Samuel Mokwongo
16 Gikone, Jehova ne owacho ne Samuel niya: “Ibiro kuyo nikech Saulo nyaka karang’o?+ Donge asedagi ni kik obed ruoth e Israel?+ Pong’ tung’ mari gi mo.+ Adwaro ori ka Jesse+ Ja-Bethlehem nimar aseyiero achiel kuom yawuote mondo obed ruoth.”+ 2 To Samuel ne openjo kama: “Dadhi nade? Ka Saulo owinjo wachno donge obiro nega?”+ Jehova ne odwoke kama: “Dhi gi nyaroya kae to iwach ni: ‘Abiro timo ne Jehova misango.’ 3 Luong Jesse mondo obi e misango, kae to abiro nyisi gima onego itim. Ne ni iwalona ng’at ma abiro nyisi.”+
4 Samuel notimo kaka Jehova nochike. Ka ne ochopo Bethlehem,+ jodong dalano ne oromo kode ka giluor mi gipenje niya: “Wuodhini en mar kuwe koso?” 5 Ne odwokogi niya: “Ee, en mar kuwe. Abiro mondo atim ne Jehova misango. Pwodhreuru mondo ubi koda kar misango.” Mi nopwodho Jesse gi yawuote kae to ne ochokogi ne misango. 6 Ka ne gidonjo, ne oneno Eliab+ mi ne owacho niya: “Adier ng’at ma Jehova oyiero eri ochung’ e nyime.” 7 To Jehova ne onyiso Samuel kama: “Kik ing’i kaka ochal kata ng’iyo borne,+ nimar asedage. Nikech yo ma dhano nenogo gik moko opogore gi kaka Nyasaye neno, nimar dhano neno mana gik ma oko, to Jehova neno nyaka chuny ng’ato.”+ 8 Eka Jesse ne oluongo Abinadab+ mondo okal e nyim Samuel, to Samuel ne owacho kama: “Mae bende Jehova ok oyiero.” 9 Bang’ mano, Jesse noluongo Shama+ to Samuel ne owacho kama: “Mae bende Jehova ok oyiero.” 10 Jesse ne oluongo yawuote abiriyo duto mi gikadho e nyim Samuel, to Samuel nonyiso Jesse kama: “Jehova ok oyiero moro amora kuomgi.”
11 Gikone, Samuel nopenjo Jesse kama: “Be magi duto e yawuoti?” Ne odwoke niya: “Wuoyi ma chogo+ pod onge nikech okwayo rombe.”+ Eka Samuel ne onyiso Jesse niya: “Or ng’ato mondo odhi oluonge, nimar ok wabi chiemo nyaka ochop ka.” 12 Eka ne ooro ng’ato mokele. Ne en wuoyi matin, ma dende ber, kendo ma jachia.+ Gikanyono, Jehova ne ochiko Samuel kama: “A malo, wale nikech en e ma aseyiere!”+ 13 Omiyo, Samuel ne oolo mo+ e wi wuoyino mowalego e nyim owetene. Chakre chieng’no,+ roho mar Jehova ne ochako tiyo kuom Daudi. Bang’e, Samuel ne oa kanyo mi odok Rama.+
14 Noyudo roho mar Jehova oseweyo Saulo+ kendo Jehova ne oweyo mondo roho marach osande.+ 15 Jotij Saulo nonyise kama: “Nikech Nyasaye oseweyo roho marach mondo osandi, 16 yienwa mondo wadhi wamanyni ng’at molony e goyo thum+ mondo sa asaya ma roho marachno sandi to ng’atno goyoni thum mondo okuwe chunyi.” 17 Eka Saulo ne odwoko jotijego niya: “Ee, dhiuru umanyna ng’at molony e goyo thum mondo ukelnago.”
18 Achiel kuom jotijego ne owacho kama: “Aseneno kaka wuod Jesse Ja-Bethlehem ong’eyo goyo thum. En jalweny ma jachir,+ olony e wuoyo, en jachia,+ kendo Jehova ni kode.”+ 19 Eka Saulo ne ooro joote ir Jesse ka okwaye kama: “Orna Daudi wuodi ma jakwadh rombe.”+ 20 Omiyo, Jesse ne ooro Daudi ir Saulo koting’o e wi punda makate, chupa moting’o divai, kod nyadiel. 21 Mi Daudi nobiro ir Saulo mochako tiyone.+ Saulo ne ohero wuoyino ahinya kendo nokete jating’ gigene mag lweny. 22 Saulo ne ooro wach ne Jesse kama: “Yie mondo Daudi odhi nyime tiyona nikech amor kode.” 23 Sa asaya ma roho marach ne sando Saulo, Daudi ne goyone thum, kae to chuny Saulo ne kwe kendo ne owinjo maber.+