Ne Jo-Hibrania
12 Omiyo, nikech wan gi joneno mang’eny molworowa kaka boche polo kamano, wan bende wawituru oko ting’ duto kod richo ma duodowa mayot,+ kendo waringuru gi sinani e ng’wech moseket e nyimwa,+ 2 ka wachomo wang’wa tir kuom Jatelo Maduong’ moseket mar yiewa kendo Jachop yiewa, ma en Yesu.+ Nikech mor maduong’ ma ne oket e nyime, ne onano e yadh-sand* ka ochayo wich-kuot, kendo osebet piny e bat korachwich mar kom-loch mar Nyasaye.+ 3 Kuom adier, paruru ahinya kuom jalno mosenano e weche ma joricho kwedego+ ma gin weche ma ok kel ne jogo ber ngang’, mondo kik uol mi chunyu a.+
4 E lweny ma ukedoe gi richono, pok ukedo nyaka e okang’ ma rembu ochuer. 5 Kendo wiu osewil chuth gi wach misayougo kaka nyithindo niya: “Wuoda, kik icha kum ma Jehova* rieyigo, kendo kik chunyi a sa ma okweri; 6 nimar Jehova* rieyo ng’at mohero; adier, ochwado ng’at ma orwako kaka wuode.”+
7 Dwarore ni unan nikech mano en yo ma irieyougo.* Nyasaye sayou kaka nyithinde.+ Be nitie nyathi ma wuon mare ok nyal kumo?+ 8 To ka uduto pok omiu kumno, ok un nyithinde gadier, un nyithindo ma ok onyuolo. 9 E wi mano, wuonewa ne rieyowa kendo ne wamiyogi luor. Donge onego wabed moikore bolore ne Wuonwa mar chuny mondo wabed mangima?+ 10 Nimar ne gikumowa kuom kinde machuok kaluwore gi gik ma ne gineno ni bernegi, to Nyasaye timo kamano mondo wayud ber ma biro miyo wabed jo maler kaka en.+ 11 En adier ni onge kum ma nenore ni kelo mor gie seche michiwee, to obedo malit; kata kamano, achien onyago olemb kuwe ma en yor ngima makare kuom jo ma kumno osetiego.
12 Kuom mano, teguru bede mojony kod chonge monyosore,+ 13 kendo sikuru ka uloso ne tiendeu nderni moriere tir,+ mondo rang’ol kik wil, to kar mano ochangi. 14 Dwaruru kuwe gi ji duto+ kod pwodhruok+ ma ka ng’ato ongego to ok none Ruoth. 15 Tang’uru ahinya mondo kik ng’ato ochwe ma ok oyudo ng’wono mogundho mar Nyasaye, mondo kik mise motimo sum twi mi kel chandruok, kae to omiyo ji mang’eny bedo gi chilo;+ 16 kendo tang’uru mondo ng’ato kik bedie e kindu ma jaterruok,* kata ng’ato ma ok kaw gik mowal e yo mapek kaka dwarore, kaka Esau ma ne owito pokne mar bedo wuoyi makayo ka ne owile gi chiemo ma nyadichiel.+ 17 Nimar ung’eyo ni bang’e sa ma nodwaro ni omiye gueth kaka pokne, ne otame; nikech kata obedo ni pi wang’e ne ochuer ka notemo ahinya ni olok wachno,*+ mano ne ok onyalore.
18 Nimar pok ubiro e got minyalo mul+ kendo ma osemokie mach ma liel,+ ma nigi bor polo ma rateng’ gi mudho mandiwa kod yamo mager,+ 19 kanyachiel gi ywak mar turmbeta+ kod dwol ma hulo weche,+ ma ka ji nowinjo, ne gikwayo mondo kik med hulnegi wach moro amora.+ 20 Nimar ne giluoro ahinya chik ma ne wacho niya: “Kata mana le ka omulo got, to nyaka chiele gi kite.”+ 21 Bende, gik ma ne ginenogo ne lich miwuoro mi Musa nowacho niya: “Aluor ahinya kendo atetni.”+ 22 To un usebiro e Got Sayun+ kendo e dala mar Nyasaye mangima, Jerusalem manie polo,+ kod malaike gana gi gana 23 mochokore,+ gi kanyakla mar jo makayo ma nyinggi osendik e polo, gi Nyasaye ma en Jang’ad Bura mar ji duto,+ gi ngima mar jo makare ma roho maler oseyiero+ moseket mobedo malong’o chuth,+ 24 gi Yesu ma en jagach+ mar singruok manyien,+ kaachiel gi remo mokir ma hulo weche e yo malong’o moloyo remb Habil.+
25 Temuru matek mondo kik utamru winjo jal ma wuoyo. Nikech ka jo ma ne otamore winjo jal ma ne chiwo siem mag Nyasaye e piny ne ok otony, mano kaka ok wabi tony ka walokore mi waweyo jal ma wuoyo kodwa koa e polo!+ 26 E kindeno, dwonde ne oyiengo piny,+ to koro sani osesingo kama: “Odong’ matin nono, abiro yiengo piny gi polo.”+ 27 Koro wacho ni, “odong’ matin nono” nyiso ni ibiro gol gik ma yiengni, gik ma Nyasaye ok oloso, mondo eka gik ma ok yiengni osik. 28 Omiyo, nikech koro wabiro yudo Pinyruoth ma ok nyal yiengni, wadhiuru nyime rwako ng’wono mogundho mar Nyasaye gi mor. Kokalo kuom ng’wonono, wanyalo tiyo ne Nyasaye e yo moyiego ka waluore kendo ka wamiye duong’. 29 Nimar Nyasachwa en mach mager.+