Zekaria
8 Wach Jehova Nyasach oganda lweny nobirona kendo niya: 2 “Ma e gima Jehova Nyasach oganda lweny owacho, ‘Abiro kedo ne Sayun gi kinda ahinya,+ ee, abiro kedone gi mirima mager.’”
3 “Ma e gima Jehova owacho, ‘Abiro dok Sayun+ mi adag Jerusalem;+ kendo Jerusalem ibiro luong ni dala mar adiera,+ god Jehova Nyasach oganda lweny, got maler.’”+
4 “Ma e gima Jehova Nyasach oganda lweny owacho, ‘Chwo moti gi mon moti biro bet kendo e laru mag Jerusalem, kendo ng’ato ka ng’ato nigi ludhe e lwete nikech hike oniang’.+ 5 Bende, nyithindo ma yawuoyi gi nyiri biro tugo e laru mag dalano.’”+
6 “Ma e gima Jehova Nyasach oganda lweny owacho, ‘Kata obedo ni e ndalogo gima kamano biro nenore ni tek e wang’ jo modong’ e ogandani, be an bende onyalo bedona matek kamano?’ Jehova Nyasach oganda lweny owacho.”
7 “Ma e gima Jehova Nyasach oganda lweny owacho, ‘Neuru! areso joga e pinje man yo wuok chieng’ kod man yo podho chieng’.+ 8 Abiro kelogi Jerusalem mi ginidag kuno;+ ginibed joga kendo anabed Nyasachgi+ e adiera, kendo e tim makare.’”
9 “Ma e gima Jehova Nyasach oganda lweny owacho, ‘Beduru jochir,*+ un jo ma winjo weche moa e dho jonabi.+ Wechego bende e ma ne owach chieng’ ma ne iketo mise mar hekalu, ma en od Jehova Nyasach oganda lweny. 10 Nimar, ka ne pok ndalono ochopo, onge chudo ma ne dhano kata jamni yudo;+ kendo ng’at ma donjo kata ma wuok ne onge kuwe nikech jasigu. Ne athuwo ng’ato ka ng’ato gi nyawadgi.’
11 “‘To koro ok abi timo ne jo modong’ e ogandani kaka ne atimo e ndalo machon,’+ Jehova Nyasach oganda lweny owacho. 12 ‘Ibiro pidh kodhi mar kuwe; mzabibu biro nyago olembe, piny biro nyak,+ polo nochiw tho momoko e lum. Abiro miyo jo modong’ e ogandani oyud gigo duto kaka pokgi.+ 13 Yaye Jo-Juda kod Jo-Israel, kata obedo ni ne un oganda mokuong’ e wang’ ogendni,+ abiro resou mi ubed gi gueth.+ Kik uluor!+ Beduru jochir.’*+
14 “Nimar ma e gima Jehova Nyasach oganda lweny owacho, ‘“Mana kaka ne aramo ni adhi kelonu masira nikech kwereu ne owang’o iya,” Jehova Nyasach oganda lweny owacho, “kendo chunya ne ok olokore kuom wachno,+ 15 e kaka e kindegi bende aseramo ni adhi timo gik mabeyo ne Jerusalem kod Jo-Juda.+ Kik uluor!”’+
16 “‘Magi e gik monego utim: Ng’ato ka ng’ato owach adiera gi nyawadgi,+ kendo ung’ad bura makare e dho rangeyeu mondo adiera gi kuwe obedie.+ 17 Kik ng’ato chan e chunye mar timo ne nyawadgi gimoro marach,+ kendo kik uher kuong’oru gi miriambo;+ nikech asin gi gigo duto,’+ Jehova owacho.”
18 Wach Jehova Nyasach oganda lweny nobirona kendo niya: 19 “Ma e gima Jehova Nyasach oganda lweny owacho, ‘Tueyo chiemo mutimo e dwe mar ang’wen,+ dwe mar abich,+ dwe mar abiriyo,+ kod e dwe mar apar+ nobed kinde mag mor ahinya ne Jo-Juda, tiende ni sewni mag mor.+ Omiyo, heruru adiera kod kuwe.’
20 “Ma e gima Jehova Nyasach oganda lweny owacho, ‘Kinde biro chopo ma jo ma oa e ogendni mamoko kaachiel gi modak e mier madongo nobi; 21 kendo jo modak e dala moro nodhi ir jo modak e dala machielo mi giniwachnegi niya: “Wadhiuru mapiyo wakwa Jehova Nyasach oganda lweny mondo onyiswa ng’wono, kendo wamany Jehova. Wan bende wadhi manye.”+ 22 Ji mang’eny kod ogendni ma roteke nobi Jerusalem mondo gimany Jehova Nyasach oganda lweny,+ kendo gibiro sayo Jehova mondo okechgi.’
23 “Ma e gima Jehova Nyasach oganda lweny owacho, ‘E kindego, ji apar moa e ogendni ma wacho dhok mopogore opogore+ biro mako riak law Ja-Yahudi, ee, ginimak riak lawe matek ka giwacho niya: “Wanadhi kodi+ nimar wasewinjo ni Nyasaye ni kodu.”’”+