Mar Ariyo ne Jo-Korintho
8 Owetewa, koro dwaher mondo ung’e wach ng’wono mogundho mar Nyasaye mosenyis kanyakla mag Makedonia.+ 2 E ndalo ma ne giyudo tem malich kod chandruok, ne gin gi mor mogundho kata obedo ni ne gidhier, pod chiwo maggi osemedore ahinya. 3 Nimar ne gitimo kamano kaluwore gi nyalogi,+ ee, anyalo doko janeno ni mano nokalo kata mana nyalogi,+ 4 ka gin e ma ne gikawo okang’ mokwongo mar siko ka gihombowa gi kinda, mondo omigie thuolo makende mar golo chiwo gi chuny mohero, mondo gin bende gibedie gi tich ma gikonyogo jo maler.+ 5 Bende, ok mana kaka ne wasegeno, to mokwongo ne gichiwore ne Ruoth kendo ne wan kokalo kuom dwaro mar Nyasaye. 6 Omiyo, ne wajiwo Tito+ ni mana kaka nosechako tijni e kindu, onego otiek bende wach choko chiwou muchiwo gi chuny mohero. 7 Kata kamano, mana kaka ugundho e gik moko duto, kaka e yie, e nyalo mar wuoyo, e ng’eyo, e kinda, kendo e nyiso hera ma waherougo, kamano bende e kaka umed gundho e wach chiwou.+
8 Ok awachnu mano kaka chik, to en ni mondo ami ung’e kinda ma jomamoko nigo, kendo mondo atem ane herau ka be en hera madier. 9 Nimar ung’eyo wach ng’wono mogundho mar Ruodhwa Yesu Kristo, ni kata obedo ni ne en jamwandu, nodoko jadhier nikech un,+ mondo ubed jomwandu kokalo kuom dhier mare.
10 To daher chiwo pacha kuom wachni:+ Tijno kelonu ber, nimar koro higa achiel osekalo nyaka ne uchak tijno, to bende ne unyiso ni udwaro time. 11 Omiyo, koro tiekuru tich ma ne uchako, mondo chuny moikore ma un-go mar tiyo tijno ochop chuth kaluwore gi nyalou. 12 Nimar ka chuny moikore nitie mokwongo, mano bedo gima owinjore moloyo, ka ng’ato chiwo kaluwore gi gima en-go,+ to ok kaluwore gi gima oongego. 13 Nimar ok adwar miyo ngima obed mayot ne jomamoko to un obednu matek; 14 to adwaro ni kokalo kuom ma un-go momedore gie sani, upong’go chan margi, to bende ma gin-go momedore opong’ rem ma un-go, mondo eka romruok obedie. 15 Mana kaka ondik niya: “Ng’at ma ne nigi mogundho, ne ok obedo gi mogundho ahinya, kendo ng’at ma ne nigi manok, ne ok obedo gi manok ahinya.”+
16 Koro wagoyo erokamano ne Nyasaye kuom miyo Tito chuny mar dewou ahinya mana kaka wan,+ 17 nikech kuom adier, osetimo kaluwore gi jip ma ne wamiye, to nikech en gi siso ahinya, en owuon osekawo okang’ mokwongo mar biro iru. 18 To kanyachiel kode, ero waoronu owadwa ma pakne oselandore e kanyakla duto nikech tije mar yalo wach maber. 19 Ok mano kende, to bende kanyaklago ne okete mondo obed jal ma wuotho kodwa sa ma wapogo mich mang’won-gi, mondo Ruodhwa oyud duong’ kendo mondo onenre gadier ni waikore mar konyo. 20 Omiyo, watemo mondo kik ng’ato oyud ketho kuomwa kaluwore gi tij pogo michgo ma ji ochiwo gi chuny mohero.+ 21 Nimar ‘watimo gik moko duto ka waritore ma onge mibadhi, ok mana e wang’ Jehova* kende, to bende e wang’ dhano.’+
22 E wi mano, kanyachiel kodgi, waoro owadwa ma kinde mang’eny waseyudo ni en jakinda e weche mathoth, to sani en gi kinda momedore moloyo nikech geno maduong’ ma en-go kuomu. 23 Kata kamano, ka nitie penjo moro amora e wi Tito, ng’euru ni en jal ma wuotho koda, kendo en jatich kanyachiel koda mondo uyud ber; kata ka nitie penjo moko e wi owetewa, ng’euru ni gin joote mag kanyakla kendo gimiyo Kristo duong’. 24 Omiyo, timnegiuru gik ma nyiso ni uherogi gadier,+ kendo unyis kanyaklago gimomiyo ne wasungore nikech un.