Weche mag Ndalo Mokwongo
28 Daudi nochoko jodong Israel duto Jerusalem. Nochoko jodongo mag anyuola, jotelo mag grube+ ma ne tiyo ne ruoth, jotelo e wi ji aluf achiel-achiel kod ji mia-mia,+ jotelo ma ne ochung’ ne mwandu duto gi jamni mag ruoth+ kod mag yawuote,+ kaachiel gi jodong dala ruoth, kod ji duto maroteke kendo molony.+ 2 Eka Ruoth Daudi nochung’ mi owacho niya:
“Winjauru un owetena kendo joga. Chunya ne gombo gero ot mondo obed ka ma iketoe sandug singruok mar Jehova kendo obed kaka raten mar tiend Nyasachwa.+ Ne aiko gik migerogo odno.+ 3 Kata kamano, Nyasaye madier ne owacho kama: ‘In ok ibi gero ot ne nyinga+ nikech in ng’at lweny kendo isechuero remo.’+ 4 Kata kamano, Jehova Nyasach Israel noyiera kuom jood wuora duto mondo abed ruodh Israel nyaka chieng’,+ nimar noyiero Juda mondo obed jatelo+ kendo kuom joka Juda, od wuora+ e ma ne oyier, to kuom yawuot wuora, an e ma ne oyiera mondo oketa abed ruoth e wi Israel duto.+ 5 To kuom yawuota duto, nimar Jehova oseguedha gi nyithindo mang’eny,+ Nyasaye noyiero Solomon wuoda+ mondo obed e kom-loch mar Jehova mondo oloch e wi Israel.+
6 “Nowachona kama: ‘Solomon wuodi e ma nogerna ot kod laru maga, nimar aseyiere mondo obed wuoda, to an abed wuon mare.+ 7 Anagur pinyruodhe nyaka chieng’+ to mana ka odhi nyime mako chikena kod buchena motegno,+ mana kaka otimo sani.’ 8 Koro awacho e wang’ Jo-Israel duto, e nyim kanyakla mar Jehova, kendo e it Nyasachwa kama: Luwuru adimba chike duto mag Jehova Nyasachu kendo unon-gi mondo udag e piny maberni+ kendo umiye nyithindu mondo obed pinygi nyaka chieng’.
9 “To koro in Solomon wuoda, ng’e Nyasach wuonu kendo itine gi chunyi duto kimor.+ Nimar Jehova nono chuny ji duto,+ kendo ofwenyo paro duto ma gin-go.+ Ka imanye, to ibiro yude,+ to ka iweye, obiro jwang’i nyaka chieng’.+ 10 Ng’e ni Jehova oseyieri mondo iger ot* moyangne. Bed jachir kendo chak tich.”
11 Daudi nomiyo Solomon wuode goro ma nyiso kaka onego oger+ agola+ kod utene, kuondene mag keno, utene ma malo, utene ma iye, kod ot mar loso winjruok.+ 12 Nomiye goro ma nyiso kaka onego olos gik moko duto mana kaka Nyasaye ne onyise e fweny. Nomiye goro manyiso laru+ mag od Jehova, gi ute chiemo duto molwore, gi kuonde keno mag od Nyasaye, gi kuonde keno mag gik mowal.+ 13 Bende, ne onyise kaka onego opog grube mag jodolo+ gi mag Jo-Lawi, kendo kaka onego opog tije mag od Jehova, kod gik moko duto ma ibiro tigo e od Jehova. 14 Bende, ne onyise pek mar dhahabu ma ibiro tigo e loso gik moko duto mibiro tigo e od Nyasaye, pek mag gik fedha duto ma ibiro tigo tije mopogore opogore e od Nyasaye. 15 Nonyise bende pek mar gik chungo taya mopogore opogore molos gi dhahabu+ kod teyinigi, kod pek mar gik chungo taya mopogore opogore molos gi fedha kod teyinigi. 16 Nonyise bende pek mar dhahabu mar moro ka moro kuom mesni mag makate miketo e nyim Nyasaye,+ kod pek mar fedha milosogo mesni mag fedha, 17 kod uma, gi bakunde, kod njagi mag dhahabu lilo, gi pek mag bakunde matindo mopogore opogore molos gi dhahabu,+ kod bakunde matindo mopogore opogore molos gi fedha. 18 Bende, ne onyise pek mag dhahabu maler milosogo kendo mag ubani+ kod ma ne idhi losgo kido mar gari,+ gi jokerubi+ ma oyaro buombegi e wi sandug singruok mar Jehova. 19 Daudi ne owacho niya: “Jehova ne otaya kendo ne omiya rieko mi agoro weche duto mag odni.”+
20 Eka Daudi nonyiso Solomon wuode kama: “Bed gi chir kendo gi teko kendo chak tich. Kik iluor kendo kibaji kik goyi, nimar Jehova Nyasacha ni kodi.+ Ok obi weyi kendo ok obi jwang’i,+ to obiro bedo kodi nyaka tije duto mag od Jehova rum. 21 Grube mag jodolo+ kod Jo-Lawi+ monego oti e od Nyasaye ni ka, kendo in gi jo ma olony e kit tije duto+ kendo moikore ne tich. Bende in gi jodongo+ kod ji duto ma biro timo kaka ichikogi.”