Tich Joote
2 Koro sa ma Sawo mar Pentekost+ ne dhi nyime, jopuonjre duto ne ni kamoro achiel. 2 Apoya nono, koko moro noa e polo ma chal gi mar yamo ma kudho matek mi opong’o ot duto ka ma ne gibetie.+ 3 Eka ne gineno gik ma chalo gi ligek mach maliel kendo gigo nopiyo kuom ng’ato ka ng’ato kuomgi 4 mi roho maler nopong’ogi giduto+ kendo ne gichako wuoyo gi dhok mopogore opogore, mana kaka roho ne miyogi nyalo mar wuoyo.+
5 Gie kindeno, Jo-Yahudi moluoro Nyasaye, ma noa e ogendni duto e piny ne odak Jerusalem.+ 6 Omiyo, ka kokono nowinjore, oganda nochokore kendo ne gihum, nikech ng’ato ka ng’ato kuomgi ne winjo ka jopuonjrego wacho dhogi. 7 Ne giwuoro ahinya mi giwacho niya: “Donge jo ma wuoyogi duto gin Jo-Galili,+ koso? 8 To obet nade ni ng’ato ka ng’ato kuomwa winjo ka giwacho dhok ma nonyuolee? 9 Jo-Parthia, gi Jo-Media,+ kod Jo-Elam,+ jo ma odak Mesopotamia, kod Judea gi Kapadokia, kod Ponto gi alwora mar Asia,+ 10 gi Frugia kod Pamfulia, gi Misri kod alwora mag Libya man machiegni gi Kurene; gi jowuoth ma noa Rumi, ma ne gin Jo-Yahudi kod jo ma nolokore modonjo e din mar Jo-Yahudi,+ 11 gi Jo-Krete; kod Jo-Arabu. To ere kaka wawinjo jogi ka wuoyo e wi tije madongo mag Nyasaye e dhowa wawegi?” 12 Giduto ne giwuoro kendo ne gihum ka gipenjore e kindgi kama: “Gima timoreni tiende en ang’o?” 13 Kata kamano, jomamoko to ne jarogi ka giwacho niya: “Divai manyien omerogi.”
14 To Petro ne ochung’ gi ji Apar Gachielgo+ mi nowuoyo kodgi gi dwol maduong’ niya: “Un Jo-Judea kod un duto mudak Jerusalem, ng’euru mae kendo uwinj wechena adimba. 15 Kuom adier, jogi ok omer kaka uparo, nimar pod en sa adek okinyi. 16 Mopogore gi mano, ma e gima janabi Joel nokoro ka nowacho niya: 17 ‘Nyasaye owacho, “To e ndalo mag giko, anaol rohona kuom ji duto, mi yawuotu gi nyiu nokor wach, bende yawuotu none fweny, kendo jodongu nolek lek, 18 e ndalogo bende abiro olo roho mara kata mana kuom jotichna ma yawuoyi gi ma nyiri, kendo ginikor wach.+ 19 Mi anatim gik malich miwuoro e polo malo kod ranyisi madongo e piny mwalo, remo gi mach kod yiro motuere ti. 20 Wang’ chieng’ ibiro lok mudho kendo dwe nolok remo, ka pok odiechieng’ maduong’ kendo malich mar Jehova* obiro. 21 Kendo ng’ato ka ng’ato ma luongo nying Jehova* ibiro resi.”’+
22 “Un Jo-Israel, winjuru wechegi: Yesu Ja-Nazareth ne en ng’at ma Nyasaye noyango e nyimu kokalo kuom tije madongo, kendo kuom gik miwuoro kod honni ma Nyasaye notimo kokalo kuome e dieru,+ mana kaka un uwegi ung’eyo. 23 Ng’atni ma ne ochiw e lwetu nikech wach ma Nyasaye noseng’ado+ kendo noseng’eyo motelo, un ne ugure e yath kutiyo gi lwet joketh-chik mi unege.+ 24 Kata kamano, Nyasaye ne ochiere+ kuom gonye oa e tho, nikech ne ok nyalre mondo osik e bwo tuech mar tho.