Tich Joote
24 Ndalo abich bang’e, Anania jadolo maduong’+ ne olor kuno gi jodongo moko kod jal ma nyinge Tertulo ma ne wuoyo e lo oganda,* mi ne gidonjo ne Paulo ir gavana.+ 2 Kane oluonge, Tertulo nochako donjone kowacho niya:
“Nimar sani wan gi kuwe mogundho kokalo kuomi, kendo lokruok timore e kind ogandani nikech riekoni, 3 bende, wamor ahinya gi wechego kinde duto kendo kuonde duto, A Feliks, in moluor moloyo. 4 To mondo kik amed kethoni seche, asayi ni iwinjwae machuok kuom ng’wononi. 5 Nimar wasenwang’o ni ng’atni en jakel koko+ kendo omiyo Jo-Yahudi duto manie piny mangima ng’anyo ne sirkal,+ kendo otelo ne kidieny moro mar din mar Jo-Nazareth.+ 6 Bende, notemo dwanyo hekalu, omiyo ne wamake.+ 7 *— 8 Ka in iwuon inone, ibiro ng’eyo adiera mar wechego duto ma wadonjonego.”
9 Eka Jo-Yahudi bende ne oriwore kode e donjo ne Paulo ka giramo ni wechego ne gin adier. 10 Ka gavana nogwelo Paulo mondo owuo, Paulo nowacho kama:
“Nikech ang’eyo maber ni isebedo jang’ad bura mar ogandani kuom higni mogwaro, aikora chiwo dwoko ma kora kuom wachni.+ 11 Mana kaka in iwuon inyalo nono mondo ing’e, ndalo 12 pok okalo nyaka ne adhi Jerusalem mondo alem;+ 12 to ne giyuda ka ok amin wach gi ng’ato ang’ata ei hekalu, kendo ne ok athuw oganda mondo obed gi koko, kata e sunagogi, kata e taon mangima. 13 Bende, ok ginyal siro weche ma gidonjonago kuomi sani. 14 Kata kamano, nitie gimoro ma daher yiego, ma en ni, an atiyo ne Nyasach kwerena+ kaluwore gi kit lamo ma giluongo ni kidieny mar dinno, nimar ayie kuom weche duto manie Chik kod mondik e weche Jonabi.+ 15 Kendo an gi geno kuom Nyasaye, ma en geno ma gin bende giyiego, ni chier+ nobedie mar jo ma kare gi jo ma ok kare.+ 16 Mano e momiyo kinde duto atemo matek mondo asik ka an gi chuny maler ma onge bura e nyim Nyasaye kod dhano.+ 17 Koro bang’ higni moko mogwaro, ne abiro mondo akel ne ogandawa mich mag konyo jochan,+ kendo mondo agol chiwo mag misango. 18 Ka noyudo atimo gigo, ne ginwang’a e hekalu ka bende aler kaluwore gi chik,+ to ne ok an gi oganda mar ji, kendo onge kata koko ma ne akelo. To kanyo ne nitie Jo-Yahudi moko moa e alwora mar Asia 19 ma ne onego obed ni gin e nyimi kae mondo gidonjna, ka di po ni adier gin gi wach moro koda.+ 20 Kata we jo ma ni kae mondo owach giwegi gima rach ma ne giyudo kuoma kane achung’ e nyim buch Sanhedrin, 21 ka ok en mana nikech gimoro achiel ma ne awacho sa ma ne achung’ e diergi niya: ‘Wach chier mar jo motho e momiyo sani ing’adona bura!’”+
22 Kata kamano, nikech Feliks nong’eyo e yo malong’o weche motudore gi Yorno,*+ nochoro wachgino nyime, kowachonegi kama: “Sa asaya ma Lusio jatend-jolweny maduong’* olor kae, eka abiro ng’ado wecheugi.” 23 Eka nochiko jatend-jolweny* ni mondo oket Paulo e bwo tuech to ma ok oridne ahinya, kendo mondo kik ogeng’ joge mobiro konye kuom gik mochando.
24 Ndalo moko bang’e, Feliks nobiro ka en gi Drusila chiege, ma ne en nya Jo-Yahudi, kae to nooro wach mondo okel Paulo, mi nowinje kowuoyo e wi yiene kuom Kristo Yesu.+ 25 To sa ma Paulo ne wuoyo kuom wach tim makare, gi ritruok, kod wach chieng’ bura ma biro,+ luoro nomako Feliks mi nowachone niya: “Koro sani inyalo dhi, to ka anwang’o thuolo moro, abiro luongi kendo.” 26 Gie kindeno bende, noparo ni Paulo ne dhi miye pesa. Kuom mano, ne ojaluongo Paulo ding’eny mondo owuo kode. 27 To ka higni ariyo noserumo, Porkio Festo nochako locho kar Feliks; to nikech Feliks ne dwaro moro Jo-Yahudi,+ noweyo Paulo e od tuech.