Mokwongo ne Jo-Korintho
12 Koro owetena, ok daher ni ubed ma onge ng’eyo kuom wach mich ma roho chiwo.+ 2 Ung’eyo ni ka ne un jopiny,* ne iwuondou mondo ulam sanamu ma ok nyal wuoyo,+ ka uluwogi kamoro amora ma ne giteroue. 3 Koro daher ni ung’e ni onge ng’ato ma ka wuoyo kokalo kuom roho mar Nyasaye, onyalo wacho kama: “Okuong’ Yesu!” kendo onge ng’at ma nyalo wacho niya: “Yesu en Ruoth!” mak mana kokalo kuom roho maler.+
4 Koro nitie mich mopogore opogore, to roho en achiel;+ 5 nitie tije mopogore opogore,+ to Ruoth en achiel; 6 kendo nitie yore mathoth mitimogo tich, to Nyasaye achiel e ma pod timogi giduto ei ng’ato ka ng’ato.+ 7 To roho nenore kuom ng’ato ka ng’ato mondo ber obedie.+ 8 Nikech ng’ato achiel imiyo weche mag rieko kokalo kuom roho, to machielo imiyo weche mag ng’eyo kokalo kuom roho achielno, 9 kendo ng’at machielo imiyo yie+ kokalo kuom roho achielno, to machielo imiyo mich mag chango ji+ kokalo kuom roho achielno, 10 to pod ng’at machielo imiyo teko mar timo tije madongo,+ kendo machielo mar koro wach, to machielo fwenyo weche moa kuom much Nyasaye,+ to machielo dhum gi dhok mopogore opogore,+ kendo machielo loko tiend dhok mopogore opogore.+ 11 To tijego duto itimo kokalo mana kuom roho achielno, kopogo ne ng’ato ka ng’ato mana kaka odwaro.
12 Nimar mana kaka ringruok en achiel to en gi fuonni mang’eny, kendo kata obedo ni fuonni duto mag ringruogno ng’eny, gin ringruok achiel,+ kamano bende e kaka Kristo en. 13 Nikech kokalo kuom roho achiel, waduto ne obatiswa mi wabedo ringruok achiel, bed ni wan Jo-Yahudi kata Jo-Grik, bed ni wan wasumbni kata wan thuolo, kendo waduto ne wamadho roho achiel.
14 Nimar ringruok nigi fuonni mang’eny, to ok achiel.+ 15 Ka di po ni tielo nyalo wacho ni, “Nikech ok an lwedo, ok an fuoni mar ringruok,” mano ok mone bedo fuoni mar ringruok. 16 To ka di po ni it nyalo wacho ni, “Nikech ok an wang’, ok an fuoni mar ringruok,” mano ok mone bedo fuoni mar ringruok. 17 Ka dabed ni ringruok duto en wang’, dine owinjo wach nade? To ka dabed ni ringruok duto en it, dine ong’uecho nade? 18 Kata kamano, Nyasaye oseketo moro ka moro kuom fuonni mag ringruok mana kaka nohero.
19 Ka dine bed ni giduto gin fuoni achiel, ringruok dobedo kanye? 20 To koro kata obedo ni gin fuonni mang’eny, pod gin ringruok achiel. 21 Wang’ ok diwach ne lwedo ni, “Ok adwari,” kata wich bende ok nyal wacho ne tielo ni, “Ok adwari.” 22 To mopogore gi mano, fuonni mag ringruok ma nenore ni nyap, gin ma dwarore, 23 kendo fuonni mag ringruok ma waparo ni onge gi duong’ ahinya, wamiyogi duong’ moloyo,+ kendo fuonni ma nenore ni ok long’o ahinya, imiyogi luor moloyo, 24 fuonni ma nenore ni long’o, ok gichando gimoro. Kata kamano, Nyasaye oseloso ringruok kamano, komiyo fuoni ma nenore ni orem oyud duong’ moloyo, 25 mondo fuonni duto odewre, kendo pogruok kik bedie e ringruok.+ 26 Ka fuoni achiel winjo lit, mamokogo duto winjo lit kanyachiel kode;+ bende ka fuoni achiel imiyo duong’, mamokogo duto yudo mor kanyachiel kode.+
27 Koro un ringruok mar Kristo,+ kendo ng’ato ka ng’ato kuomu en fuoni mar ringruogno.+ 28 Kendo Nyasaye osemiyo jomoko migepe ei kanyakla: mokwongo, joote;+ mar ariyo, jonabi;+ mar adek, jopuonj;+ eka tije madongo;+ kae to mich mag chango ji;+ kod timo tije ma konyo ji; kod nyalo mag tayo weche;+ kod dhum gi dhok mopogore opogore.+ 29 Ok ni ji duto gin joote, koso? Ok ni ji duto gin jonabi, koso? Ok ni ji duto gin jopuonj, koso? Bende, ok ni ji duto timo tije madongo, koso? 30 Ok ni ji duto nigi mich mag chango ji, koso? Ok ni ji duto dhum gi dhok mopogore opogore, koso?+ Ok ni ji duto loko dhok, koso?+ 31 To dwaruru matek mich madongo moloyo.+ Koro abiro nyisou yo maberie moloyo duto.+