Ayub
42 Eka Ayub nodwoko Jehova niya:
2 “Koro ang’eyo ni onge gima nyalo tami timo
Kendo ni gimoro amora midwaro timo, inyalo timo.+
3 Isepenjo ni, ‘Ma to ng’a ma temo rocho puonjna kowuoyo e wi gik mokia?’+
Kuom adier, asewuoyo e wi gik ma ok ang’eyo
Asewuoyo e wi weche ma korgi tek ahinya kendo ma ok ang’eyo tiendgi.+
4 Ne iwacho ni, ‘Yie ichik iti mondo awuo.
Mondo idwok weche ma adwaro penjigi.’+
5 Ita to osewinjo humbi,
Kata kamano, sani to koro aneni gi wang’a.
6 Mano e momiyo amuonyo weche duto ma asewacho,+
Omiyo, aseyie ni ajaricho, kendo amienora gi lowo kod buru.”+
7 Bang’ ka Jehova ne osewacho ne Ayub wechegi, Jehova ne owacho ne Elifaz Ja-Teman niya:
“Akecho kodi kaachiel gi osiepeni ariyo,+ nikech ne ok uwacho adiera kuoma+ kaka jatichna Ayub notimo. 8 Omiyo, kaw ruedhi abiriyo gi yimbe abiriyo iter ne jatichna Ayub, mondo utimgo misango miwang’o nikech richo musetimo. Bang’ mano, jatichna Ayub biro lemonu.+ Mi anawinj kwayone kendo ok abi chulou kaluwore gi fupu, nimar ne ok uwacho adiera kuoma kaka jatichna Ayub notimo.”
9 Kuom mano, Elifaz Ja-Teman gi Bildad Ja-Shua gi Zofar Ja-Naamath ne odhi motimo kaka Jehova nowachonegi, kendo Jehova noyie timo kaka Ayub nokwaye.
10 Bang’ ka ne Ayub oselemo ne osiepene,+ Jehova notiekone masichene duto+ moduokone mwandune. Jehova nomiye gik ma ne en-go mokwongo nyadiriyo.+ 11 Owetene gi nyiminene duto kaachiel gi osiepene machon+ nobiro e ode mochiemo kaachiel kode. Ne gigoyone mos kendo ne gihoye nikech masiche duto ma Jehova ne oweyo mondo oyude. Moro ka moro kuomgi ne omiye pesa kod tere mar dhahabu.
12 Omiyo, Jehova noguedho higni ma achien mag ngima Ayub moloyo kaka ne oguedhe motelo.+ Mi Ayub nobedo gi rombe 14,000, gi ngamia 6,000, gi dhok 2,000, kod punde mamon 1,000.+ 13 Bende, ne ochako onyuolo yawuoyi abiriyo gi nyiri adek.+ 14 Ne ochako nyare makayo ni Jemima, to mar ariyo ni Kezia, to mar adek nochako ni Keren-hapuk. 15 E pinyno duto, onge nyiri ma ne beyo kaka nyi Ayub, kendo wuon-gi nomiyogi pok kaachiel gi owetegi.
16 Bang’ wechego duto, Ayub nomedo dak kuom higni 140 moneno nyithinde gi nyikwaye nyaka tieng’ mar ang’wen. 17 Gikone, Ayub ne otho ka hike oniang’ maber.