Jeremia

43 To ka ne Jeremia osetieko nyiso ji weche duto ma Jehova Nyasachgi ne oseore mondo onyisgi, ma ok opandogi kata wach achiel ma Jehova Nyasachgi nonyisogi, 2 Azaria wuod Hoshaya, Johanan+ wuod Karea, kod ji duto ma ne wigi tek, ne owacho ne Jeremia niya: “Iriambo! Jehova Nyasachwa pok oori ni iwachnwa ni, ‘Kik udhi e piny Misri mondo udag kuno.’ 3 To Baruk+ wuod Neria e mosethuwi kodwa mondo iketwa e lwet Jo-Kaldea mondo ginegwa, kata gimakwa giterwa Babulon.”+

4 Kamano, Johanan wuod Karea gi jotend jolweny duto, kaachiel gi ji duto ne otamore winjo dwond Jehova ni gidong’ e piny Juda. 5 Kar mano, Johanan wuod Karea gi jotend jolweny duto ne okawo ji duto ma nodong’ Juda ma noyudo oseduogo e piny Juda ka gia e pinje ma nokegie.+ 6 Ne gikawo chwo, mon, nyithindo, kod nyi ruoth, kaachiel gi ng’ato ang’ata ma Nebuzaradan+ jatend jorit ne oweyo e lwet Gedalia+ wuod Ahikam+ wuod Shafan.+ Bende, ne gikawo janabi Jeremia kod Baruk wuod Neria. 7 Ne gitamore winjo dwond Jehova mi giduto ne gidhi nyaka Tapanhes+ e piny Misri.

8 Eka wach Jehova nobiro ne Jeremia ka en Tapanhes kama: 9 “Kaw kite moko madongo mondo ipandgi e simiti manie ngas molos gi matofari, ma donjo e od Farao. Initim kamano e nyim Jo-Yahudi. 10 Kae to iwachnegi ni, ‘Ma e gima Jehova Nyasach oganda lweny, Nyasach Israel owacho: “Abiro luongo Nebukadnezar* ruodh Babulon ma jatichna,+ mi anaket kom-lochne e wi kite ma asepandogi. Kendo obiro yaro hembe e wi kitego.+ 11 Adier, enobi kendo enoketh piny Misri.+ Ng’at moket ni mondo tuoche oneg, tuo e ma biro nege, kendo ng’at moket ni itero e tuech, ibiro ter e tuech, to ng’at moket ni biro tho gi ligangla, ligangla e ma nonege.+ 12 Anami owang’ hekalu mag nyiseche Misri gi mach,+ obiro kawo nyisechegi mi enotergi e tuech. Obiro umore gi piny Misri mana ka jakwath ma umore gi lawe, kendo obiro a ma onge ng’at ma lawe.* 13 Obiro turo sirni mag Beth-shemesh* e piny Misri, kendo obiro wang’o hekalu mag nyiseche Misri gi mach.”’”