Weche mag Ndalo Mokwongo

10 Gie kindeno, Jo-Filistia ne kedo gi Jo-Israel. Jo-Filistia ne oloyo jolwenj Israel mi jolwenygo ne oringo kendo ne oneg jolweny mang’eny e Got Gilboa.+ 2 Jo-Filistia ne olawo Saulo gi yawuote matek mi ne ginego Jonathan, Abinadab, gi Malkishua.+ 3 Lweny nobedo mager ahinya ne Saulo kendo jo ma bayo asere ne oyude mi gihinye.+ 4 Eka Saulo ne owacho ne jating’ne gige lweny niya: “Kaw liganglani mondo ichuoyago mondo jo ma ok oter nyangugi kik yuda ma gisanda malit.”+ Kata kamano, jating’ne gige lweny ne ok dwar chuoye nikech ne oluor ahinya. Omiyo, Saulo ne okawo liganglane mi ochuorego.*+ 5 Ka ne jating’ ne Saulo gige lweny oneno ni Saulo osetho, en bende ne ochuore gi liganglane mi otho. 6 Omiyo, Saulo gi yawuote adek ne otho kaachiel gi joode duto ma ne ni kode.+ 7 Ka Jo-Israel duto ma ne odak e pap noneno ni ne oselo jolweny mag Israel kendo ni oseneg Saulo gi yawuote, ne giringo mi giweyo miechgi kendo Jo-Filistia ne obiro mi gichako dak kuondego.

8 Kinyne ka ne Jo-Filistia obiro mondo gikaw lewni kod gige lweny mag Jo-Israel ma ne otho, ne giyudo ka Saulo gi yawuote bende otho e Got Gilboa.+ 9 Ne gilonyo lepe mi ging’ado wiye oko kendo ne gikawo gigene mag lweny. Bang’ mano, ne gioro wach e piny Jo-Filistia duto mondo oland wachno ne nyisechegi+ kendo ne ji duto. 10 Kae to ne giketo gige Saulo mag lweny e hekalu mar nyasachgi mi giguro wiye e od Dagon.+

11 Ka ne Jo-Jabesh+ man Gilead owinjo gik ma Jo-Filistia otimo ne Saulo,+ 12 jolweny duto ne odhi mi gikawo ringre Saulo gi ringre yawuote. Ne giduogo gi ringrego Jabesh mi giyiko chokegi e bwo yath maduong’ man Jabesh+ kendo ne ok gichiemo kuom ndalo abiriyo.

13 Kamano, Saulo ne otho nikech richo ma ne otimo ne Jehova kendo nikech ne otamore winjo wach Jehova,+ bende nikech ne odhi ir ajuoga+ 14 kar dhi ir Jehova mondo openje wach. Omiyo, Nyasaye ne onege kendo ne okawo loch momiyo Daudi wuod Jesse.+