Weche mag Ndalo Mokwongo
15 Daudi nodhi nyime gero utene e Dala Daudi kendo ne oloso kamoro moguroe hema mondo oketie Sandug Singruok mar Nyasaye madier.+ 2 Kindeno e ma Daudi nowachoe niya: “Onge jo ma oyienegi ting’o Sandug Singruok mar Nyasaye madier mak mana Jo-Lawi kende, nimar gin e ma Jehova oseyierogi mondo giting’ Sandug Singruok mar Jehova kendo giti e nyime kinde duto.”+ 3 Omiyo, Daudi nochoko Jo-Israel duto Jerusalem, mondo gidhi gikel Sandug Jehova mondo gikete ka ma ne oseikone.+
4 Daudi nochoko joka Harun+ kod Jo-Lawi:+ 5 kuom Jo-Kohath nokawo Uriel jatelo kod owetene 120; 6 kuom joka Merari nokawo Asaya+ jatelo kod owetene 220; 7 kuom joka Gershom nokawo Joel+ jatelo kod owetene 130; 8 kuom joka Elizafan+ nokawo Shemaya jatelo kod owetene 200; 9 kuom joka Hebron nokawo Eliel jatelo kod owetene 80; 10 kuom joka Uziel+ nokawo Aminadab jatelo kod owetene 112. 11 E wi mano, Daudi noluongo Zadok+ jadolo, gi Abiathar+ jadolo, kaachiel gi Jo-Lawi ma gin Uriel, Asaya, Joel, Shemaya, Eliel, kod Aminadab, 12 kendo nowachonegi niya: “Un e jotelo mag anyuola joka Lawi. Pwodhreuru kaachiel gi oweteu mondo udhi ukel Sandug Jehova, Nyasach Israel kendo ukete ka ma aseikone. 13 Jehova Nyasaye ne obedo gi mirima mager kodwa+ e kinde mokalo nikech ne ok uting’o sandugno+ kendo ne ok waluwo kaka nochiko.”+ 14 Omiyo, jodolo kod Jo-Lawi ne opwodhore mi gidhi omo Sandug Jehova Nyasach Israel.
15 Jo-Lawi ne oting’o Sandug Singruok mar Nyasaye gi ludhe e gokgi+ mana kaka Musa ne ochiko kaluwore gi wach Jehova. 16 Eka Daudi nochiko jotend Jo-Lawi mondo oyier owetegi ma jower mondo ower gimor ka gigoyo thum gi gige thum molos gi tonde, gi nyatiti,+ kod nyidwonge.+
17 Omiyo, Jo-Lawi noyiero Heman+ wuod Joel gi owadgi ma Asaf+ wuod Berekia, kod Ethan+ wuod Kushaya ma wuok e anyuola mar joka Merari. 18 Owetegi ma ne loso grup mar ariyo+ ne gin Zekaria, Ben, Jaaziel, Shemiramoth, Jehiel, Uni, Eliab, Benaya, Maaseya, Matithia, Elifelehu, gi Mikneya, kaachiel gi Obed-edom kod Jeiel ma ne gin jorit rangach. 19 Heman,+ Asaf,+ kod Ethan ma ne gin jower ne goyo nyidwonge mag mula;+ 20 Zekaria, Aziel, Shemiramoth, Jehiel, Uni, Eliab, Maaseya, kod Benaya ne gwelo gige thum molos gi tonde ma golo dwol mar Alamoth;*+ 21 Matithia,+ Elifelehu, Mikneya, Obed-edom, Jeiel, kod Azazia ne otelo ne ji e wer ka goyo nyatiti ma golo dwol mar Sheminith.*+ 22 Kenania+ jatend Jo-Lawi ne tayo kaka itero Sandug Singruok nikech ne olony e timo mano. 23 Berekia kod Elkana ne rito Sandug Singruok. 24 Shebania, Joshafat, Nethanel, Amasai, Zekaria, Benaya, kod Eliezer ne gin jodolo kendo ne gigoyo turmbeta gi dwol maduong’ e nyim Sandug Singruok mar Nyasaye madier,+ to Obed-edom kod Jehia bende ne rito Sandug Singruok.
25 Daudi gi jodong Israel kod jotelo moket e wi ji aluf-aluf ne odhi omo sandug singruok mar Jehova e od Obed-edom+ mi gikele gi mor.+ 26 Ka ne Nyasaye madier okonyo Jo-Lawi ma ne ting’o sandug singruok mar Jehova, ne gigolone misengni mag ruedhi abiriyo kod yimbe abiriyo.+ 27 Daudi norwako kandho ma onge bade molos gi bafta mayom. Jo-Lawi duto ma ne oting’o Sandug Singruok, jower, gi Kenania ma ne tayo jo ma ne oting’o Sandug Singruok kod jower bende ne orwakore kamano. Daudi bende norwako efod* mar kitani.+ 28 Jo-Israel duto ne okelo sandug singruok mar Jehova ka giwer gi mor,+ ka gigoyo tung’, turmbeta,+ nyidwonge, kendo ka gitugo gige thum molos gi tonde kod nyatiti.+
29 To ka ne sandug singruok mar Jehova ochopo e Dala Daudi,+ Mikal+ nyar Saulo nong’icho gie dirisa moneno ka Ruoth Daudi chikore kendo miel. Wachno nomiyo ochayo Daudi e chunye.+