Mar Ariyo ne Jo-Korintho

7 Kuom mano, un jo ma wahero,+ nikech osemiwa singogo, wapwodhreuru kuom gik moko duto ma chido ringruok kod paro,+ ka wamedo bedo maler chuth e luoro Nyasaye.

2 Yawnwauru chunyu.+ Pok watimo marach ne ng’ato, pok waketho ne ng’ato, pok watiyo marach gi ng’ato ang’ata.+ 3 Ok awach mano mondo aket ketho kuomu. Nikech mana kaka nasewacho motelo, un ei chunywa mondo watho kanyachiel kendo wabed mangima kanyachiel. 4 Aloso kodu ka an thuolo. An gi sunga maduong’ nikech un. Chunya oseyudo hoch mogundho; bende, e masichewa duto, chunya opong’ gi mor ahinya.+

5 Kuom adier, ka ne wachopo Makedonia,+ ringrewa ne ok oyueyo, kata kamano, ne wadhi nyime yudo chandruok e yore mang’eny—ne nitiere gik ma kedo kodwa gi oko, to luoro bende ne ni e kindwa. 6 Kata kamano, Nyasaye ma hoyo jo ma chunygi+ onyosore nohoyowa kokalo kuom biro mar Tito; 7 to ok mana kuom biro mare kende, to bende kuom hoch ma ne uhoyego, nimar ne oduokonwa wach kaka un gi siso mar nena, kuyo maru, kod kaka ne udwaro ng’eyo ahinya kaka adhi; omiyo ne ail gi ilo momedore.

8 Nikech kata ka barupa ne omiyou kuyo,+ ok aywag ang’e. Kata obedo ni mokwongo ne aywago ang’e (ka aneno ni baruano nomiyou kuyo, kata ka ne en mana kuom kinde manok), 9 koro amor, ok mana nikech ne ukuyo, to nikech kuyouno nomiyo uloko chunyu ua e richo. Nikech ne ukuyo e yo ma Nyasaye dwaro, omiyo onge gima ne oa kuomwa ma nohinyou. 10 Nikech kuyo e yo ma Nyasaye dwaro miyo ng’ato loko chunye a e richo ka tere e warruok, ma en gima ok kel ywago ang’e;+ to kuyo mar pinyni tero ng’ato e tho. 11 Nimar neuru gima kuyo ma Nyasaye dwaro osenyago kuomu: kinda maduong’, ee, gombo mar nyiso ni uonge ketho, ee, sin gi ketho, ee, luoro Nyasaye, ee, siso, ee, kinda, kendo userieyo kethou!+ E yore duto, ne unyisoru uwegi ni uler kuom wachno. 12 Kata obedo ni ne andikonu, ok ne atimo kamano nikech ng’at ma notimo marach+ kata nikech ng’at ma notimne marach, to ne andikonu mondo kinda ma un-go nikech wan onenre ayanga e wang’ Nyasaye. 13 Mano e momiyo osehowa.

To kanyachiel gi hochno, ne wamedo bedo moil nikech ilo mar Tito, nimar uduto ne uduogo chunye. 14 Nikech ka asepakora e nyime nikech un, wiya pok okuot; to mana kaka weche duto ma nonyisou ne gin adier, e kaka bende pakruokwa e nyim Tito osebedo madier. 15 Bende, hera moherougo medore ka oparo kaka uduto uluwo weche michikougo, kod kaka ne urwake gi luoro kod kirni. 16 Amor ni e yore duto anyalo genou chuth.*