Mar Ariyo ne Jo-Korintho
12 An nyaka apakra. Ok en gima konyo, kata kamano, abiro wuoyo e wi fweny+ kod weche ma Ruoth ne oelo.+ 2 Ang’eyo ng’at moro manie winjruok gi Kristo, ma higni 14 mokalo—ok ang’eyo ka be ne en e ringruok kata ok ne en e ringruok; Nyasaye e ma ong’eyo—ne oter nyaka e polo mar adek. 3 Ee, ang’eyo ng’at ma kamano—ok ang’eyo ka be ne en e ringruok kata ok ne en e ringruok; Nyasaye e ma ong’eyo— 4 ma noter e paradiso, mi nowinjo weche ma ok nyal hul, kendo gin gik ma ok oyie ne dhano wacho. 5 Abiro pakora nikech ng’at ma kamano, ok abi pakora kuoma awuon, to mak mana kuom nyawo ma an-go. 6 Nimar kata ka adwaro pakora, ok abi bedo ka ng’at mofuwo, nikech abiro wacho adier. To ok atim kamano mondo kik ng’ato miya pak mokalo gik moneno kuoma kata mowinjo kuoma, 7 mana nikech aseyudo fweny malich kamano.
Mondo kik abed gi sunga ahinya, ne omiya kudho moro ma chuoyo ringrena,+ malaika mar Satan, mondo osik ka sanda* mondo kik asungra ahinya. 8 Ne asayo Ruodhwa nyadidek kuom wachno ni mondo gino oweya. 9 To nodwoka kama: “Ng’wono mogundho ma anyisi oromi, nimar tekona nyisore e yo malong’o chuth e nyawo.”+ Omiyo, anabed mamor ahinya ka apakora kuom nyawo ma an-go, mondo teko mar Kristo osik kuoma kaka hema mouma. 10 Omiyo, nikech Kristo, abedo mamor e nyawo, e ayany, e chandruok, e sand, kod sa ma weche tek. Nikech sa ma anyap, eka abedo gi teko.+
11 Asebedo ka ng’at mofuwo. Ne uchuna bedo kamano, nimar un e ma ne onego upwoya. Nikech kata ka ok an gimoro e wang’u, pod jooteu mudhialo ni long’o ahinyago, chutho ok giloya gi gimoro amora.+ 12 Kuom adier, ne anano ahinya ka amiyo gik ma nyiso ni an jaote onenre e kindu,+ kokalo kuom ranyisi madongo gi tije miwuoro kod tije madongo.+ 13 Ere yo ma kanyakla mamoko ne oloyougo, mak mana ni an e ma ne ok abedonu ting’?+ Akwayou ni uwena kuom kethono.
14 Neuru! Koro aikora biro iru e limbena mar adek to e ma pod ok abi bedonu ting’. Nikech un e ma adwarou, to ok giu;+ nimar nyithindo+ ok onego oken ne jonyuolgi, to jonyuol e ma onego oken ne nyithindgi. 15 An to abiro chiwora ka amor kendo abiro tiyonu chuth.+ Ka aherou ahinya kamano, be an onego uhera matin? 16 Kata kamano, ne ok abedonu ting’.+ Un to uwacho ni, ne an gi riekni mopondo kendo ni ne amakou gi riekni mag wuond. 17 Be dibed ni ne amayoue giru moro kokalo kuom jo ma ne aoro iru? 18 Ne ajiwo Tito mi ne aore gi owadwa moro. Tito ne ok omayou giru moro ngang’, koso?+ Donge ne wawuotho gi chuny achiel? Donge ne waluwo yo machal, koso?
19 Dibed ni kinde duto usebedo ka uparo ni watemo nyiso ni wan kare e nyimu? E nyim Nyasaye e ma wawuoyoe kaka jo ma ni e achiel gi Kristo. Kata kamano, joherana, duto ma watimo gin mag gerou. 20 Nikech aluor ni samoro ka achopo, ok abi nwang’ou kaka adwaro, kendo un bende samoro duyud ni ok achal kaka udwaro, kar mano dhawo, nyiego, mirima, pogruok, ketho nying, kuoth, sunga, kod koko nyalo betie. 21 Nenore ni ka abiro kendo, Nyasacha nyalo kuodo wiya e nyimu, kendo di po ka akuyo nikech thoth jo machon notimo richo to pok giloko chunygi a e richogi, kaka tim ma ok ler, gi terruok,* kod tim wang’-teko.*