Ruth
2 Naomi ne nigi watne moro ma ja dhoodgi Elimelek. Ng’atno ne nyinge Boaz,+ kendo ne omewo ahinya.
2 Ruth Nya-Moab nowachone Naomi niya: “We adhi ahul+ shairi bang’ jokeyo ma biro yiena hulo e puothe ma gikeyoe.” Eka Naomi nowachone niya: “Dhi adhiya nyara.” 3 Omiyo, ne owuok modhi hulo shairi e puodho bang’ jokeyo. Eka nopo kochopo e puoth Boaz+ ja dhoodgi Elimelek.+ 4 Matin nono, Boaz nobiro e puothe koa Bethlehem, momoso jokeyo niya: “Jehova mondo obed kodu.” To ne gidwoke niya: “Jehova mondo oguedhi.”
5 Eka Boaz nopenjo jatichne mochung’ ne jokeyo niya: “Macha en nyar ng’a?” 6 Jatichneno nodwoke niya: “En Nya-Moab+ ma noduogo gi Naomi koa e piny Moab.+ 7 Ne okwaya ni, ‘Asayi, yiena mondo adhi ahul+ shairi ma jokeyo oweyo.’* Osebedo kotiyo kae chakre okinyi, kendo eka oa dhi yueyo mana matin e kiru.”
8 Eka Boaz nowacho ne Ruth niya: “Iwinjo nyara, kik ihul e puoth ng’at machielo, bende kik ia ka. To bed abeda kae gi jotichna ma nyiri.+ 9 Ket wang’i mana e puodho ma gikeyoe, kendo ihul bang’gi. Asekwero yawuoyi ni kik gichandi. Ka riyo oloyi to idhi itwom pi ma jotichna oseolo e dapi mondo imodhi.”
10 Ruth nogoyo chonge piny, mokulore piny auma kowachone niya: “Ang’o momiyo idewa kendo ikecha kama kata obedo ni an mana wendo?”+ 11 Boaz nodwoke niya: “Osenyisa adimba gik moko duto misetimo ne Naomi nyaka ne jaodi tho, kendo kaka ne iweyo wuonu gi minu kaachiel gi pinyu, mibiro dak e kind jo ma ne ok ing’eyo.+ 12 Mad Jehova guedhi nikech gik moko duto misetimo,+ kendo iyud pok makare moa kuom Jehova Nyasach Israel, ma isebiro e bwo buombene mondo iyud kar bwok.”+ 13 To Ruth nowachone niya: “Isehoyo chunya kendo isewuoyo maber kata obedo ni ok an jatichni. Mad amed yudo ng’wono e wang’i ruodha.”
14 Ka ne sa chiemo ochopo, Boaz nowacho ne Ruth niya: “Bi ikaw makate ilut e divai mawach mondo icham.” Omiyo, Ruth nodhi mobet piny but jokeyo. Kae to bang’e, Boaz nomiye shairi mobul mochamo moyieng’ ma moko odong’. 15 Ka ne Ruth owuok mondo odhi ohul+ shairi, Boaz nochiko jotichne niya: “Weyeuru mondo ohul,* kik uchande.+ 16 Bende, ugol moko kuom shairi musechoko mondo uwene ohul. Kendo kik utame.”
17 Kamano ne ohulo nyaka godhiambo.+ Eka nodino shairi ma nosehulogo, mi giromo efa achiel* kama. 18 Bang’ mano, noting’o shairigo modhigo e dala maduong’, monyiso Naomi kar rombgi. Bende, Ruth nogolone chiemo ma nochamo modong’,+ momiye.
19 Min chwore nopenje kama: “Nihulo kanye kawuono? Nitiyo kure? Oguedh jalo ma ne okechi.”+ Mi Ruth nonyise ng’at ma notiyo e puothe kowacho niya: “Kawuono natiyo e puoth jal moro ma nyinge Boaz.” 20 Naomi nowacho ne chi wuode niya: “Jehova mondo oguedh jalo, nimar pok oweyo nyiso herane mosiko ne jo mangima kod jo motho.”+ Nomedo wacho kama: “Ng’atno en watwa.+ En achiel kuom wedewa ma nigi ratiro mar warowa.”+ 21 Eka Ruth Nya-Moab nowacho niya: “Bende, ne onyisa ni ati but jotichne nyaka chieng’ ma ginitiek kayo shairi duto.”+ 22 Naomi nonyiso chi wuode ma Ruth niya: “Nyara, ber ka itiyo gi jotichne ma nyiri, nono to ibiro chandi e puoth ng’at machielo.”
23 Omiyo, Ruth notiyo gi jotich Boaz ma nyiri, kendo nohulo shairi+ gi ngano nyaka giko keyo kodak gi min chwore.+