Tich Joote

27 Koro ka noseng’ad wach ni wakwang’ gi meli nyaka Italia,+ ne giketo Paulo kod jomamoko motue e lwet jatend-jolweny* ma nyinge Julio, ma notelo ne kidieny mar Augusto. 2 Bang’ idho meli ma nowuok Adramutio kendo ma ne chiegni dhi e wedhe mag alwora mar Asia, ne wachako wuodhwa. Aristarko+ ma Ja-Makedonia ma noa Thesalonika ne ni kodwa. 3 Kinyne ne wagowo Sidon, to Julio notimo ne Paulo tim ng’wono kuom yiene odhi ir osiepene mondo gikonye.

4 Ka ne waa kanyo, ne wakwang’ ka wakalo e tiend chula mar Saipras mondo chulano ogeng’nwa yamo ma ne ochomowa tir. 5 Eka ne wakwang’ e chuny nam ka wakalo e bath Kilikia gi Pamfulia kae to ne wagowo e wath man Mura e piny Lukia. 6 Kanyo jatend-jolweny* noyudo meli moro moa Aleksandria ka dhi Italia, mi noketowa e iye. 7 Ne wakwang’ mos kuom ndalo moko mogwaro ka wachandore nyaka ne wachopo Kanido. Nikech yamo ne ok oyienwa dhi nyime, ne wakwang’ ka wageng’ore e tiend chula mar Krete ka wakadho Salmone. 8 Eka bang’ kwang’ e tiend chulano ka wachandore, ne wachopo kama iluongo ni Mbita Mokuwe, ma ne en kama chiegni gi dala mar Lasea.

9 Kinde mogwaro nosekalo, kendo kwang’o meli koro ne nyalo kelo masira. To nikech kata Odiechieng Pwodho Ji,+ ma ji ne tueyoe chiemo bende nosekalo, Paulo nong’ado ne ji rieko 10 niya: “Jowetena, aneno ni wuodhni dhi kelo masira maduong’, ok mana ne osike gi meli kende, to kata mana ngimawa bende.” 11 Kata kamano, jatend-jolweny* noluwo wach jachik meli kod mar wuon melino kar winjo gima Paulo nowacho. 12 Nikech bet e wadhno ndalo koyo ne ok ber, thoth ji nowacho ni wawuog kanyo kendo watem mondo koyono oyudwa Foiniks ma ne en wath moro man Krete ma nigi kuonde ariyo midonjogo, achiel yo nyandwat to machielo yo milambo.

13 Ka yamo mowuok milambo ne kudho mos, ne giparo ni ne ginyalo chopo kama ne gidhiye. Omiyo, ne gipudho nanga ma nochungo meli, mi ne gichako kwang’o meli ka gikalo e bath Krete machiegni gi dho wath. 14 Kata kamano, bang’ dhi matin nono, yamo moro mager miluongo ni Yurakulo nochako goyo meli. 15 To nikech yamono ne yiengo meli matek ahinya ma meli ne ok nyal mwome, ne waweyo yamono oterowa atera. 16 Kae to ne wachopo kama chula moro matin miluongo ni Kauda ne nyalo geng’onwae yamono, to e ma pod kawo yie matin ma ne otue chien e melino ne tek ahinya. 17 To bang’ ting’e mi girwake e meli, ne gichako tueyo melino gi tonde molwore mondo kik obarre, to nikech ne giluor ni ginyalo moko kama thanythany e Sirti,* ne giloro tanga mi yamo noterogi. 18 Nikech yamo mager ne terowa koni gi koni, kinyne ne gichako golo gik moko mondo meli obed mayot. 19 To e ndalo mar adek, ne giwito tonde mag nanga kod gige chiko meli.

