Mar Ariyo ne Jo-Korintho
11 Daher ni uhoru koda kata obedoni anenora ka ng’at mofuwo. To kuom adier, usebedo ka uhoru koda! 2 Nimar an gi nyiego kodu, to en nyiego mar Nyasaye, nikech an awuon ne asingou e kend gi dichwo achiel, mondo achiwu ka uler kaka nyako ma silili ne Kristo.+ 3 Kata kamano, aluor ni samoro mana kaka thuol nowuondo Hawa gi riekone ma ling’ling’,+ un bende inyalo keth pachu mi uwe bedo gi chuny ma ratiro kendo maler mowinjore gi Kristo.+ 4 Nimar ka ng’ato obiro ka yalo Yesu mopogore gi ma ne waseyalonu, kata ka uyudo roho* mopogore gi roho* ma ne useyudo, kata wach maber mopogore gi ma nuserwako,+ awuoro kaka uyie ayiea kode e yo mayot. 5 Nikech ang’eyo ni onge gima nyiso ni jooteu mudhialo ni long’ogo oloya gi gimoro amora.+ 6 To kata ka ok alony e wuoyo,+ kuom adier, an gi ng’eyo; to wasenyisou mano maler e yore duto kendo e gik moko duto.
7 Koso dibed ni ne atimo richo kuom landonu wach maber mar Nyasaye nono, ka an gi mor, kendo ka abolora mondo eka oting’u malo?+ 8 Ne amayo kanyakla mamoko gige konyruok ma ne gichiwo mondo atinugo.+ 9 To e ma ka ne achando gimoro ka an kodu, ne ok abedo ting’ kuom ng’ato ang’ata, nimar owete ma noa Makedonia ne ochiwona gige konyruok mang’eny.+ Ee, ne atemo mondo kik abednu ting’ e yo moro amora, kendo kamano e kaka abiro dhi nyime timo.+ 10 Mana kaka adiera mar Kristo ni kuoma, e kaka ok abi weyo pakora e wi wachni+ e gwenge mag Akaya. 11 Ang’o momiyo ne atimo kamano? Be en nikech ok aherou? Nyasaye ong’eyo ni aherou.
12 To abiro dhi nyime timo gima asebedo ka atimo+ mondo ageng’go jo ma pakore ni gin e migawo kaka marwa, mondo kik giyud gima nyalo miyo gipakre. 13 Nikech jo ma kamago gin joote mag miriambo, jotich ma jowuond, ma wuondore mondo ginenre kaka joote Kristo.+ 14 To ok en gimiwuoro, nimar Satan owuon siko ka wuondore mondo onenre kaka malaika mar ler.+ 15 Omiyo, ok kawwa gi wuoro ka jotichne bende siko ka wuondore mondo ginenre kaka jotich mag tim makare. To gikogi nobed kaluwore gi timbegi.+
16 Awacho kendo niya: Kik ng’ato kawa ni afuwo. To kata ka utimo kamano, kawuru akawa ni afuwo mondo an bende apakrae matin. 17 Gima sani awacho ok awache ka aluwo ranyisi mar Ruoth, to awache mana kaka ng’at mofuwo nyalo timo kopakore. 18 Nikech ji mang’eny pakore kaluwore gi ringruok,* an bende abiro pakora. 19 Nimar un uwegi uketoru jo ma pachgi ni kare kendo uyie ayiea gi jo ma pachgi ok ni kare ka umor kodgi. 20 Kuom adier, uyie ayiea gi ng’at ma ketou wasumbni, ma yako giu, ma mayou gima un-go, ma ng’awore e wiu, kod ma thalo lembu.
21 Wacho mae en gima kelonwa wich-kuot nikech nyalo nenore ka gima wayom yom.
To ka jomoko timo gik moko gi chir—aloso ka ng’at mofuwo—an bende abedo jachir. 22 Gin Jo-Hibrania, koso? An bende.+ Gin Jo-Israel, koso? An bende. Be gin koth Ibrahim? An bende.+ 23 Be gin jotich Kristo? Adwoko kaka janeko ni an jatichne moloyo: asetimo tije mang’eny ahinya,+ osetueya e jela nyading’eny,+ osegoya ding’eny ma ok kwanre, bende asekalo e gik mang’eny ma kela machiegni gi tho.+ 24 Nyadibich, Jo-Yahudi ne ochwada del morem achiel to chop 40,+ 25 ne ogoya gi ludhe nyadidek,+ ne ochiela gi kite dichiel,+ meli ne okethorena e nam nyadidek,+ nitie otieno gi odiechieng’ moro ma ne asediwo e chuny nam. 26 Asekalo e masiche mang’eny, e wuodhega, e aoche, e lwet jomecho, e lwet joga awuon,+ e lwet ogendni mamoko,+ e dala,+ e thim, e nam, e kind owete mag miriambo. 27 Asetiyo matek ka achandora, asefuwo nindo nyading’eny,+ kech osekaya kendo riyo oseloya,+ asebedo ma onge chiemo ding’eny,+ asebedo e koyo kendo ma onge lewni.*
28 Mopogore gi gik mamokogo, nitie gima chanda pile ka pile: ma en parruok ma an-go ahinya ne kanyakla duto.+ 29 Sa ma ng’ato nyap, donge an bende anyap? Sa ma ng’ato ochwanyore, donge an bende abedo gi mirima?
30 Kochuno ni nyaka apakra, abiro pakora kuom gik ma nyiso nyawona. 31 Nyasaye ma en Wuon Ruodhwa Yesu, ma e Jal monego opak nyaka chieng’, ong’eyo ni ok ariambi. 32 E Damaski, noyudo gavana manie bwo ruoth Aretas, oketo arita e dala Jo-Damaski mondo gimaka, 33 kata kamano, ne olora ei okapu gie dirisa manie ohinga mar dalano,+ mi ne atony e lwete.