Jeremia
11 Ma e wach Jehova ma nobiro ne Jeremia: 2 “Winjuru weche mag singruogni!
“Wach wechegi* ne Jo-Juda kod jo modak Jerusalem. 3 Iniwachnegi ni, ‘Ma e gima Jehova Nyasach Israel owacho: “Okuong’ ng’ato ang’ata modagi winjo weche mag singruok,+ 4 ma ne atimo gi kwereu ka ne agologi e piny Misri,+ mondo gia e sand mager.*+ Ne awachonegi ni, ‘Winjuru dwonda, kendo utim gik moko duto ma achikou; eka unubed joga kendo anabed Nyasachu,+ 5 mi anachop singruok ma ne atimo gi kwereu ka ne asingonegi ni anamigi piny mopong’ gi chak kod mor kich,+ kaka osebet kawuononi.’”’”
Eka ne adwoko niya: “A Jehova, obed mana kamano.”*
6 Kendo Jehova nowachona niya: “Land wechego e mier mag Juda kendo e nderni mag Jerusalem, kiwacho niya: ‘Winjuru weche mag singruogni kendo utimgi. 7 Nimar chakre chieng’ ma ne agolo kwereu e piny Misri nyaka kawuononi, asebedo ka asiemogi matek niya: “Winjuru dwonda.”+ 8 To ne ok giwinja kata chikona itgi; kar mano, ne gidhi nyime luwo chunygi mopong’ gi richo.+ Omiyo, ne akelonegi kum duto ma singruogno nowacho nikech ne gidagi rito singruogno.’”
9 Eka Jehova ne owachona niya: “Jo-Juda kod jo modak Jerusalem chano kaka gibiro piem koda. 10 Gisedok e richo kweregi ma notamore winja.+ Bende, gilamo nyiseche mamoko kendo tiyonegi.+ Jo-Israel kod Jo-Juda oseketho singruok ma ne atimo gi kweregi.+ 11 E momiyo Jehova wacho ni, ‘Abiro kelonegi masira+ ma ok ginitonyie. To ka giywakna mondo akonygi, ok abi winjogi.+ 12 Eka jo modak e mier mag Juda kod Jerusalem biro ywak ne nyisechegi ma gisebedo ka gitimonegi misengni mondo okonygi,+ to nyisechego ok bi resogi e masirano. 13 Nikech nyisecheni ng’eny mana kaka miechi, yaye Juda. Iseloso kendo mag misengni mang’eny ma dirom gi nderni mag Jerusalem, mondo ichiw misengni ne Baal,+ nyasach wich-kuot.’
14 “To in,* kik ilem ne ogandani, kendo kik iywagna kata lemo e logi.+ Nimar ok abi winjogi sa ma giywakna ka masira oyudogi.
15 En ratiro mane ma jaherana nigo mar bedo e oda
Sa ma ji mang’eny osetimo gik maricho ma ne gichano?
Koso giparo ni ginyalo geng’o masira ma nobi kuomgi mana kuom wang’ona misengni maler e hekalu?
Be ubiro tony chieng’no?
16 Nitie kinde ma Jehova ne luongi ni yath zeituni moloth,
Ma nyago olembe mabeyo.
To sani osekudho mach ma kakni kuome,
Kendo giseturo bedene.
17 “Jehova Nyasach oganda lweny, Jachuoyo+ ma nopidhou mana kaka ng’ato pidho yath, oselando ni masira nobi kuomu nikech richo ma Jo-Israel gi Jo-Juda notimona ka ne gichiwo misengni ne Baal.”+
18 Jehova ne onyisa mondo ang’e;
E kindego ne imiyo aneno gik ma ne gitimo.
19 Ne achalo gi nyarombo mamuol ma isembo kitero kar yeng’o.
Ne ok ang’eyo ni ne gichanona gik maricho:+
“Wakethuru yath gi olembene,
Kendo wagole, mi kare olal nono e piny jo mangima,
Mondo kik chak par nyinge kendo.”
Mad ane ka ichulonegi kuor,
Nimar aseketo bucha e lweti.
21 Omiyo, ma e gima Jehova wacho kuom Jo-Anathoth+ ma dwaro negi, kendo ma kweri niya: “Kik ikor wach e nying Jehova,+ nono to wabiro negi”; 22 ma e gima Jehova Nyasach oganda lweny owacho: “Abiro kumogi. Yawuoyi biro tho tho ligangla,+ kendo kech noneg yawuotgi gi nyigi.+ 23 Onge kata ng’ato achiel kuomgi ma biro dong’, nikech anakel masira ne Jo-Anathoth+ e higa ma ibiro kumgie.”