Tich Joote
12 Gie kindego, ruoth Herode nochako sando moko kuom jo ma ne ni e kanyakla.+ 2 Ne onego Jakobo owadgi Johana+ gi ligangla.+ 3 Ka noneno ni timno ne omoro Jo-Yahudi, nomako Petro bende. (Mano ne otimore e ndalo sawo mar Makate ma Ok Oketie Thowi.)+ 4 Ne otueyo Petro e jela+ moketone askeche ang’wen-ang’wen ma rite ka giwilore ding’wen, nimar nodwaro chiwe e lwet oganda bang’ Pasaka. 5 Omiyo, Petro nosiko e jela. Kata kamano, kanyakla ne lamone Nyasaye ahinya.+
6 E otieno ma kinyne Herode ne dhi chiwe ne oganda, Petro ne nindo e kind askeche ariyo kotueye gi nyoroche ariyo. Bende, e dhoot ne nitie jorit ma ne rito jela. 7 Malaika mar Jehova* nobiro mochung’ kanyo,+ kendo ler ne orieny e od jelano. Eka nopamo bath Petro kochiewe mowachone niya: “A malo mapiyo!” Eka nyorochego ne olwar koa e lwetene.+ 8 Malaikano nowachone niya: “Ikri kendo irwak wuocheni.” Notimo kamano. Nomedo wachone kama: “Rwak nangani ma oko kae to iluw bang’a.” 9 Eka nowuok oko mi ne oluwe, to ne ok ong’eyo ka be gima ne timore kokalo kuom malaikano ne en adier. Kuom adier, noparo ni ne oneno mana fweny moro. 10 Bang’ kalo kidieny mar jorit mokwongo gi kidieny mar ariyo, ne gichopo e rangach molos gi chuma ma ji wuokgo e jela ka dhi e dalano, to rangano ne oyaworenegi ayawa kende. Ka ne gisewuok, ne giridore mwalo e yo moro, eka gikanyono malaikano ne oweye. 11 To ka pach Petro noseduogo, nowacho niya: “Koro to ang’eyo gadier ni Jehova* ne ooro malaikane mondo oresa e lwet Herode, kendo oseresa kuom gik moko duto ma Jo-Yahudi ne geno neno ka timore.”+
12 Ka nosefwenyo mano, nodhi e od Maria min Johana ma bende ne iluongo ni Mariko,+ kama ji mogwaro noyudo ochokoree ka gilemo. 13 Ka nodwong’o rangach, jatich moro ma nyako ma nyinge Roda nobiro yawone. 14 Ka nofwenyo dwond Petro, ne omor ahinya mi ne ok oyawo rangach, to ne oringo modok iye kendo notero ne ji wach ni Petro ne ni e rangach. 15 To jogo nowachone niya: “In neko osemaki.” Kata kamano, noramo ni en adier. Eka ne giwacho kama: “Kare mano malaikane.” 16 To Petro pod ne dwong’o rang’ach. Ka ne giyawo rangach ne ginene mi gihum nono. 17 En to noting’onegi lwete mondo giling’ thi, eka noleronegi adimba kaka Jehova* ne ogole e jela, kendo nokonegi niya: “Teruru wachni ne Jakobo+ kod owete.” Bang’ mano ne oa kanyo mi nodhi kama chielo.
18 Koro ka ne piny oru, ne nitie chochni mang’eny e kind askeche ka gipenjore gima dibed ni otimore ne Petro. 19 Herode ne omanye gi kinda, to ka ok ne onwang’e, nonono wachne kuom jorit, kae to nochiko mondo otergi e kum;+ eka ne owuok Judea mi nodhi nyaka Kaisaria motieko ndalo moko mogwaro kuno.
20 Koro Herode ne dwaro ahinya kedo gi Jo-Tiro kod Jo-Sidon. Omiyo, jogo nobiro ire ka gin e achiel kendo bang’ wuoyo gi Blasto, jal ma ne ochung’ ne weche mag od ruoth, ne gikwayo mondo kuwe obedie, nimar pinygi ne yudo chiemo koa e piny ruodhno. 21 E odiechieng’ moro moyang, Herode ne orwako nangane mar ruoth mi nobet e kom-bura, kae to nochako wuoyo e nyim ji duto. 22 Eka jo ma ne ochokorego nochako kok niya: “Mani en dwond nyasaye, to ok mar dhano!” 23 Malaika mar Jehova* ne ogoye gikanyono, nimar ne ok omiyo Nyasaye duong’, kendo kute ne ochame motho.
24 Eka wach Jehova* nomedo dongo kendo landore.+
25 Ka Barnaba+ gi Saulo nosetieko tij chiwo kony ne owete man Jerusalem,+ ne giduogo gi Johana,+ ma bende ne iluongo ni Mariko.