Ne Jo-Filipi
3 Mogik, owetena, beduru mamor kuom Ruoth.+ Ok tekna ndikonu weche ma ne asendikonu, nimar en gima nyalo konyou.
2 Beduru motang’ ne guogi;* tang’uru gi jotich ma kelo hinyruok; tang’uru gi jo ma ng’ado ringruok.+ 3 Nimar wan jo moseter nyangu madier,+ wan ma watiyo tij Nyasaye kokalo kuom rohone kendo sungawa en kuom Kristo Yesu,+ kendo genowa ok en kuom ringruok, 4 kata kamano, ka nitie ng’at monego obed gi geno kuom ringruok, jalo en an.
Ka nitie ng’at moro amora ma paro ni nitie gimomiyo onego ogen kuom ringruok, an onego atim kamano moloyo: 5 ne otera nyangu e odiechieng’ mar aboro,+ awuok e oganda mar Israel, e dhood Benjamin, an Ja-Hibrania kendo jonyuolna gin Jo-Hibrania;+ kuom wach chik, an Ja-Farisai;+ 6 kuom wach kinda, ne asando kanyakla;+ kuom wach bedo ng’at makare kokalo kuom chik, ne aler ma onge ketho. 7 Kata kamano, nikech Kristo, gigo ma chon ne aneno kaka ohala, asekwanogi ka gik ma nono.*+ 8 E wi mano, akwano bende gik moko duto ka gik ma nono, nikech ng’eyo Kristo Yesu Ruodha nigi ohala maduong’ moloyo. Nikech en, aseyie mondo alal gik moko duto kendo akwanogi kaka yugi lilo, mondo anwang’ Kristo 9 kendo mondo oyuda ka an e winjruok achiel kode, ok nikech bedo ng’at makare e wang’a awuon kuom luwo Chik, to nikech bedo ng’at makare kokalo kuom keto yie+ kuom Kristo,+ ka abedo ng’at ma Nyasaye kwano ni ng’at makare nikech yie.+ 10 Dwarona en ni mondo ang’eye gi teko mar chierne,+ ayud sand kaka ma noyudo,+ kendo amed chalo kode kuom thone,+ 11 mondo ane ka nyalore mondo ochiera aa kuom jo motho e chier motelo.+
12 Ok ni koro aseyudo gino, kata ni oseketa abedo ng’at makare chuth, to anyagora matek+ mondo ane ka an bende anyalo yudo gino momiyo Kristo Yesu ne oyiera.+ 13 Owetena, pod ok akwanra awuon ni aseyudo gino; to an gadier kuom wach achielni: Ni wiya wil gi gik man chien+ kendo alawo gik man nyime,+ 14 anyagora matek ka achomo michno+ man malo ma Nyasaye oseluongowae+ kokalo kuom Kristo Yesu. 15 Kuom mano, wan jo mosetegno e yie,+ wabeduru gi paro kaka mano; to ka un gi paro mopogore e yo moro amora, Nyasaye biro elonu wach paro monyis malono. 16 To kata bed mana ni wasetimo dongruok e okang’ marom nade, wadhiuru nyime wuotho kaka dwarore e yo achielno.
17 Owetena, beduru e winjruok achiel ka uluwo timna,+ kendo nonuru ngima jogo ma wuotho e yo ma luwore gi ranyisi ma ne waketonu. 18 Nikech nitie ji mathoth—chon ne ajahulo nyingegi nyading’eny, to sani ahulogi mana ka aywak—ma wuotho kaka jowasik yadh-sand* mar Kristo. 19 Gikogi en kethruok, kendo nyasachgi en igi, duong’ margi en mana wich-kuot, kendo giketo pachgi kuom gik manie piny.+ 20 To wan thurwa+ en polo,+ kendo warito ahinya ng’at ma nyalo warowa moa kuno, ma en Ruoth Yesu Kristo,+ 21 ma biro tiyo gi tekone maduong’ e loko ringrewa ma nyap mondo obed ma chal gi del ma en-go ma nigi duong’,+ kendo mondo oket gik moko duto obed e bwo lochne.+