Zefania
3 Yaye nobed malit ne dala mong’anyo, modwanyore, kendo ma sando ji!+
2 Notamore winjo dwol;+ notamore winjo siem.+
Ne ok ogeno kuom Jehova;+ ne ok osudo but Nyasache.+
3 Jotende gin sibuoche ma ruto.+
Jong’ad buchene chalo gi ondiegi ma wuotho gotieno;
Ok giwe kata chogo minyalo muod nyaka gokinyi.
4 Jonabine ochayo ji, gin jo andhoga.+
5 Jehova ni kare e diergi;+ ok onyal timo richo.
Okinyi kokinyi onyiso ji buchene,+
Ok obare mana ka ler modiechieng’.
To ng’at ma ok kare ok ong’eyo wich-kuot.+
6 “Ne atieko ogendni; ute maboyo ma ne ni e konde mag ohinga ne ojwang’.
Ne aketho nderni mage, onge ng’at ma ne kalo kuno.
Miechgi madongo ne odong’ gunda, ma onge ng’ato ang’ata modakie.+
7 Nawacho ni, ‘Adier, ubiro luora kendo ubiro yie mondo arieu,’+
Mondo kik keth ka ma odakie+
—Nyaka akume nikech osetimo gigi duto.
Kata kamano, pod ne gimedo mana timo richo.+
8 ‘Omiyo, ritauru arita,’+ Jehova owacho,
‘Nyaka chieng’ ma abiro a malo mondo ayak mwandugi,*
Nimar aseng’ado ni adhi choko ogendni, adhi choko pinjeruodhi,
Mondo aolnegi mirimba, mirimba mager duto;+
Nikech mirimba mager ka mach biro wang’o piny duto.+
9 Eka abiro loko dhok ma ji wacho mondo obed dhok maler,
Mondo giduto giluong nying Jehova,
Kendo gitine ka gin gi winjruok.’+
10 Kochakore gi alwora man e aoche mag Ethiopia,
Jo ma saya, nyar joga moseke, biro kelona mich.+
11 E odiechiengno, ok iniyud wich-kuot
Kuom timbeni duto maricho ma ne itimona,+
Nikech abiro golo jo ma wigi tek e kindu;
Wiu ok nochak obed matek kendo e goda maler.+
12 Jo ma obolore gi jo mamuol e ma abiro weyo e kindu,+
Kendo gibiro keto nying Jehova obednegi kar bwok.
13 Jo-Israel modong’+ biro timo mana gik makare;+
Ok giniwach miriambo, kendo weche mag miriambo ok noyud e lewgi;
Gibiro chiemo kendo nindo ma onge ng’at ma bwogogi.”+
14 Kog gi mor, yaye nyar Sayun!
Kog gi mor, yaye Israel!+
Bed mamor kendo iil gi chunyi duto, yaye nyar Jerusalem!+
15 Jehova osegolo bura ma nong’adoni.+
Oseriembo jasiki.+
Jehova, Ruodh Israel nie kindu.+
Ok ubi luoro masira moro amora kendo.+
16 Chieng’no, ibiro wach ne Jerusalem niya:
“Kik iluor, yaye Sayun.+
Lweti kik ol.
17 Jehova Nyasachu nie kindu.+
Obiro resi mana ka Ng’at ma ratego.
Nobed mamor ahinya nikech in.+
Chunye biro kuwe mos nikech oheri.
Obiro kok gi mor nikech in.
18 Abiro choko jo ma okuyo nikech ne ok gibiro e sewni magu;+
Ne ok gibiro nikech wich-kuot ma ne gin godo.+
19 Neuru! E ndalogo, abiro kumo jo ma sandou;+
Abiro reso jo ma wuotho ka ling’o,+
Kendo abiro choko ji duto moke.+
Abiro miyogi huma* kod pak
E pinje duto ma ne giyudoe wich-kuot.
20 E ndalogo, abiro rwakou iye,
E ndalogo, abiro chokou kanyachiel.