Samuel Mokwongo

18 Bang’ ka Daudi nosetieko wuoyo gi Saulo, Jonathan+ gi Daudi nochako bedo osiepe mati mata* kendo Jonathan nohero Daudi mana kaka noherore owuon.+ 2 Chakre chieng’no, Saulo ne okawo Daudi mondo odag kode kendo Saulo ne ok oyiene dok dalagi.+ 3 Jonathan gi Daudi notimo singruok+ nimar Jonathan nohero Daudi kaka noherore owuon.+ 4 Jonathan nolonyo kandhone ma onge bade momiyo Daudi. Bende, ne omiye lepe mag lweny, ligangla, atung’, kod msip. 5 Daudi nochako dhi e lweny kendo ne oloyo*+ lweny moro amora ma Saulo ne oore. Omiyo, Saulo ne okete jatend jolweny+ kendo wachno ne omoro ji duto moriwo nyaka jotij Saulo.

6 Kinde moro amora ma Daudi gi jolweny mamoko ne duogo ka giwuok kedo gi Jo-Filistia, mon ne wuok ka giwer+ e mier duto mag Israel kendo ne gimiel ka giromo ne Ruoth Saulo. Ne gimor kendo ne gigoyo oyieke+ gi asili. 7 Mon-go ne wer niya:

8 Wachno ne owang’o i Saulo,+ kendo ne ok omor gi wendno, mowacho niya: “Gimiyo Daudi ji aluf pieche gi pieche, to an gimiya mana ji alufe kende. Donge koro gima odong’ en mana kete ruoth?”+ 9 Chakre chieng’no, Saulo ne ochako chich gi Daudi.

10 Kinyne, roho marach moa kuom Nyasaye nomako Saulo+ mochako timo gik ma galagala* e ot. Noyudo oting’o tong’ e lwete,+ to Daudi ne tugone thum mana kaka ne ojatimo.+ 11 Nobayo Daudi gi tong’+ diriyo kowacho e chunye niya: ‘Abiro guro Daudi e kor ot!’ Kata kamano, Daudi ne otony diriyogo te. 12 Saulo ne koro oluoro Daudi nikech Jehova ne oseweye,+ mi koro ne en gi Daudi.+ 13 Omiyo, Saulo nogolo Daudi bute mokete jatend jolweny aluf achiel, kendo Daudi ne telonegiga e lweny.+ 14 Gik moko duto ma Daudi ne timo ne dhi maber*+ kendo Jehova ne ni kode.+ 15 Ka Saulo noneno kaka weche dhi maber ahinya ne Daudi, ne oluoro Daudi. 16 To Jo-Israel duto gi Jo-Juda ne ohero Daudi nikech ne ojatelonegi e lweny.

17 Bang’e, Saulo ne onyiso Daudi kama: “Merab+ nyara maduong’ ni ka. Abiro miyigo mondo ikende.+ To in nyaka idhi nyime tiyona gi chir kendo iked e lwenje mag Jehova.”+ Saulo ne owacho e chunye niya: ‘Kik aneg Daudi an awuon. We mondo otho e lwet Jo-Filistia.’+ 18 Eka Daudi ne odwoko Saulo kama: “An to an ng’a, kendo wedena gin ng’a, to joodgi wuora gin ng’a e Israel ma dabed or ruoth?”+ 19 To ka ne kinde ochopo mar chiwo Merab ne Daudi, ne oyudo osechiwe ne Adriel+ Ja-Mehola.

20 Koro Mikal+ nyar Saulo ne ohero Daudi kendo Saulo ne mor ka ne onyise wachno. 21 Omiyo, Saulo ne owacho niya: “Abiro miye nyara mondo obedne obadho eka otho e lwet Jo-Filistia.”+ Eka Saulo ne owacho ne Daudi kendo niya: “Bed or ruoth kawuononi.” 22 Saulo ne omedo wacho ne jotije niya: “Dhiuru uwach ne Daudi ling’ling’ kama, ‘Winji! Ruoth mor kodi kendo jotije duto bende oheri. Omiyo, tim niya, kend nyar ruoth.’” 23 Ka ne jotij Saulo onyiso Daudi kamano, Daudi ne openjogi niya: “Uparo ni kendo nyar ruoth en gima yot ne jadhier mocha kaka an kama?”+ 24 Jotij Saulo ne odhi mopimone weche ma Daudi ne owachonegi.

25 Eka Saulo ne owacho niya: “Dhiuru uwach ne Daudi kama, ‘Ruoth ok dwar ni ichule gimoro amora,+ to odwaro mana ni idhi ikel pien duong’ Jo-Filistia 100,+ mondo ichul kuor ne wasik ruoth.’” Nimar Saulo ne dwaro ni Jo-Filistia oneg Daudi. 26 Omiyo, jotij Saulo ne otero ne Daudi wachno kendo Daudi ne oyie bedo or ruoth.+ To ka ndalogo ne pok orumo, 27 Daudi ne odhi gi jolweny mi ginego Jo-Filistia 200 kendo ne okelo ne ruoth pien duong’gi mondo eka obed ore. Eka Saulo ne omiye Mikal nyare mondo okendi.+ 28 Saulo ne ofwenyo ni Jehova ne nigi Daudi+ kendo ni Mikal ne ohero Daudi.+ 29 Mano nomiyo Saulo omedo luoro Daudi ahinya kendo ne obedo jasik Daudi e ngimane duto.+

30 Jotend Jo-Filistia ne dhiga kedo gi Daudi, to e lwenjego te Daudi ne kedo maber* moloyo jotij Saulo+ duto kendo ji ne omiyo Daudi luor ahinya.+