Barua Mokwongo ne Jo-Thesalonika

5 Koro owetewa, kuom wach kinde kod ndalo, ok ochuno ni mondo ondiknu gimoro. 2 Nimar un uwegi ung’eyo maber ni odiechieng’ mar Jehova*+ nobi mana kaka jakuo biro gotieno.+ 3 E kinde ma giniwachie ni, “Kuwe nitie kendo weche beyo!” eka kethruok ma apoya nobi kuomgi gikanyono+ mana kaka muoch ma kayo dhako ma nigi ich, kendo ok ginitony ngang’. 4 Kata kamano, un owete, ok un e mudho ma chieng’no dipou mana kaka ler mar odiechieng’ nyalo poyo jokuoge, 5 nimar uduto un nyithind ler kendo un nyithind odiechieng’.+ Ok wan mag otieno, kendo ok wan mag mudho.+

6 Kuom mano, kik wanind kaka jomamoko timo,+ to wasik ka waneno+ kendo waritreuru e pachwa.+ 7 Nimar kinde mang’eny jo ma nindo, nindo gotieno, kendo jo ma mer, kinde mang’eny mer gotieno.+ 8 To wan ma wan mag ler, wadhiuru nyime rito pachwa kendo warwak yie gi hera kaka rageng’ mar akor, kendo warwak geno mar warruok kaka ogudu+ 9 nimar Nyasaye noyierowa, ok nikech mirimbe, to mondo wabi wayud warruok+ kokalo kuom Ruodhwa Yesu Kristo. 10 Ne othonwa+ mondo kata ka wangima kata ka watho, wabed mangima kanyachiel kode.+ 11 Omiyo, dhiuru nyime jiworu* kendo geroru+ mana kaka utimo sani.

12 Koro owetewa, wakwayo ni umi jo ma tiyo matek e kindu luor, ma gin jo ma tayou e tij Ruoth kendo ma rieyou; 13 kendo kuom hera, nyisgiuru luor moloyo mapile nikech tijgi.+ Beduru jo ma loso kuwe e kindu.+ 14 Bende, owetewa, wasayou ni usiem jo ma wuotho e yo ma ok owinjore,+ wuouru e yo ma hoyo jo ma chunygi onyosore, teguru jo ma yom yom, kendo uhoru gi ji duto.+ 15 Neuru ni onge ng’at ma chulo richo kar richo,+ to kinde duto dwaruru gik ma kelo ber e kindu kendo ne jomamoko bende.+

16 Beduru mamor kinde duto.+ 17 Lamuru kinde duto.+ 18 Gouru erokamano kuom gik moko duto.+ Mae en dwaro mar Nyasaye kuomu e Kristo Yesu. 19 Kik uneg mach mar roho mar Nyasaye.+ 20 Kik ucha weche ma ne okor.+ 21 Beduru gadier kuom weche duto;+ makreuru motegno gi gik mabeyo. 22 Wereuru gi gik maricho duto.+

23 Nyasach kuwe owuon mondo opwodhu mi ubed maler chuth. Kendo owetewa, ngimau kod chunyu kod ringreu duto mondo obed ma onge bura e kinde ma biro yudo ka Ruodhwa Yesu Kristo nitie.+ 24 Jal ma luongou en jal migeno, kendo kuom adier obiro timo kamano.

25 Owetewa, dhiuru nyime lamonwa.+

26 Mosuru owete duto gi nyoth maler.

27 Achikou ka asayou e nying Ruoth mondo une ni osom baruani ne owete duto.+

28 Ng’wono mogundho mar Ruodhwa Yesu Kristo mondo obed kodu.