sani walandonu wach maber mondo ua kuom gik manonogi, kendo ulokru mondo uyie kuom Nyasaye ma nochueyo polo, gi piny, gi nam, kod gik moko duto manie igi.+ 16 Kuom tienge mosekalo, noweyo ogendni duto mondo giluw yoregi giwegi,+ 17 kendo kata obedo ni ne ok oweyo ma ok omiyou gik ma chiwo neno kuome,+ notimo maber kuom miyou koth koa e polo kod kinde mag nyak mogundho,+ ka oyieng’ou gi chiemo kendo ka opong’o chunyu gi mor.”+ 18 To e ma pod kata bang’ wacho wechegi, ne ok ginyal geng’o oganda mondo kik chiwnegi misango.
19 To Jo-Yahudi nochopo ka gia Antiokia kod Ikonio mi ne gisemo oganda,+ kae to ogandano ne ochielo Paulo gi kite kendo ne giywaye mi gitere oko mar Lustra, ka giparo ni nosetho.+ 20 Kata kamano, ka jopuonjre ne ochung’ kolwore, ne oa malo mi nodonjo e dalano. Kinyne nowuok gi Barnaba mondo gidhi Derbe.+ 21 Bang’ yalo wach maber e dalano kendo loko ji mogwaro obedo jopuonjre, ne gidok Lustra, gi Ikonio, kod Antiokia. 22 Ka gin kuonde ma ne gidhiyego, ne gitego chuny jopuonjre+ kendo ne gijiwogi mondo gisik e yie ka giwachonegi niya: “Nyaka wadonj e Pinyruodh Nyasaye ka wakalo e sand mang’eny.”+ 23 E wi mano, ne giketonegi jodongo e kanyakla ka kanyakla,+ kendo bang’ lamo kod tueyo chiemo,+ ne gichiwogi e lwet Jehova* ma ne giseyie kuome.
24 Eka ne gikalo ei Pisidia mi gichopo Pamfulia,+ 25 kendo bang’ yalo wach Nyasaye e Perga, ne gilor mi gidhi Atalia. 26 Ne gia kanyo mi giidho yie mondo gidhi Antiokia kama ne osenyisgie ng’wono mogundho mar Nyasaye mondo gitim migawo ma koro ne gisetiekono.+
27 Ka ne gichopo ne gichoko kanyakla mi ginyisogi gik mang’eny ma Nyasaye nokonyogi timo kod kaka Nyasaye noseyawo dhoot ne ogendni mamoko mondo orwak yie.+ 28 Omiyo, ne gibet kuno kuom kinde mogwaro gi jopuonjre.