Mokwongo ne Jo-Korintho
3 Omiyo, owetena, ne ok awuo kodu kaka jo ma roho tayo,+ to kaka jo ma paro mag ringruok e ma chiko, mana kaka nyithindo mayom+ kuom Kristo. 2 Napidhou gi chak, to ok gi chiemo motegno, nimar ne pok utegno moromo. To adier, kata mana sani pok utegno,+ 3 nimar paro mag ringruok pod chikou.+ Nikech nitiere nyiego kod dhawo e kindu, donge paro mag ringruok e ma chikou+ kendo uwuotho kaka jopiny wuotho? 4 Nikech ka ng’ato wacho ni, “An mar Paulo,” to machielo wacho ni, “An to an mar Apolo,”+ donge utimoru mana kaka ji ajia, koso?
5 Kare Apolo en ng’a? To Paulo en ng’a? Gin jotich Nyasaye+ ma nomiyo urwako yie. Ng’ato ka ng’ato nigi tich ma Ruodhwa nomiye. 6 An ne apitho,+ Apolo ne oolo pi,+ to Nyasaye ne omiyo gidongo, 7 omiyo, Nyasaye e ma miyo gidongo, to ok ng’at ma pitho kata ma olo pi.+ 8 Koro ng’at ma pitho kod ng’at ma olo pi giduto gitiyo tich achiel, to ng’ato ka ng’ato noyud pokne kaluwore gi tichne owuon.+ 9 Nimar wan jotich ma tiyo kanyachiel gi Nyasaye. Un to un puoth Nyasaye ma opidho, ot ma Nyasaye gero.+
10 Kaluwore gi ng’wono mogundho mar Nyasaye ma nomiya, ne aketo mise+ kaka jagedo maduong’ molony, to ng’at machielo e ma gedo e wi miseno. Kata kamano, ng’ato ka ng’ato mondo odhi nyime nono kaka ogedo e wi miseno. 11 Nikech onge ng’at ma nyalo keto mise moro machielo moloyo mise moseket ma en Yesu Kristo.+ 12 Koro ka ng’ato gedo e wi miseno kotiyo gi dhahabu, kata fedha, kata kite ma nengogi tek, kata bepe, kata lum, kata tiang’, 13 tich ma ng’ato ka ng’ato tiyo biro ng’ere ka chieng’no ochopo, nikech ibiro fwenye kokalo kuom mach,+ kendo majno biro nyiso gadier kit gedo mar ng’ato ka ng’ato. 14 Ka tich ma ng’ato osegero e wi miseno osiko, obiro yudo pok; 15 to ka tich mar ng’ato owang’, obiro yudo lal maduong’, to en owuon ibiro rese; to kata ka orese, mano nochal ka gima orese oa e mach.
16 Koso ok ung’eyo ni un hekalu mar Nyasaye,+ kendo ni roho mar Nyasaye odak e iu?+ 17 Ka ng’ato ketho hekalu mar Nyasaye, Nyasaye biro ketho ng’atno; nimar hekalu mar Nyasaye ler, kendo un e hekaluno.+
18 Kik ng’ato owuondre: Ka ng’ato e kindu paro ni oriek e pinyni,* onego olokre mofuwo mondo eka obed mariek. 19 Nikech rieko mar pinyni en fuwo e wang’ Nyasaye, nimar ondik kama: “Omako jorieko gi riekogi giwegi.”+ 20 Kendo niya: “Jehova* ong’eyo ni paro mag jorieko gin gik manono.”+ 21 Omiyo, kik ng’ato pakre nikech dhano; nimar gik moko duto gin magu, 22 kata ka en Paulo, kata Apolo, kata Kefa,*+ kata pinyni, kata ngima, kata tho, kata gik ma nitiere sani, kata gik ma pod biro, gik moko duto gin magu; 23 un to un mag Kristo;+ to Kristo en mar Nyasaye.