Joshua
1 Bang’ ka Musa jatich Jehova nosetho, Jehova nonyiso Joshua*+ ma wuod Nun kendo ma ne en jakony+ Musa niya: 2 “Musa jatichna osetho.+ Koro a malo. Ng’ad Aora Jordan gi Jo-Israel duto mondo udhi e piny ma adwaro miyou.+ 3 Kamoro amora ma tiendu nonyon abiro miyou mana kaka ne asesingo ne Musa.+ 4 Pinyu biro chakore e thim nyaka Lebanon ma dhi nyaka e Aora Yufrate, tiende ni piny Jo-Hiti duto,+ ma uchop nyaka Nam Maduong’* man yo podho chieng’.+ 5 E ngimani duto, onge ng’at ma noked kodi ma loyi.+ Nabed kodi+ mana kaka ne abedo gi Musa. Ok abi weyi kendo ok abi jwang’i.+ 6 Bed gi chir kendo gi teko+ nimar in e ma ibiro tero jogi nyaka e piny ma ne asingo ne kweregi ni anamigi.+
7 “Bed mana gi chir kendo gi teko, kendo rit chike duto ma Musa jatichna ne omiyi. Kik ibar korachwich kata koracham.+ Kamano inibed mariek kamoro amora ma nidhiye.+ 8 Bug Chikni kik a e dhogi,+ to some gi dwol mapiny* odiechieng’ gotieno mondo omi iluw weche duto mondik e iye;+ eka inibed gi rieko, kendo yoreni duto biro dhi maber.+ 9 Donge asechiki ni ibed gi chir kendo ibed gi teko? Kik iluor kendo kik kibaji goyi, nimar Jehova Nyasachi nobed kodi kamoro amora ma nidhiye.”+
10 Eka Joshua nochiko jotend oganda niya: 11 “Dhiuru e kambi duto mondo uland ne oganda ni, ‘Ikuru gik moko, nimar odong’ ndalo adek to ung’ado Aora Jordan mondo ukaw piny ma Jehova Nyasachu dwaro miyou.’”+
12 Joshua koro nowacho ne Jo-Reuben, gi Jo-Gad, kod nus Jo-Manase niya: 13 “Paruru kaka Musa jatich Jehova nowachonu+ ni: ‘Jehova Nyasachu osemiyou pinyni mondo udagie gi kuwe. 14 Mondeu, nyithindu, kaachiel gi jambu biro dong’ e piny ma Musa nosemiyou loka Aora Jordan koni,+ kata kamano, jolwenju+ to biro ng’ado aora mondo gidhi giked ne oweteu.+ Ne ni ukonyogi 15 nyaka Jehova Nyasachu migi kuwe mana kaka osemiyou, kendo ni gikawo piny ma Jehova Nyasachu miyogi. Ka usekonyogi kamano, duoguru udag e piny ma Musa jatich Jehova nomiyou loka yo wuok chieng’ mar Aora Jordan.’”+
16 Ne gidwoko Joshua niya: “Wabiro timo gimoro amora ma isechikowa, kendo wabiro dhi kamoro amora ma iorowae.+ 17 Wabiro luwo weche duto minyisowa mana kaka ne waluwo weche duto ma ne Musa onyisowa. Mad Jehova Nyasachi obed kodi mana kaka ne obedo gi Musa.+ 18 Ng’ato ang’ata motamore winjo wachni kata motamore timo gimoro amora michike, ibiro negi.+ In to bed mana gi chir kod teko.”+