Jeremia
30 Wach Jehova nobiro ne Jeremia niya: 2 “Ma e gima Jehova Nyasach Israel owacho, ‘Ndik weche duto ma awachoni e buk. 3 Nimar, “neuru! ndalo biro,” Jehova owacho, “ma abiro chokoe joga ma Jo-Israel kod Jo-Juda+ ma noter e tuech,” Jehova owacho, “kendo anaduokgi e piny ma ne amiyo kweregi, mi gibiro dak e pinyno kendo.”’”+
4 Magi e weche ma Jehova ne owacho ne Jo-Israel kod Jo-Juda.
5 Jehova owacho niya:
“Wasewinjo dwond jo ma tetni;
Luoro omako ji, kendo onge kuwe.
6 Penjuru mondo ung’e ka be muoch nyalo kayo dichwo.
To kara ang’o momiyo aneno ka jo ma roteke duto omako iyegi
Mana ka mon ma muoch kayo?+
Ang’o momiyo ng’ato ka ng’ato okuyo?
7 Yaye! Odiechiengno nobed odiechieng’ marach ahinya.+
Onge machal kode,
En kinde malit ne Jakobo.
Kata kamano, ibiro rese.”
8 “E odiechiengno,” Jehova Nyasach oganda lweny owacho, “abiro turo jok manie ng’uti, kendo abiro chodo tonde motueyigo diriyo; jopinje mamoko ok nochak oloke misumba kendo. 9 Gibiro tiyo ne Jehova Nyasachgi, kod Daudi ma abiro keto mondo obed ruodhgi.”+
10 “To in, jatichna Jakobo, kik iluor,” Jehova owacho,
“Kik ing’eng’, yaye Israel.+
Nimar abiro resi e piny mabor
Kendo anagol kothi e piny motuegie.+
Jakobo biro duogo, obiro bedo gi kuwe, onge gima biro chande,
Onge ng’at ma biro bwogogi.”+
11 “An kodi mondo aresi,” Jehova owacho.
12 Ma e gima Jehova owacho:
“Onge yath ma nyalo chango tuo ma in-go.+
Adhola ma in-go ok nyal thiedhi.
13 Onge ng’at ma nyalo sayoni,
Onge yo minyalo thiedhgo adhola ma in-go.
Onge yath ma nyalo changi.
14 Joherani duto ok pari.+
Tinde ok gimanyi.
Nikech asechwadi gi chwat jasigu,+
Kendo gi chwat mar ng’at ma kwiny,
Nikech isetimo richo maduong’ kendo kethoni ng’eny.+
15 Ang’o momiyo iywak nikech tuonino?
Rem miwinjo ok nyal chango!
Nikech kethoni duong’ kendo richoni ng’eny+
E momiyo asetimoni kamano.
Jogo ma yako mwanduni, ibiro yaki,
Kendo abiro chiwo ji duto ma mayou giu e lwet jomecho.”+
17 “Kata obedo ni giluongi ni ng’at mojwang’:
‘Sayun, ma onge ng’ato ang’ata ma paro,’+
Abiro miyo ibed mangima, kendo abiro chango adhondeni,”+ Jehova owacho.
18 Ma e gima Jehova wacho:
“Abiro e hema mar Jakobo,+ mondo achok jo ma noter e tuech,
Abiro kecho ka ma yande gidakie.
Dalano ibiro ger e got ma yande entie,+
Kendo ohinga mochiel motegno biro chung’ kare machon.
19 Jo modak e iye nower wende mag erokamano, kendo gibiro kok gimor,+
Anami gimedre, kendo ok ginibed manok;+
Anami gimedre ameda,*
Kendo onge ng’at ma biro chayogi.+
20 Nyithinde nobed kaka chon,
Kendo chokruokne biro gurore motegno e nyima.+
Abiro kumo ji duto ma sandogi.+
21 Ng’at ma rahuma noa e kindgi,
Kendo ruoth noa e diergi.
Abiro miyo osud machiegni koda, mi nobi ira.”
“Nimar, en ng’ano ma dihedhre sudo buta?” Jehova owacho.
22 “Unubed joga,+ kendo anabed Nyasachu.”+
23 Neuru! mirimb Jehova biro kutho matek mana ka ahiti;+
Mana ka kalausi mager ma kutho e wi jo maricho.
24 Mirima mager mar Jehova ok bi kuwe
Nyaka chop otim gik ma chunye oseng’ado.+
E ndalo mag giko, unuwinj tiend wachni.+