Mokwongo ne Jo-Korintho

8 Koro kuom wach chiemo motimgo misango ne sanamu:+ Waduto wan gi ng’eyo.+ To ng’eyo kelo sunga, hera to gero ji.+ 2 Ka ng’ato paro ni ong’eyo gimoro, ok ong’eyo gino chutho kaka onego ong’eye. 3 To ka ng’ato ohero Nyasaye, Nyasaye ong’eyo ng’atno.

4 Koro kuom wach chamo chiemo motimgo misango ne sanamu, wang’eyo ni sanamu ok en gimoro+ e pinyni, kendo ni onge Nyasaye moro mak mana achiel.+ 5 Nikech kata obedo ni nitiere gik ma ji luongo ni nyiseche, bed ni gin e polo kata e piny,+ mana kaka adier nitie nyiseche mang’eny kod ruodhi mang’eny, 6 wan to wan gi Nyasaye achiel kende+ ma en Wuoro,+ ma gik moko duto a kuome, kendo wantiere nikech en;+ bende, nitie Ruoth achiel, ma en Yesu Kristo ma gik moko duto nitiere kokalo kuome,+ kendo wantie kokalo kuome.

7 Kata kamano, nitie jo ma ok ong’eyo wachni.+ To nitie jomoko ma chon ne nigi tudruok gi sanamu ma ka gichiemo to giparo ni chiemogo gin gik mosetimgo misango ne sanamu,+ to nikech nyalogi mar pogo ber gi rach yom yom, gibedo ma ok ler e chunygi.+ 8 Kata kamano, chiemo ok bi miyo wasud machiegni gi Nyasaye;+ ka ok wachamo gimoro, ok wan marach moloyo, to ka wachamo gimoro, ok wabed maber moloyo.+ 9 To beduru motang’ mondo ratiro ma un-go mar timo yiero kik chwany jo ma yom yom.+ 10 Nimar un ma usebedo gi ng’eyo, ka ng’ato onenou kuchiemo e hekalu milamoe sanamu, donge ng’at ma chunye mar pogo ber gi rach yom yomno biro bedo gi chir mi chop ka ma ochamo chiemo mosetimgo misango ne sanamu? 11 Omiyo, kokalo kuom ng’eyo ma un-go, ng’at ma yom yom kethore, to en owadu ma Kristo ne othone.+ 12 Ka utimo ne oweteu richo e yo ma kamano, kendo ketho nyalogi mar pogo ber gi rach,+ utimo richo ne Kristo. 13 Mano e momiyo ka chiemo miyo owadwa chwanyore, ok anachak acham ring’o, mondo kik achwany owadwa.+