20 Ka ndalo mogwaro ne osekalo ka pok waneno wang’-chieng’ kata sulwe kendo yamo mager bende ne medo goyowa, chunywa notho. 21 Nikech ndalo mogwaro nosekalo ka pok ji ochiemo, Paulo ne ochung’ e diergi mowachonegi kama: “Jowetena, ka dine uwinjo paro ma ne ang’adonu ni kik ukwang’ meli ua Krete, dikoro ok wayudo masira kod chandruok ma kama.+ 22 Kata kamano, koro akwayou ni ubed mamor, nimar onge kata ng’ato achiel ma biro lal, mak mana meli. 23 E otienoni, malaika+ mar Nyasaye ma an ng’ate kendo ma atiyone, ne obiro mochung’ buta 24 mowachona niya: ‘Kik iluor, Paulo. Nyaka ibi ichung’ e nyim Kaisar,+ kendo ne! kuom ng’wonone, Nyasaye biro reso ji duto ma in-go e meli nikech in.’ 25 Omiyo, beduru gi chir jowetena, nimar ayie kuom Nyasaye ni gigo biro timore mana kaka nosewachna. 26 Kata kamano, yamo nyaka terwa mi wamok e chula moro.”+

27 Koro ka nochopo otieno mar 14 kendo yamo ne yukowa koni gi koni e Nam Adria, e dier otieno, jokwang’ meli nochako fwenyo ni gin machiegni gi dho wath. 28 Ne gipimo tut mar kanyo mi giyudo ka en mita ma dirom 36,* kendo ne gimedo sudo matin kae to ne gipimo mi giyudo ka tutne en mita ma dirom 27.* 29 To nikech ne giluor ni ginyalo moko e lwendni, ne gibolo nanga ang’wen mag chungo meli ka gin yo ka chien e meli, kendo ne gichako gombo mondo piny oru. 30 To ka jokwang’ meli nochako manyo kaka ne ginyalo ringo gia e melino, ne giloro yie matin e nam ka giwuondore ni ne gidwaro bolo nanga mag chungo melino gi ka nyime. 31 To Paulo nowacho ne jatend-jolweny* kod askeche niya: “Ok nyal res ngimau mak mana ka jogi odong’ e meli kae.”+ 32 Eka askechego nong’ado tonde mag yie matinno mi ne giweye mondo olwar.

33 Koro ka piny ne chiegni ru, Paulo nojiwo ji duto mondo gichamie gimoro kowachonegi kama: “Kawuono en ndalo mar 14 ma userito, kendo usebedo ka ok ucham gimoro kata matin. 34 Omiyo, ajiwou mondo uchamie gimoro; nikech mano biro konyou, nimar onge ng’ato kuomu ma biro lalo kata mana yie wiye achiel.” 35 Bang’ wacho mano, nokawo makate, mi nogoyo ne Nyasaye erokamano e nyimgi giduto, kae to nong’ingo, mi nochako chiemo. 36 Eka giduto ne gibedo gi chir mi ne gichako chiemo. 37 Koro waduto ne wan ji 276 e melino. 38 Ka ne gisechiemo mi giyieng’, ne gichako wito ngano e nam mondo meli obed mayot.+

39 Ka piny ne oru, ne ok ginyal fwenyo piny ma ne gintie,+ to gima ne ginyalo neno en mana kamoro ma nigi wath. Omiyo, ne ging’ado ni kanyo e ma ne gidhi gowoe meli ka nyalore. 40 Kuom mano, ne ging’ado nanga mag chungo meli kendo ne giweyogi mi gilwar e nam, ka gie kindeno bende ne gigonyo tonde momako ngayi. Bang’ ng’awo tanga matin manie nyim meli, ne gichomo wadhno. 41 Ka ne gichopo kama kuoyo ochokoree mang’eny, meli notuomo kuoyo kendo yo ka wiye ne omoko ma ok yiengni. Kata kamano apaka mager nochako baro melino gi yo ka ng’eye matindo-tindo.+ 42 Nikech mano, askeche nong’ado mar nego jo ma otue mondo kik ng’ato kuomgi ogo abal kendo otony. 43 Jatend-jolwenygo* ne dwaro ni Paulo ochop ka ngima, omiyo nogeng’ogi mondo kik gitim kamano. Nochiko jo ma ne nyalo goyo abal mondo gichikre ei nam kendo gikwang’ nyaka e dho wath. 44 Eka jo ma ne odong’ ne onego oluw bang’gi ka jomoko omako bepe, to mamoko omako gik ma nobarore e meli. Kuom mano, ji duto nochopo ka ngima e dho wath.+