Samuel Mokwongo

15 Samuel ne owacho ne Saulo niya: “Jehova e ma ne oora mondo aketi ibed ruoth e wi joge Israel.+ Koro chik iti mondo iwinj gima Jehova wacho.+ 2 Ma e gima Jehova Nyasach oganda lweny wacho: ‘Abiro kumo Jo-Amalek nikech gima ne gitimo ne Jo-Israel. Ne gimonjogi e yo ka ne giwuok Misri.+ 3 Omiyo, dhi imonj Jo-Amalek+ kendo itiekgi+ kaachiel gi gikgi duto. Neggi giduto,+ kik iwe kata mana achiel kuomgi ka ngima;* neg chwo gi mon, nyithindo matindo kod madhoth, ruedhi kod rombe, ngamia kod punda.’”+ 4 Saulo ne oluongo jolweny duto Telaim mokwanogi. Ne oyudo ni jolweny ma ne oa e dhoudi mamoko mag Israel ne gin 200,000 to ma ne oa e dhood Juda ne gin 10,000.+

5 Saulo ne odhi nyaka e dala Jo-Amalek mi obuto but aora. 6 Kendo Saulo ne owacho ne Jo-Keni+ niya: “Wuoguru e kind Jo-Amalek mondo kik atieku kodgi.+ Nimar ne unyiso Jo-Israel+ ng’wono ka ne giwuok Misri.” Omiyo, Jo-Keni ne owuok e kind Jo-Amalek. 7 Bang’ mano, Saulo ne onego Jo-Amalek+ chakre Havila+ nyaka Shur+ man but Misri. 8 Ne omako Agag+ ruodh Jo-Amalek ka ngima, to jomoko duto ne onego gi ligangla.+ 9 Saulo kod joge ne ok onego Agag. Bende, ne giweyo jamni mabeyo, jamni machwe, yimbe, kod gik mabeyo duto.+ Ne ok gidwar kethogi. To gik moko duto ma ne ok gidwar kendo ma ne gineno ni onge tich, ne giketho.

10 Kendo wach Jehova ne obiro ne Samuel niya: 11 “Awinjo malit ni ne aketo Saulo mondo obed ruoth nimar oweyo luwa kendo ok otimo kaka achike.”+ Samuel ne owinjo marach ahinya kendo ne oywak ne Jehova otieno mangima.+ 12 Ka ne Samuel omondo gokinyi mondo odhi one Saulo, ne owachne ni: “Saulo ne odhi Karmel+ mi ochungo siro kuno miparego.+ Kae to ne odhi Gilgal.” 13 Ka ne Samuel ochopo moyude, Saulo ne owachone niya: “Jehova mondo oguedhi. Asetimo kaka Jehova ne ochika.” 14 To Samuel ne openje niya: “To rombe gi diek kod dhok ma awinjo ka ywakgo oa kanye?”+ 15 Saulo ne odwoke kama: “Ne okawgi kuom Jo-Amalek nikech jolweny ne oweyo* rombe, diek kod jamni mabeyo mogik mondo ochiw ne Jehova Nyasachi; kata kamano, gik ma ne odong’ to ne okethi.” 16 Gikanyono, Samuel ne owacho ne Saulo niya: “Ling’ ane! Winj gima Jehova ne owachona nyoro gotieno.”+ Saulo ne odwoke ni: “Wachna awinji.”

17 Samuel ne omedo wacho niya: “Donge in e ma ne ikwanori ka ng’at manono+ ka ne ibedo jatend dhout Israel kendo ka ne Jehova oketi ruoth e wi Jo-Israel?+ 18 Bang’e Jehova ne oori kowachoni niya: ‘Dhi itiek joricho ma Jo-Amalek.+ Ked kodgi nyaka girum chuth e wang’ piny.’+ 19 Koro ang’o momiyo ne ok iwinjo dwond Jehova? Kar winje, ne imwomori miyako mwandu+ kendo itimo marach e wang’ Jehova.”

20 Kata kamano, Saulo ne odwoko Samuel kama: “Donge asewinjo dwond Jehova kendo asedhi matimo kaka Jehova ne owachona mi aduogo gi Agag ruodh Jo-Amalek; Jo-Amalek duto bende asetieko.+ 21 To jolweny e ma ne okawo rombe kod dhok mabeyo kuom gik ma ne onego okethi mondo ochiwgi Gilgal kaka misango ne Jehova Nyasachi.”+

22 Eka Samuel ne owacho kama: “Ang’o ma Jehova morgo moloyo: En golo misengni,+ koso winjo chik Jehova? Adiera en ni luwo chik ber moloyo golo misango+ kendo winjo wach ber moloyo boche+ mag rombe; 23 nimar tamruok winjo chik+ chalo gi tim juok+ kendo hedhruok chalo juok kod lamo nyiseche manono.* Nikech isedagi wach Jehova,+ en bende osedagi ni kik ibed ruoth.”+

24 Saulo ne owacho ne Samuel niya: “Asetimo richo nikech ok atimo kaka Jehova ne ochika kod kaka ne iwachona. Kar mano, ne aluoro ji mi atimo kaka ne giwachona. 25 To koro akwayi, wena richona, kendo dog koda mondo adhi akulra e nyim Jehova.”+ 26 Kata kamano, Samuel ne odwoko Saulo niya: “Ok abi dok kodi nikech isetamori winjo wach Jehova to Jehova bende osetamore ni kik idhi nyime bedo ruoth e wi Jo-Israel.”+ 27 Ka ne Samuel lokore mondo odhi, Saulo ne oywayo riak kandhone mi kandhono ne oyiech. 28 Gikanyo, Samuel ne owachone kama: “Jehova oseyiecho lochni e Israel chakre kawuono kendo obiro miyo ng’at machielo maber moloyi.+ 29 E wi mano, Nyasaye Maduong’ Moloyo ma en Nyasach Israel+ ok wach miriambo+ kendo ok obi loko pache nikech ok en dhano ma dolok pache.”+

30 Saulo ne odwoke niya: “Adier asetimo richo. Kata kamano, miya duong’ e nyim jodongo kod Israel duto. Dog koda mondo akulra e nyim Jehova Nyasachi.”+ 31 Omiyo, Samuel ne odok gi Saulo mi Saulo ne okulore e nyim Jehova. 32 Eka Samuel nowacho kama: “Kelnauru Agag ruodh Jo-Amalekno ka.” Kae to Agag ne odhi ir Samuel ka oluor nikech nosebedo kowacho e chunye niya: ‘Asetony. Koro ok bi nega.’ 33 Kata kamano, Samuel ne owachone kama: “Mana kaka liganglani osemayo mon nyithindgi, e kaka minu bende biro bedo dhako ma okuyo moloyo mon duto.” Gikanyono, Samuel ne otong’o Agag matindo tindo e nyim Jehova ka gin Gilgal.+

34 Koro Samuel ne odok Rama to Saulo ne odhi Gibea e ode. 35 Samuel ne okuyo ahinya nikech Saulo kendo nyaka chop tho Samuel ne ok ochako oneno Saulo kendo.+ Jehova ne owinjo malit nikech noketo Saulo ruoth e wi Israel.+