Tich Joote
3 Koro Petro gi Johana ne dhi e hekalu e lemo ma sa ochiko odiechieng’, 2 kendo noyudo oting’ ng’at moro ma nosebedo puth chakre nyuolne. Ji ne ketega machiegni gi ranga hekalu miluongo ni Rangach Malong’o, mondo okwa mich mag konyo jochan kuom jo ma donjo e hekalu. 3 Ka noneno ka Petro gi Johana chiegni donjo e hekalu, nokwayogi mich. 4 To Petro gi Johana nong’iyo wang’e tir kendo ne giwachone niya: “Ng’iwa ane.” 5 Omiyo, nochomo wang’e kuomgi kogeno yudo gimoro. 6 To Petro nowachone kama: “Fedha gi dhahabu aongego, to adwaro miyi gima an-go. E nying Yesu Kristo Ja-Nazareth, chung’ mondo iwuothi!”+ 7 Eka nomako lwet ng’atno ma korachwich mi nochunge malo.+ Gikanyono, tiendene gi ombong’ne nobedo motegno;+ 8 mi nochikore mochako wuotho.+ Nodhi kodgi e hekalu kowuotho, kochikore, kendo kopako Nyasaye. 9 Ji duto ne onene kowuotho kendo kopako Nyasaye 10 mi ne gifwenyo ni en ng’at ma ne kuechoga kobet e Rangach Malong’o mar hekalu.+ Ne gihum nono nikech gima notimore ne ng’atno.
11 Sa ma ng’atno ne pod omako lwet Petro gi Johana, ji duto noringo nyaka irgi e Agoch* Solomon+ ka giwuoro ahinya. 12 Ka Petro noneno mano, nowacho ne ji niya: “Un Jo-Israel, marang’o uwuoro gima otimoreni, kendo marang’o ung’iyowa ahinya ka gima wamiyo ng’atni owuotho kuom tekowa wawegi kata nikech wan jo ma ochiwore ahinya ne Nyasaye? 13 Nyasach Ibrahim, gi Isaka, kod Jakobo,+ ma Nyasach kwerewa, osemiyo Jatichne+ Yesu+ duong’, jal ma ne uchiwo+ e lwet Pilato kendo ne ukwedo, kata obedo ni noseng’ado mar gonye. 14 Ne ukwedo jal maler kendo makareno, mi ne ukwayo mondo ogonynu ng’at ma ne en janek,+ 15 mi ne unego Jatelo Maduong’ moseket mondo ochiw ngima.+ Kata kamano, Nyasaye ne ochiere kendo wan joneno mag wachno.+ 16 Kokalo kuom nying Yesu, kendo nikech wayie kuom nyinge, ng’at ma sani uneno kendo ung’eyoni koro wuotho. Yie ma wan-go kuome osemiyo ng’atni ochango e nyimu duto. 17 Kuom mano, owetena, ang’eyo ni ne utimo mano nikech ne ukia,+ mana kaka jotendu bende ne kia.+ 18 To mano e yo ma Nyasaye osechopogo weche ma nokoro motelo gi dho jonabi duto ni Kristo ne dhi yudo sand.+
19 “Omiyo, lokuru chunyu,+ kendo uduog ir Nyasaye+ eka richou oruch,+ mondo Jehova* owuon omiu kinde mag yueyo 20 kendo mondo oornu Kristo moseketo, ma en Yesu. 21 Jalni nyaka rit mondi e polo nyaka chop kindego mar duoko gik moko duto obed kaka ne gin, ma Nyasaye nowacho kokalo kuom dho jonabine maler mag ndalo machon. 22 Kuom adier, Musa nowacho kama: ‘Jehova* Nyasachu biro yiero janabi moro machal koda kuom oweteu.+ Ne ni uwinjo gimoro amora mowachonu.+ 23 Kuom adier, ng’at ma odagi winjo Janabino, ibiro keth chuth oa e oganda.’+ 24 To jonabi duto kochakore gi Samuel kod jo ma noluwo bang’e nokoro ayanga gik ma timore kindewagi.+ 25 Un e nyithind jonabi kendo un e weg singruok ma Nyasaye notimo gi kwereu+ ka nowacho ne Ibrahim niya: ‘Dhoudi duto mag piny ibiro guedh kokalo kuom kothi.’+ 26 Bang’ ka Nyasaye noseketo Jatichne, ne okwongo oore iru+ mondo oguedhu ka omiyo ng’ato ka ng’ato kuomu olokre owe timbene maricho.”