Barua Mokwongo ne Timotheo
4 Kata kamano, wach mokudh gi much Nyasaye* nyiso maler ni e ndalo mabiro, nitie jo ma biro lwar a e yie ka gichiko itgi ne weche ma lalo ji moa kuom jochiende+ kod puonj mag jochiende, 2 kokalo kuom wuondruok mag jo ma riambo+ ma chunygi mar pogo ber gi rach osetho mana ka gima owang’gi gi chuma maliet. 3 Gimono ji kendo,+ kendo gikwero ji chamo chiemo moko+ ma Nyasaye nochueyo mondo jo moyie kendo mong’eyo adiera e yo malong’o ocham gi erokamano.+ 4 Nimar chuech duto mag Nyasaye beyo+ kendo ok onego wadagi gimoro amora,+ tek mana ni wakawe gi erokamano, 5 nikech osepwodhe gi wach Nyasaye kod lamo.
6 Ka ichiwo puonjno ne owete, ibiro bedo jatich mowinjore mar Kristo Yesu, kendo ibiro bedo jal ma osepidhore gi weche mag yie kod mag puonj malong’o ma isebedo ka iluworigo machiegni.+ 7 To tamri sigendni mag miriambo kendo mag achaya,+ kaka migano gi mon moti. Kar mano, tiegri iwuon ka dwachi maduong’ en chiwruok chuth ne Nyasaye. 8 Nimar tiego del konyo mana matin, to bedo ng’at mochiwore chuth ne Nyasaye konyo e weche duto, nikech oting’o singo mar ngima ma sani kod mar ngima ma biro.+ 9 Wachno en wach migeno kendo ma ji onego oyiego chuth. 10 Mano e momiyo wan wawegi watiyo matek kendo wakedo,+ nimar waseketo genowa kuom Nyasaye mangima, ma en Jawar+ mar ji duto,+ to moloyo, mar jo momakore gi yie.
11 Dhi nyime kichiko kendo puonjo wechego. 12 Kik iwe ng’ato ochayi nikech pod itin. Kar mano, ket ranyisi maber ne jo momakore gi yie, kuom wuoyo, kuom tim, kuom hera, kuom yie, kod kuom timbe maler. 13 Nyaka chop abi, dhi nyime keto chunyi kuom somo e nyim ji,+ kuom jiwo ji, kod kuom puonjo. 14 Kik ijwang’ mich man kuomi ma ne omiyi kokalo kuom wach ma ne osekor ka bura mar jodongo noketo lwetgi kuomi.+ 15 Par matut kuom wechegi; ket chunyi duto kuomgi, mondo dongruok mari onenre ayanga ne ji duto. 16 Sik ka inonori iwuon kendo ka inono weche ma ipuonjo.+ Nan kuom wechegi, nimar kuom timo kamano, iniresri iwuon kendo inires jo ma winjo weche mipuonjo.+