Mokwongo ne Jo-Korintho

5 Wachore ni nitie tim terruok*+ e kindu, kendo en kit terruok* ma ok yudre kata mana e kind ogendni⁠—⁠ni ng’at moro odak gi chi wuon mare.+ 2 Dibed ni usungoru nikech wachno? Donge ber moloyo ka uwinjo malit,+ mondo ng’at motimo timno ogol oa e kindu?+ 3 Kata obedo ni aonge kodu e ringruok, chunya ni kodu, kendo aseng’ado bura ne ng’at motimo timno, ka gima an kodu kanyo. 4 Sa ma uchokoru kanyachiel e nying Ruodhwa Yesu, kendo ung’eyo ni chunya kaachiel gi teko mar Ruodhwa Yesu ni kodu, 5 onego uchiw ng’at ma kamano e lwet Satan+ mondo oketh chuny marach mar ringruokno, mondo ores chuny e odiechieng Ruoth.+

6 Pakruokuno ok en gima ber. Koso ok ung’eyo ni thowi manok yienyo mogo duto?+ 7 Goluru thowi machon oko, mondo ubed mogo modwal manyien, nikech adier uonge thowi e iu. Nimar, osechiw Kristo nyarombowa mar Pasaka+ kaka misango.+ 8 Omiyo, kare watimuru sawo,+ ok gi thowi machon, bende ok gi thowi mochung’ ne richo kod timbe maricho, to watime gi makate ma ok oketie thowi mochung’ ne chuny matir kod adiera.

9 E barua ma ne andikonu, ne awachonu ni uwe bedo kanyachiel gi joterruok,* 10 to ok ni kik uriwru chutho gi joterruok* mag pinyni,+ kata gi jo ma igi lach, kata gi jomecho, kata gi jo ma lamo sanamu. Nono to mano nyalo dwaro ni uwuog ua e piny.+ 11 To koro andikonu ni uwe bedo kanyachiel+ gi ng’at moro amora miluongo ni owadwa to en jaterruok,* kata ng’at ma iye lach,+ kata ng’at ma lamo sanamu, kata jayenyo, kata jamer,+ kata jamecho;+ kik uchiem kata gi ng’at ma kamano. 12 Nimar be en tichna ng’ado bura ne jo ma ni oko mar kanyakla? Donge onego ung’ad bura ne jo ma ni iye, 13 ka Nyasaye to ng’ado bura ne jo ma ni oko?+ “Goluru ng’at marachno e kindu.”+