Mokwongo ne Jo-Korintho

4 Onego okwanwa kaka jotich Kristo kendo kaka jorit mag weche maler moum mag Nyasaye.+ 2 Kuom wachni, gima idwaro kuom jorit en ni mondo oyudgi ka gin jo migeno. 3 Koro ka un e ma udwaro yala, kata ka idwaro yala e od bura mar dhano, mano ok en gima lichna. Kuom adier, kata an awuon ok ayalra kenda. 4 Nimar ok ane ketho moro amora ma asetimo. To mano ok keta ng’at makare; Jehova* e ma nona.+ 5 Kuom mano, kik ung’ad bura+ e wi gimoro amora ka ndalo moket pok ochopo, nyaka chop Ruoth obi. Obiro elo weche mopondo mag mudho kod paro manie chuny, eka ng’ato ka ng’ato noyud pak moa kuom Nyasaye.+

6 Koro owetena, asetiyo gi nyinga kod nying Apolo+ mondo alernugo wechegi eka uyud ber, mondo kokalo kuomwa ung’e chik ma wacho niya: “Kik ukadh weche mosendik,” mondo kik usungru+ ka ukawo ni ng’at moro ber moloyo machielo. 7 Nimar en ng’a ma miyo ibedo mopogore gi ng’at machielo? Adier, en ang’o ma in-go ma ne ok omiyi?+ Koro ka kuom adier ne omiyi, ang’o momiyo ipakori ka gima ne ok omiyigo?

8 Be dibed ni useyudo duto mudwaro? Dibed ni usemewo? Dibed ni usechako locho kaka ruodhi+ ka waonge, koso? Daberna moloyo ka dikoro usechako locho kaka ruodhi mondo wan bende waloch kodu kaka ruodhi.+ 9 Nikech aneno ni Nyasaye oseketowa wan joote kaka jo mineno mogik e kar tuke kendo moseng’adnegi buch tho,+ nimar wasebedo kaka jo ming’iyo e paw tuke e wang’ piny,+ gi malaike, kod dhano. 10 Wan wafuwo+ nikech Kristo, un to uriek kuom Kristo; wan wanyap, un to un roteke; un imiyou duong’, wan to ochawa. 11 Nyaka chop sani, kech kayowa,+ riyo loyowa,+ waonge lewni moromo, igoyowa,+ waonge kar dak 12 kendo watiyo matek gi lwetewa wawegi.+ Sa ma ji yanyowa, waguedhogi;+ sa ma isandowa, wanano;+ 13 sa ma ji ketho nyingwa, wadwoko gi muolo;+ nyaka chop sani wan yugi mag piny, gik miwito oko.

14 Andikonu wechegi, ok ni mondo akuod wiu, to mondo amiugo puonj kaka nyithinda ma ahero. 15 Nikech kata ka da ubed gi ji 10,000 ma ritou kuom Kristo, kuom adier, uonge gi wuone mang’eny; nimar kuom Kristo Yesu, asebedo wuonu kokalo kuom wach maber.+ 16 Omiyo, asayou ni uluw timna.+ 17 Mano e momiyo aoro Timotheo iru, nikech en nyathina ma ahero kendo ma ageno e tij Ruoth. Obiro paronu yorena motudore gi tij Kristo Yesu,+ mana kaka apuonjo kamoro amora e kanyakla duto.

18 Nitie jomoko ma ng’awore gi sunga mana ka gima ok anabi iru. 19 To ka en dwach Jehova,* anabi iru machiegni kendo abiro ng’eyo, ok weche ma jo ma sungorego wacho, to ka be gin gi teko mar Nyasaye. 20 Nikech Pinyruodh Nyasaye ok en mana wach miwacho awacha, to en kuom teko mar Nyasaye. 21 Ere ma udwaro? Ni abi iru gi luth,+ koso gi hera kod chuny mamuol?