Ne Jo-Galatia
1 An Paulo, an jaote ma ok ji e ma oketo kata ng’at moro amora, to Yesu Kristo+ kod Nyasaye Wuoro,+ ma ne ochiere oa kuom jo motho e ma oketo. 2 An kaachiel gi owete duto man koda, wandikonu un kanyakla mag Galatia:
3 Ng’wono mogundho kod kuwe moa kuom Nyasaye Wuonwa kod Ruoth Yesu Kristo mondo obed kodu. 4 Ne ochiwore owuon nikech richowa+ mondo oreswa kuom piny* marachni,+ kaluwore gi dwaro mar Nyasachwa kendo Wuonwa,+ 5 mad obed gi duong’ nyaka chieng’. Amin.
6 Awuoro ahinya kaka ulokoru piyo piyo kuweyo Jal ma noluongou gi ng’wono mogundho mar Kristo, kendo koro uluwo wach maber mopogore.+ 7 Ok ni nitie wach maber machielo; to en mana ni nitie jomoko ma kelonu chandruok+ kendo gidwaro gwenyo wach maber e wi Kristo. 8 Okuong’ ng’ato ang’ata ma landonu wach maber mopogore gi ma ne walandonu, bed ni en wan kata malaika moro moa e polo. 9 Mana kaka wasewacho motelo, anwoyo kendo ni, Okuong’ ng’ato ang’ata ma landonu wach maber mopogore gi ma nurwako.
10 Kuom adier, be dibed ni koro atemo lombo wang’ ji koso Nyasaye? Koso dibed ni atemo moro dhano? Dabed ni amoro dhano, ok dine abedo misumba Kristo. 11 Nimar owetena, daher ni ung’e ni wach maber ma nalandonu ok en mar dhano;+ 12 kendo ne ok ayude kuom dhano. Bende, ne ok opuonjago, to ne ayude kokalo kuom fweny ma Yesu Kristo ne omiya.
13 En adier, ni ne uwinjo kaka timbena ne chalo chon ka ne an e din mar Jo-Yahudi,+ ni nasiko ka asando kanyakla mar Nyasaye gi mirima mager ahinya mondo atieke;+ 14 kendo ne atimo dongruok ahinya e din mar Jo-Yahudi moloyo thoth mbesena e ogandawa, nimar ne an gi kinda maduong’ ahinya e luwo tim kwerewa.+ 15 To ka Nyasaye, ma nopoga gi i minwa, kendo ma noluonga kokalo kuom ng’wonone mogundho,+ noneno ni ber 16 mondo oel Wuode kokalo kuoma, mondo aland ne ogendni mamoko wach maber e wi Wuode,+ ne ok akwayo dhano moro amora gikanyono mondo ong’adna rieko; 17 bende, ne ok aidho malo Jerusalem ir jo ma ne okwongona bedo joote, to ne adhi nyaka Arabia, eka bang’e naduogo Damaski.+
18 Higni adek bang’e, ne aidho Jerusalem+ mondo alim Kefa,*+ kendo ne adak kode kuom ndalo 15. 19 To ne ok aneno moro amora kuom joote mamokogo, mak mana Jakobo+ owadgi Ruoth. 20 Koro e wi weche ma andikonugi, awachonu adier e nyim Nyasaye ni ok ariambi.
21 Bang’ mano, ne adhi nyaka e gwenge mag Siria gi mag Kilikia.+ 22 To kanyakla mag gwenge mag Judea ma ne ni e winjruok achiel gi Kristo, ne pok onenaga wang’ gi wang’. 23 Ne gijowinjo mana niya: “Ng’at ma yande ne sandowa+ koro sani lando wach maber e wi yie ma yande ne otemo ketho.”+ 24 Omiyo, ne gichako miyo Nyasaye duong’ nikech an.