+ 25 Nimar Daudi nowacho kuome niya: ‘Aketo Jehova* e nyima kinde duto, nikech entie e bada korachwich mondo kik ayiengni. 26 Kuom mano, chunya nobedo moil mi lewa nobedo mamor ahinya. Kendo abiro dak gi geno; 27 nimar ok ibi weya e Liel,* bende ok iniwe ng’ati momakore kodi mondo ringrene otow.+ 28 Isemiyo ang’eyo yore mag ngima; ibiro miyo apong’ gi mor maduong’ e nyimi.’+
29 “Un, owetena, yienauru mondo awuo kodu e wi Daudi kwarwa ka an thuolo, ni ne otho mi oyike+ kendo liende ni kodwa nyaka kawuononi. 30 Nikech ne en janabi kendo nong’eyo ni Nyasaye nosesingone ka okuong’ore ni, ng’at achiel kuom kothe ne dhi bedo e kom-loch,+ 31 ne oseneno motelo mi nowuoyo e wi chier mar Kristo, ni ne ok oweye e Liel* kendo ni, ringrene ne ok otow.+ 32 Nyasaye nochiero Yesu kendo waduto wan joneno mag wachno.+ 33 Kuom mano, nikech ne oting’e malo mi obet e bad Nyasaye korachwich,+ kendo noyudo roho maler ma Wuon mare nosingo,+ en e ma oseolo gino ma sani uneno kendo uwinjo. 34 Nimar Daudi ne ok oidho malo e polo, to en owuon nowacho ni, ‘Jehova* nowacho ne Ruodha niya: “Bed e bada korachwich 35 nyaka chop aket wasiki obed raten tiendi.”’+ 36 Omiyo, un jood Israel duto, ng’euru ni kuom adier, Yesu ma ne unego e yath, Nyasaye ne okete Ruoth+ kendo Kristo.”+
37 Koro ka ne giwinjo mano, wachno nochwoyo chunygi, mi ne gipenjo Petro kod joote mamokogo niya: “Un owetewa, ang’o monego watim?” 38 Petro nodwokogi kama: “Lokuru chunyu,+ kendo ng’ato ka ng’ato kuomu obatis+ e nying Yesu Kristo mondo owenu richou.+ To ubiro yudo mich mar roho maler michiwo nono. 39 Nimar singruok+ ma ne Nyasaye otimono, notimonu gi nyithindu kod ji duto man mabor, tiende ni ji duto ma Jehova* Nyasachwa biro luongo mondo obi ire.”+ 40 Kendo nowacho weche mang’eny kochiwo neno e yo mong’ith kendo nodhi nyime jiwogi kama: “Wuoguru e kind tieng’ mobamni, mondo eka utony.”+ 41 Omiyo, ne obatis jo ma norwako wachno gi mor,+ kendo e odiechieng’no, ji 3,000 ne omedore.+ 42 Mi ne gidhi nyime luwo puonj mag joote ka gikonyore giduto. Ne gichiemo+ kendo ne gilamo kanyachiel.+
43 Adier, luoro nomako ji duto, kendo joote notimo honni kod gik mang’eny miwuoro.+ 44 Jogo duto ma noyie ne ni kanyachiel kendo ne giriwo gik moko duto ma ne gikonyorego, 45 kendo ne giuso gigegi kod mwandugi+ kae to ne gipogo yutogo ne ji duto kaluwore gi kaka ng’ato ka ng’ato ne ochando.+ 46 To pile ka pile, ne gijobedo e hekalu ka gin e achiel, kendo ne gichiemo e ute mopogore opogore gi mor maduong’ kod chuny maler. 47 Ne gipako Nyasaye kendo ji duto ne mor kodgi. Gie kindeno bende, pile ka pile Jehova* ne medonegi jo ma ne donjo e yor warruok.+