22 Daudi nowero ne Jehova wendni+ chieng’ ma Jehova norese e lwet wasike+ duto kendo e lwet Saulo.+ 2 Ne ower kama:
“Jehova e lwandana, en e kar geng’ruokna,+ kendo en e Jal ma resa.+
3 Nyasacha e lwandana+ ma abwokie,
En e okumbana,+ kendo tung’na mar resruok, kod kar geng’ruokna+
Ka ma anyalo pondoe,+ jawarna+ ma resa e lwet jo mahundu.
4 Analuong Jehova, Nyasaye mowinjore opaki,
Kendo ibiro resa e lwet wasika.
5 Apaka mag tho olwora koni gi koni;+
Jo ma timbegi richo nobwoga ka ohula maduong’.+
6 Tonde mag Liel norida matek;+
Obadho mag tho nochoma tir.+
7 Ka ne anie chandruok, ne aluongo Jehova,+
Ne asiko ka aywak ne Nyasacha.
Ne owinjo dwonda ka en e hekalune,
Kendo ywakna ne ochopo e ite.+
8 Piny nochako tetni kendo yiengni;+
Mise mag polo bende notetni+
Ne giyiengni koni gi koni nikech mirimb Nyasaye.+
9 Yiro nowuok e ume,
Kendo mach makakni nowuok e dhoge;+
Maka maliel nowuok kuome.
10 Nodolo polo kolor,+
Mudho mandiwa ne nie bwo tiendene.+
11 Ne oidho kerubi+ mi obiro kofuyo.
Ne onenore e buomb malaika.+
12 Ne oumore gi mudho mana ka hema,+
Kendo e boche polo ma rotenge ma pi opong’o.
13 Ler manie nyime nogolo mirni mag mach maliel.
14 Eka Jehova nochako mor gie polo;+
Dwond Jal Mamalo Chutho nowinjore.+
15 Ne obayo asernige+ mokeyogi;
Polo ne omil mi giringo koni gi koni.+
16 Bwo nam nonenore;+
Jehova nomiyo mise mag piny onyenyore ka nosiemogi,
Nikech teko mar muya ma noa e ume.+
17 Norieyo bade ka en malo;
Nomaka mogola e pige matut.+
18 Noresa e lwet jasigu ma ratego,+
Kuom ji duto mosin koda kendo moloya gi teko.
19 Ne gimonja ka ne masira oyuda,+
To Jehova e ma ne osira.
20 Ne ogola e chandruok moketa ka mokuwe;+
Noresa nikech ne omor koda.+
21 Jehova guedha nikech timna makare;+
Ochula moromore gi tichna maler.+
22 Nimar aseluwo yore mag Jehova,
Kendo pok aweyo Nyasacha mondo atim richo.
23 Chikene duto+ nie nyima;
Ok abi weyo buchene.+
24 Anasik ka aonge ketho+ e nyime,
Kendo anasik ka aritora mondo kik atim richo.+
25 Jehova mondo ochula kaluwore gi timna makare,+
Kendo nikech aonge ketho e nyime.+
26 Imakori gi ng’at momakore kodi;+
Kendo ibedo malong’o ne ng’at malong’o;+
27 Ne jo maler inyisori ni iler,+
To ne jo ma timbegi obam, inyisori ni iriek moloyogi.+
28 Nimar ireso jo ma obolore+
To isin gi jo ma wigi tek kendo iduokogi piny.+
29 A Jehova, in e tacha,+
Jehova e ma menyona yo e mudho.+
30 Ikonya loyo jo momonja;
Kuom teko Nyasacha anyalo kalo ohinga.+
31 Yor Nyasaye madier en yo makare chuth,+
Wach Jehova liw.+
En okumba ne ji duto ma geno kuome.+
32 Ere Nyasaye moro mak mana Jehova?+
Kendo ere lwanda moro mak mana Nyasachwa?+
33 Nyasaye madier e kar pondona motegno,+
Kendo enomi yora obed makare chuth.+
34 Omiyo tiendena bedo mayot ka tiende mwanda;
Omiyo achung’ kuonde moting’ore malo.+
35 Otiego lwetena ne lweny;
Bedena nyalo dolo atung’ molos gi mula.
36 Imiya okumbani mar warruok,
Kendo bolruokni miya duong’.+
37 Iyarona yo malach mondo awuothie;
Tiendena ok bi kier.+
38 Analaw wasika mi atiekgi;
Ok abi duogo nyaka tiekgi chuth.
39 Abiro tiekogi mi anyon-gi ma ok ginyal chung’ kendo;+
Gibiro podho e tiendena.
40 Ibiro miya teko mar kedo e lweny;+
Ibiro miyo wasika opodh piny e tiendena.+
41 Ibiro miyo wasika olokna ng’egi,+
Kendo abiro tieko jo ma osin koda.+
42 Giywak mondo okonygi, to onge ng’at ma diresgi;
Bende, giywak ne Jehova to ok odwokgi.+
43 Abiro regogi mayom mana ka buru;
Abiro nyonogi mana kaka chuodho manie ndara.
44 Iniresa e lwet joga ma dwaro dondore koda.+
Inirita miketa jatend ogendni.+
Jo ma ne ok ang’eyo biro tiyona.+
45 Jo ma oa e pinje mamoko nobi ira mi ginikulrena+
Humba kende nomi giluw chikna;
46 Luoro biro mako jo ma oa e pinje mamoko;
Giniwuog kuonde ma gipondoe ka gitetni.
47 Jehova en Nyasaye mangima! Pakuru Lwandana!+
Odend Nyasaye ma en lwanda mar resruokna.+
48 Nyasaye madier chulona kuor;+
Oketo ji e bwoya.+
49 Oresa e lwet wasika;
Iting’a malo+ e wi jo ma monja;
Iresa e lwet ng’at mager.+
50 Mano e momiyo anagoni erokamano e kind ogendni, A Jehova,+
Kendo anapak nyingi gi wer:+
51 Omiyo ruoth moketo yudo resruok maduong’;+
Onyiso ng’ate mowir hera mosiko,
Daudi gi kothe nyaka chieng’.”+