Isaya

20 E higa ma Sargon ruodh Asuria ne ooro Tartan* mondo odhi Ashdod,+ ne okedo kod Ashdod mi oloye.+ 2 E kindeno, Jehova nonyiso Isaya+ wuod Amoz niya: “Dhi igol law gunia mitueyo e nungoni, kendo ilony wuocheni.” Isaya ne otimo mana kamano. Ne owuotho duk,* kendo gi tiende nono.

3 Eka Jehova nowacho niya: “Mana kaka jatichna Isaya osewuotho duk kendo gi tiende nono kuom higni adek mondo obed ranyisi+ kendo siem ne Misri+ kod Ethiopia,+ 4 e kaka Ruodh Asuria biro tero yawuoyi kod jodongo ma omako e piny Misri+ kod Ethiopia e tuech. Giniwuoth gi tiendegi nono, ka gin duge, kendo ka siandagi neno. Misri noyud wich-kuot. 5 Luoro biro makogi kendo gibiro yudo wich-kuot nimar ne gigeno Ethiopia, kendo Misri e ma ne gimiyo duong’. 6 Chieng’no, jo ma odak e tiend nam nowach ni, ‘Neuru gima osetimore ne ng’at ma ne wageno, ng’at ma ne waringo ire mondo okonywa kendo oreswa e lwet ruodh Asuria! Koro wabiro ringo ir ng’a?’”