Samuel Mokwongo

13 Saulo ne obedo ruoth ka en jahigni . . . .*+ Ne olocho e Israel kuom higni ariyo, 2 eka ne oyiero jolweny 3,000 e Israel; 2,000 kuomgi ne nigi Saulo Mikmash manie piny gode man Bethel, to 1,000 ne nigi Jonathan+ e piny Gibea+ mar Jo-Benjamin. Jo modong’ to ne oweyo mondo odog e hembegi. 3 Jonathan ne onego jolweny mag Jo-Filistia ma ne ni Geba+ mi Jo-Filistia+ nowinjo wachno. Kae to Saulo ne ochiko mondo ogo tung’+ e piny Israel duto kowacho niya: “We Jo-Hibrania owinji!” 4 Jo-Israel duto ne owinjo ni Saulo onego jolweny moko mag Jo-Filistia kendo ni Jo-Filistia ne koro ojok ahinya gi Jo-Israel. Omiyo, ne oluong jolweny mag Israel mondo oluw Saulo e dala mar Gilgal.+

5 Jo-Filistia bende ne ochokore mondo gidhi giked gi Jo-Israel. Ne gin gi geche lweny 30,000, kod joidh farese 6,000, kaachiel gi jolweny mang’eny ka kuoyo manie dho nam;+ ne gidhi ma gigoyo kambi Mikmash yo wuok chieng’ mar Bethaven.+ 6 Jolweny mag Israel ne oneno ni gidiwo nimar Jo-Filistia ne othung’ogi ahinya; omiyo ne gidhi pondo e rogni,+ e buche, e lwendni, kod sokni. 7 To moko kuom Jo-Hibraniago ne ong’ado Aora Jordan mi gidhi e piny Gad kod Gilead.+ Saulo to ne odong’ Gilgal kendo jolweny ma noluwe ne tetni gi luoro. 8 Saulo ne odhi nyime rito kuom ndalo abiriyo nyaka kinde ma Samuel ne owacho ni odhi biroe. Kata kamano, Samuel ne ok obiro Gilgal kendo jolweny ne ochako kere ka giweyo Saulo. 9 Gikone, Saulo ne owacho niya: “Kelnauru misango miwang’o kod misango mar kuwe.” Mi ne ochiwo misango miwang’o.+

10 To ka ne otieko atieka chiwo misango miwang’o ni i, Samuel ne ochopo. Omiyo, Saulo ne odhi romone mondo omose. 11 Samuel nopenje niya: “Ma to ang’o misetimoni?” Saulo ne odwoke kama: “Jolweny ne ochako weya+ to in bende ne ok ibiro e kinde ma ne iwacho. To Jo-Filistia bende ne chokore Mikmash.+ 12 Omiyo, ne awacho e chunya niya: ‘Jo-Filistia biro biro Gilgal mondo gimonja ka pok akwayo Jehova mondo okonya.’ Omiyo, ne ochuna golo misango miwang’o.”

13 Samuel ne owacho ni Saulo niya: “Isetimo tim fuwo. Ok iluwo chik ma Jehova Nyasachi ne omiyi.+ Ka dine iluwo chikno, Jehova dine oguro pinyruodhi e piny Israel mondo osik nyaka chieng’. 14 Koro pinyruodhi ok bi siko.+ Jehova biro manyo ng’at machielo ma chunye ohero+ kendo Jehova biro kete mondo obed ruoth e wi joge,+ nimar ok iluwo chik ma Jehova ne omiyi.”+

15 Samuel nowuok Gilgal modhi Gibea e piny Benjamin. Saulo ne okwano jolweny ma ne odong’ kode moyudo ni gin ji madirom 600.+ 16 Saulo kod Jonathan wuode kaachiel gi jolweny ma ne ni kodgi ne odak Geba+ e piny Benjamin. Jo-Filistia to ne ogoyo kambi Mikmash.+ 17 Jolwenjgi moko ne wuokga e kambigi ka gipogore e grube adek. Grup achiel ne luwo ndara mochomo Ofra ka gidhi e piny Shual. 18 Grup mar ariyo ne luwoga ndara mochomo Beth-horon,+ to grup mar adek ne dhiga e thim ka giluwo ndara madhi e kiewo momanyore gi hoho mar Zeboim.

19 E ndalogo, ne onge jatheth moro amora e piny Israel nimar Jo-Filistia ne ok oyie ne Jo-Hibrania ni olos ligangla kata tong’. 20 Omiyo, Jo-Israel ne dhiga Filistia mondo gipiag kwe dhok, saruru, le, kata pelni mag keyo. 21 Bech piago kwer dhiang’, saruru, ragwar ma dhoge adek, le, kata mar loso luth michikogo jamni ne en pim* achiel. 22 E odiechieng lweny, onge kata achiel kuom jolweny mag Saulo gi Jonathan+ ma ne nigi ligangla kata tong’; Saulo gi Jonathan kende e ma ne nigi gige lweny.

23 Moko kuom jolweny mag Jo-Filistia ne owuok modhi ka ma ing’adogo hoho man Mikmash.+