Samuel Mokwongo
4 Samuel ne odhi nyime lando wach Nyasaye e piny Israel duto.
Eka Jo-Israel nowuok mondo gidhi giked gi Jo-Filistia; ne gidhi ma gigoyo kambi ka ma chiegni gi Ebenezer, Jo-Filistia to ne ogoyo kambi Afek. 2 Jo-Filistia ne ochanore mondo giked gi Jo-Israel, to lweny ne odhi marach ne Jo-Israel. Jo-Filistia ne oloyogi kendo ne ginego jolwenj Israel madirom 4,000 e pap. 3 Ka ne jolweny odok e kambi, jodong Israel ne owacho kama: “Ang’o momiyo Jehova oweyo mondo Jo Filistia olowa kawuono?+ Wakawuru sandug singruok mar Jehova man Shilo+ wabedgo mondo oreswa e lwet wasikwa.” 4 Omiyo, ne gioro jomoko Shilo ma gidhi gikelo sandug singruok mar Jehova, Nyasach oganda lweny, ma bet e wi* jokerubi.+ Yawuot Eli ariyo miluongo ni Hofni gi Finehas+ bende ne ni kuno gi sandug singruok mar Nyasaye.
5 Ka ne sandug singruok mar Jehova odonjo adonja e kambi ni i, Jo-Israel duto ne omuoch gi koko matek, mi piny noyiengni. 6 Ka ne Jo-Filistia owinjo kokono, ne gipenjore niya: “Koko mang’eny ma wuok e kambi mar Jo-Hibrania en mar ang’o?” Ne gifwenyo ni Sandug Singruok mar Jehova e ma ne okel e kambi. 7 Luoro ne omako Jo-Filistia mi giwacho niya: “Nyasaye osedonjo e kambi mar Jo-Israel!”+ Omiyo, ne giwacho kama: “Ma masira malit manade, gima kama pok ne otimorega nyaka nene! 8 Lit manade! Ng’ano ma biro resowa e lwet Nyasaye maduong’ni? Ma e Nyasaye ma ne ogoyo Jo-Misri e thim gi kit masiche duto.+ 9 Un Jo-Filistia, beduru gi chir kendo keduru ka chwo, mondo kik ubed wasumbni Jo-Hibrania mana kaka gisebedo wasumbniu.+ Keduru ka chwo!” 10 Omiyo, Jo-Filistia ne okedo gi Jo-Israel mi giloyogi.+ Jo-Israel ne oringo mi moro ka moro kuomgi ne odhi pondo e hemane. Chieng’no ne oneg jolweny mang’eny. Jo-Israel ma ne oneg ne gin jolweny 30,000. 11 E wi mano, Jo-Filistia ne okawo Sandug Singruok mar Nyasaye, to Hofni gi Finehas ma yawuot Eli bende ne otho.+
12 Chieng’no, Ja-Benjamin moro ma ne nie lwenyno ne oringo mochopo Shilo ka lepe oyiech kendo wiye otimo buru.+ 13 Ka ne ochopo, noyudo Eli obet e kom e bath yo korito, nimar chunye ne chandore nikech Sandug Singruok mar Nyasaye madier.+ Ng’atno ne odonjo e dala motero wach, kendo ji duto ne omuoch gi nduru. 14 Ka ne Eli owinjo nduruno, ne openjo niya: “Kokono en mar ang’o?” Ng’atno ne odhi ir Eli koreto monyise gima ne otimore. 15 (Eli ne jahigni 98, kendo koro ne ok onyal neno.)+ 16 Ng’atno nonyiso Eli niya: “Awuok e lweny. Ee, aringo lweny mana kawuononi.” To Eli ne openje niya: “Ang’o motimore wuoda?” 17 Ng’at ma ne okelo wachno nolero kama: “Jolwenj Israel oringo Jo-Filistia, nikech Jo-Filistia oloyogi marach+ kendo ginego jolwenj Israel modhuro. Yawuoti ariyo, Hofni gi Finehas bende otho,+ kendo Jo-Filistia okawo Sandug Singruok mar Nyasaye.”+
18 Ka ne owinjo awinja gima ne otimore ne Sandug Singruok mar Nyasaye ni i, ne opodho ataro kowuok e kome ma ne nie rangach mi ng’ute otur motho kanyo gi kanyo nimar dende ne ng’eny kendo hike ne oseniang’ ahinya. Ne oyudo osebedo jang’ad bura e piny Israel kuom higni 40. 19 Noyudo ka chi Finehas wuod Eli yach kendo ne ochiegni nyuol. Ka ne owinjo ni okaw Sandug Singruok mar Nyasaye, kendo ni kwar mare kod chwore otho, ne okulore mi muoch ochako kaye apoyo nono mi onyuol. 20 Ka ne ochiegni tho, mon ma ne ochung’ e bathe ne owacho niya: “Kik iluor nimar isenyuolo wuoyi.” Kata kamano, ne ok odwokogi kendo ne ok odewo wachno. 21 To ne ochako wuoyino ni Ikabod*+ kowacho niya: “Duong’ mar Jo-Israel odhi e tuech.”+ Nowacho kamano nikech ne osekaw Sandug Singruok mar Nyasaye, kendo nikech kwargi kod chwore ne osetho.+ 22 Ne owacho kama: “Duong’ mar Jo-Israel odhi e tuech, nikech osekaw Sandug Singruok mar Nyasaye madier.”+