Weche mag Ndalo Mokwongo

23 Ka Daudi nosebedo moti kendo nochiegni tho, noketo Solomon wuode mondo obed ruodh Israel.+ 2 Kae to nochoko jodong Israel duto, jodolo+ kod Jo-Lawi.+ 3 Ne okwan Jo-Lawi ma johigni 30 ka dhi nyime.+ Giduto ne gin ji 38,000. 4 Ji 24,000 kuomgi ne ochung’ ne tije mag od Jehova, to ji 6,000 ne gin jotelo kod jong’ad-bura,+ 5 ji 4,000 ne gin jorit rangeye,+ to ji 4,000 ne pako+ Jehova ka gitiyo gi gige thum ma Daudi nowacho kuomgi niya: “Alosogi mondo opakgo Nyasaye.”

6 Daudi ne opogogi e grube+ kaluwore gi yawuot Lawi ma gin: Gershon, Kohath, kod Merari.+ 7 Joka Gershon ne gin Ladan kod Shimei. 8 Yawuot Ladan ne gin Jehiel jatelo, Zetham, kod Joel,+ ji adek. 9 Yawuot Shimei ne gin Shelomoth, Haziel, kod Haran, ji adek. Magi ne gin jotelo e anyuola mag Ladan. 10 Kendo yawuot Shimei ne gin Jahath, Zina, Jeush, kod Beria. Ji ang’wen-gi ne gin yawuot Shimei. 11 Jahath ne en jatelo to Ziza e ma ne luwe. To nikech Jeush kod Beria ne ok onyuolo yawuoyi mang’eny, ne okwan-gi kaka dhoot achiel kendo ne omigi migawo achiel.

12 Yawuot Kohath ne gin Amram, Izhar,+ Hebron, kod Uziel,+ ji ang’wen. 13 Yawuot Amram ne gin Harun+ kod Musa.+ Kata kamano, Harun gi yawuote ne owal chuth+ mondo gipwodh Ka Maler Moloyo, gigol misengni e nyim Jehova, gitine, kendo giguedh ji e nyinge kinde duto.+ 14 Yawuot Musa jatich Nyasaye madier ne okwan e dhood Lawi. 15 Yawuot Musa ne gin Gershom+ gi Eliezer.+ 16 Kuom yawuot Gershom, Shebuel+ e ma ne en jatelo. 17 To kuom yawuot Eliezer, Rehabia+ e ma ne en jatelo; Eliezer ne onge yawuoyi mamoko. Kata kamano, yawuot Rehabia ne ng’eny ahinya. 18 To kuom yawuot Izhar,+ Shelomith+ e ma ne en jatelo. 19 Yawuot Hebron ne gin Jeria ma ne en jatelo, Amaria wuoyi mar ariyo, Jahaziel mar adek, kod Jekameam+ mar ang’wen. 20 Yawuot Uziel+ ne gin Mika ma ne en jatelo gi Ishia wuoyi mar ariyo.

21 Yawuot Merari ne gin Mali kod Mushi.+ To yawuot Mali ne gin Eleazar kod Kish. 22 Eleazar notho, to ne ok onyuolo yawuoyi to mana nyiri. Omiyo, yawuot Kish ma owetegi ne okendogi. 23 Yawuot Mushi ne gin Mali, Eder, kod Jeremoth, ji adek.

24 Magi ne gin yawuot Lawi ma ne ondik nyingegi kaluwore gi anyuolagi kod jotend anyuolagigo. Jo-Lawi ma ne gin johigni 20 kadhi nyime ne okwan kendo nondik nyingegi mondo giti e od Jehova. 25 Nimar Daudi ne owacho kama: “Jehova Nyasach Israel osemiyo joge kuwe+ kendo obiro dak Jerusalem nyaka chieng’.+ 26 Kendo Jo-Lawi ok bi dhi nyime ting’o hema mar lamo kod gik mitiyogo e hemano.”+ 27 Ne okwan Jo-Lawi ma ne johigni 20 ka dhi nyime kaluwore gi chik ma Daudi nogolo mogik. 28 Tijgi ne en konyo yawuot Harun+ timo tije mag od Jehova. Ne gitiyo e laru,+ e ute chiemo, ne gipwodho gik moko duto maler, kendo ne gitimo tich moro amora ma dwarore e od Nyasaye madier. 29 Ne gikonyo e iko makate miketo e nyim Nyasaye,+ mogo mayom migolo kaka chiwo mag cham, makate mopamore ma ok oketie thowi,+ makate molos e tawo, mogo modwal,+ kod tij pimo gik moko duto. 30 Ne gichung’ okinyi kokinyi+ mondo gigo ne Jehova erokamano kendo gipake. Ne gitimo kamano odhiambo bende.+ 31 Ne gikonyo sa ma ichiwo misengni miwang’o ne Jehova e kinde mag Sabato,+ e kinde dwe manyien,+ kod e kinde mag sewni mamoko,+ kaluwore gi kwan ma chik ne dwaro kendo ne gitiyo e nyim Jehova pile. 32 E wi mano, ne gitiyo e hema mar romo kod ka maler. Bende, ne gikonyo owetegi ma yawuot Harun e od Jehova.