Jeremia

25 Wach ma ne obiro ne Jeremia e wi Jo-Juda e higa mar ang’wen mar loch Jehoyakim+ wuod Josia ruodh Juda. Mano bende e higa mokwongo mar loch Nebukadnezar* ruodh Babulon. 2 Ma e gima janabi Jeremia nonyiso Jo-Juda kod ji duto ma ne odak Jerusalem:

3 “Kuom higni 23, chakre higa mar 13 mar loch Josia+ wuod Amon ruodh Juda nyaka kawuononi, Jehova osebedo ka wuoyo koda, kendo asebedo ka anyisou wechene nyadinwoya, to ok uwinji.+ 4 Jehova ne ooronu jotichne duto ma jonabi nyadinwoya, to ne utamoru winjogi kata chikonegi itu.+ 5 Ne ginyisou ni, ‘Lokreuru uwe yoreu maricho kod timbeu maricho;+ eka unudhi nyime dak e piny ma Jehova ne omiyo kwereu e ndalo machon. 6 Kik uti ne nyiseche mamoko, kendo kik ukulrenegi. Kik uwang’ iya gi gik muloso gi lwetu; nono to abiro kelonu masira.’

7 “‘To ne udagi winjo wachna,’ Jehova owacho. ‘Ne uwang’o iya gi gik ma ne uloso gi lweteu, mi masira oyudou.’+

8 “Kuom mano, ma e gima Jehova Nyasach oganda lweny owacho, ‘“Nikech ne udagi winjo wechena, 9 anakel ogendni duto moa yo nyandwat,”+ Jehova owacho. “Anakel Nebukadnezar* ruodh Babulon ma jatichna.+ Anakelgi mondo giked gi pinyni,+ gi jo ma odak e iye, gi ogendni duto mokiewo kode.+ Anatiekgi chuth, kendo jo ma biro nenogi biro bwok, mi giniwuor ka giliyo. 10 Abiro tieko mor gi ilo duto,+ kendo ok nochak owinj dwond miaha kod wuon kisera.+ Pong’ ok bi rego, kendo taya ok bi liel. 11 Pinyni duto biro dong’ gunda, kendo jo ma biro nene biro bwok. Ogendnigi duto biro tiyo ne ruodh Babulon kuom higni 70.”’+

12 “‘Bang’ higni 70,+ abiro kumo ruodh Babulon kod ogandane nikech richogi,’+ Jehova owacho, ‘kendo abiro ketho piny Jo-Kaldea mi enodong’ gunda nyaka chieng’.+ 13 Abiro kelo ne pinyno kum duto ma ne asewacho ni abiro kelonegi, gik moko duto mondik e bugni, ma Jeremia osekoro e wi ogendni duto. 14 Nimar ruodhi madongo kod ogendni+ biro lokogi wasumbni,+ kendo abiro kumogi kaluwore gi timbegi kod tich lwetegi.’”+

15 Ma e gima Jehova Nyasach Israel nowachona: “Ma okombe moting’o divai mar mirimba. Kawe imi ogendni duto ma aori irgi mondo gimadhe. 16 Ka gisemadhe gibiro kwang’ kendo neko nomakgi nikech ligangla ma aoro e kindgi.”+

17 Omiyo, ne akawo okombeno e lwet Jehova, mi amiyo ogendni duto ma Jehova ne oora irgi mondo gimadhi:+ 18 nachako gi Jerusalem kod mier mag Juda,+ ruodhige kod jotende, mondo okethgi. Ji biro bwok kendo liyo konenogi, kendo ginibed jo ma okuong’,+ mana kaka kawuononi; 19 eka Farao ruodh Misri gi jotichne, gi jotende, gi joge duto,+ 20 kaachiel gi ogendni mokikore modak e pinygi; ruodhi duto mag piny Uz; ruodhi duto mag piny Filistia,+ Ashkelon,+ Gaza, Ekron, gi Jo-Ashdod modong’; 21 Edom,+ Moab,+ gi Jo-Amon;+ 22 ruodhi duto mag Turo, ruodhi duto mag Sidon,+ kod ruodhi mag chulni; 23 Dedan,+ Tema, Buz, kod jogo duto motito yie wigi;+ 24 ruodhi duto mag piny Arabia+ kod ruodhi duto ma locho e wi ogendni mokikore modak e thim; 25 ruodhi duto mag Zimri, gi Elam,+ gi Media;+ 26 kod ruodhi duto mag pinje ma yo nyandwat man machiegni kata mabor, kaachiel gi pinjeruodhi duto manie piny biro madho okombeno, moro bang’ nyawadgi; kendo ruodh Sheshak*+ biro madhe bang’gi.

27 “Kendo iniwachnegi ni, ‘Ma e gima Jehova Nyasach oganda lweny, Nyasach Israel owacho: “Methuru umer, ung’og mi upodh piny mi chop ka ma ok unyal chung’+ nikech ligangla ma aoronu.”’ 28 To ka gitamore kawo okombeno e lweti mondo gimadhi, to inyisgi ni, ‘Ma e gima Jehova Nyasach oganda lweny owacho: “Nyaka to umadhe! 29 Nimar neuru! ka abiro kumo dala miluongo gi nyingani+ mokwongo, be dawe ma ok akumou?”’+

“‘Ok abi weyo ma ok akumou, nimar abiro kelo ligangla kuom ji duto modak e piny,’ Jehova Nyasach oganda lweny owacho.

Obiro ruto matek komon gi kare mar dak.

En owuon e mobiro ng’ado bura ne dhano duto.+

Obiro tieko joricho gi ligangla,’ Jehova owacho.

32 Ma e gima Jehova Nyasach oganda lweny owacho:

33 “‘Chieng’no ringre jo ma Jehova onego biro kere chakre tung’ piny konchiel nyaka komachielo. Ok bi ywaggi, ok bi chokgi, kendo ok bi yikgi. Ginichal ka manyiwa e lowo.’

34 Gouru nduru un jokwath, ywaguru matek!