Tich Joote

9 To nikech Saulo pod ne nigi mirima mager kendo nodwaro nego jopuonjre Ruoth,+ ne odhi ir jadolo maduong’ 2 mi ne okwaye barupe mondo oter e sunagoke man Damaski mondo ka oyudo ng’ato ang’ata, bed ni en dichwo kata dhako ma luwo Yor Ruoth,*+ to okelgi Jerusalem kotueyogi.

3 Koro ka ne ochiegni chopo Damaski, ler moro moa e polo ne orieny apoya nono molwore,+ 4 mi nopodho piny kendo nowinjo dwol moro ka wachone niya: “Saulo, Saulo, isanda nang’o?” 5 Saulo nopenje kama: “In ng’a, Ruoth?” Nodwoke niya: “An Yesu,+ jal ma isando.+ 6 To a malo mondo idonj e dalano, kendo ibiro wachni gima onego itim.” 7 Jo ma ne ni kode e wuoth ne ochung’ ka dhogi omoko. Ne giwinjo dwol moro, to ne ok gineno ng’ato.+ 8 Eka Saulo noa malo ka ma ne opodhoeno, to kata obedo ni wengene ne oyawore, ne ok onyal neno gimoro. Omiyo, ne gitaye ka gimako lwete mi gidonjo kode Damaski. 9 Ne ok oneno kuom ndalo adek,+ kendo ne ok ochiem kata metho.

10 Damaski kanyo ne nitie japuonjre moro ma nyinge Anania,+ kendo Ruoth nobirone e fweny moluonge niya: “Anania!” Eka nodwoke kama: “An kae Ruoth.” 11 Ruoth nowachone niya: “A malo mondo idhi e yo miluongo ni Tir, to kichopo e od Judas, many ng’at ma nyinge Saulo moa Tarso.+ Sani olemo, 12 kendo oseneno e fweny moro ka ng’at ma nyinge Anania donjo kendo keto lwete kuome mondo wengene onen kendo.”+ 13 Kata kamano, Anania nodwoke kama: “Ruoth, asewinjo weche kuom ji mathoth e wi jalno kod gik malit ma notimo ne jogi maler e Jerusalem. 14 Kendo gie sani jotend-jodolo osemiye teko mar mako ji duto ma luongo nyingi.”+ 15 To Ruoth nowachone niya: “Dhi! nikech jalno en gira mar tich moseyier+ mondo oting’ nyinga kolande ne ogendni mamoko+ gi ruodhi+ kod nyithind Israel. 16 Kendo abiro nyise maler sand mang’eny ma nyaka okalie.”+

17 Kuom mano, Anania ne odhi modonjo e odno, kendo noketo lwete kuome mowachone niya: “Saulo owadwa, Ruoth Yesu ma nofwenyoreni ka in e yo kibiro, e ma oseora iri mondo wengeni onen kendo, kae to ipong’ gi roho maler.”+ 18 Mi gikanyono, gik moko ma chal gi ogakla mag rech nolwar koa e wengene, mi nochako neno kendo. Eka noa malo mi ne obatise, 19 bende, ne ochiemo mi oyudo teko.

Ne obedo Damaski gi jopuonjre kuom ndalo moko,+ 20 kendo gikanyono nochako yalo e wi Yesu e sunagoke konyiso ni Yesu e Wuod Nyasaye. 21 To ji duto ma ne winje ne wuoro ahinya ka gipenjore niya: “Donge jali e ma ne sando malit jo ma luongo nyingno e Jerusalem?+ Donge ne obiro kae mondo omakgi koterogi ir jotend-jodolo?”+ 22 To Saulo nodhi nyime bedo gi teko mang’eny kendo ne omiyo Jo-Yahudi ma nodak Damaski ohum sa ma nolero e yo malong’o ni Yesu e Kristo.+

23 Koro ka ndalo mogwaro nosekalo, Jo-Yahudi noriwo paro mondo ginege.+ 24 Kata kamano, Saulo nofwenyo chenrogi marachno. Bende, ne girito rangeye odiechieng’ gi otieno mondo ginege. 25 Omiyo, jopuonjrene ne okawe mokete e okapu kendo ne gilorego piny gotieno e otuchi moro e kor ohinga.+

26 Ka Saulo nochopo Jerusalem,+ notimo kinda mondo oriwre gi jopuonjre, to giduto ne giluore, nimar ne ok giyie ni koro nosebedo japuonjre. 27 Kuom mano, Barnaba+ ne okonye kendo notere ir joote monyisogi weche duto kaka Saulo noseneno Ruoth+ e yo mi nowuoyo kode kod kaka noseyalo gi chir e wi nying Yesu ka en Damaski.+ 28 Omiyo, nomedo bedo kodgi, kendo nowuotho kamoro amora e Jerusalem ma onge luoro, koyalo gi chir kuom nying Ruoth. 29 Noyudo oyware gi Jo-Yahudi ma ne wacho dho Grik, to jogo notemo mondo ginege.+ 30 Ka owete nofwenyo mano, ne gilor kode nyaka Kaisaria mi giweye mondo odhi Tarso.+

31 Bang’ mano, kanyakla manie alwora duto mar Judea, gi Galili, kod Samaria,+ nobedo gi kinde mag kuwe, ka gigerore motegno e yie. Kaka ne gimedo wuotho ka giluoro Jehova* kendo roho maler hoyogi,+ e kaka kwan mar jopuonjre ne siko ka medore.

32 Ka ne Petro wuotho e alworano duto, nochopo ir jo maler ma nodak e dala mar Luda.+ 33 Kanyo noyudoe ng’at moro ma nyinge Ainea, ma nosebedo ka ok nyal wuok e otandane kuom higni aboro nikech tuo mar abach. 34 Petro nowachone kama: “Ainea, Yesu Kristo e ma changi.+ A malo kendo ipedh otandani.”+ Mi gikanyono noa malo. 35 Ka ji duto ma nodak e Luda kod Pewe mag Sharon ne onene, ne gilokore mi giyie kuom Ruoth.

36 Koro ne nitie japuonjre moro Jopa ma nyinge Tabitha, ma kolok to tiende en “Dorkas.”* Ne ogundho gi timbe mabeyo kendo nochiwo mich mag konyo jochan. 37 To e ndalono nobedo ma tuo mi notho. Omiyo, ne gilwoke mi gipiele e ot ma malo. 38 Nikech Luda ne chiegni gi Jopa to jopuonjre nowinjo ni Petro ne ni e dalano, ne gioro ji ariyo ire mondo gikwaye kama: “Kiyie, bi irwa ma ok ideko.” 39 Eka Petro noa malo, mi nodhi kodgi. To ka nochopo kuno, ne gitere nyaka e ot ma malo; kendo mond liete duto ne odhi ire ka giywak kendo ka giting’o lewni mang’eny gi kandho ma Dorkas ne otwang’o ka ne pod en kodgi. 40 Eka Petro nogolo ji duto oko+ mi nogoyo chonge piny molemo. Kae to nolokore mong’iyo ringre ng’at mothono mowacho niya: “Tabitha, a malo!” Mi Tabitha noyawo wang’e kendo ka noneno Petro, ne obet piny.+ 41 Petro ne omake mi ne ochunge malo eka noluongo jo maler kod mond liete mi ne ochiwenegi kongima.+ 42 Wachno nolandore Jopa mangima, kendo ji mang’eny ne oyie kuom Ruoth.+ 43 Petro nobet Jopa kuom ndalo moko mogwaro kodak gi janyong’-piende moro ma nyinge Simon.+