Samuel Mokwongo

14 Chieng’ moro, Jonathan+ wuod Saulo ne owacho ne jatije ma ting’one gige lweny niya: “Bi wadhi lokacha kar jorit mag Jo-Filistia.” Kata kamano, ne ok onyiso wuon-gi wachno. 2 Saulo ne ogo kambi gi jolweny madirom 600+ oko mar Gibea+ e bwo yadh komamanga man Migron. 3 (Ahija wuod Ahitub e ma ne rwako efod.+ Ahitub+ ne en owadgi Ikabod,+ ma wuod Finehas,+ ma wuod Eli,+ ma ne en jadolo mar Jehova e piny Shilo.+) Jolweny ne ok ong’eyo ni Jonathan nowuok. 4 Ka ma Jonathan ne temo kaloe mondo ochop kar jorit mag Jo-Filistia ne nitie lwendni* ariyo madongo koni gi koni. Lwanda achiel ne iluongo ni Bozez to machielo ne iluongo ni Sene. 5 Lwanda ma nyandwat ne chalo siro kendo ne omanyore gi Mikmash, to ma milambo ne omanyore gi Geba.+

6 Omiyo, Jonathan ne owacho ne jatije ma ting’one gige lweny niya: “Bi wang’ad wadhi kar jorit mag jo ma ok oter nyangugi.+ Di po ka Jehova okedonwa, nimar onge gima nyalo tamo Jehova. Onyalo resowa, bed ni wang’eny kata watin.”+ 7 Ka ne jatijeno owinjo kamano, ne odwoke niya: “Tima atima gima idwaro. Abiro luwi kamoro amora midhiye.” 8 Jonathan ne owacho kama: “Wabiro ng’ado mondo wadhi ir joritgo kendo wabiro chung’ e lela mondo ginewa. 9 Ka ginyisowa ni, ‘Chung’uru ka ma untie nyaka wachop iru.’ Wabiro chung’ ka ma wantieno kendo ok wabi dhi irgi. 10 To ka giwachonwa ni, ‘Bi uked kodwa.’ Mano nobednwa ranyisi+ kendo wabiro dhi kedo kodgi nikech Jehova biro ketogi e lwetwa.”

11 Bang’ mano ne gidhi ma gichung’ e lela mondo jorit mag Jo-Filistia onegi. Jo-Filistia ne owacho niya: “Neuru! Jo-Hibrania wuok e buche ka ma gisebedo ka gipondoe.”+ 12 Joritgo nonyiso Jonathan gi jating’ne gige lweny kama: “Temieuru biro irwa ka, to ubiro neno gima wabiro timonu!”+ Kanyo gi kanyo, Jonathan ne onyiso jatijeno ni: “Luwa, nimar Jehova biro ketogi e lwet Jo-Israel.”+ 13 Jonathan ne oidho lwanda ka olak gi lwete to jatije ne luwo bang’e. Ne onego Jo-Filistia to jo ma ne oweyo ka pok otho, jatijeno ne tieko. 14 E monj mokwongono, Jonathan gi jating’ne gige lweny ne onego chiegni ji 20. Ne ginegogi ka ma lachne dirom nus puodho ma dhok nyalo puro e odiechieng’ achiel.

15 Luoro maduong’ ne olandore kuom jolweny ma ne nie kambi kod ma ne ni kar jorit. Jomonj+ bende ne obwok ahinya. Piny ne ochako yiengni kendo luoro mowuok kuom Nyasaye ne odonjo e chuny ji. 16 Jorit mag Saulo ma ne ni Gibea+ mar Jo-Benjamin ne oneno tungni ma ne nie kambino kendo ne gineno ka ji ringo kendo kere koni gi koni.+

17 Saulo ne onyiso jolweny ma ne ni kode kama: “Kwanuru ji mondo ung’e ni ng’ano ma onge kodwa kae.” Ka ne gikwano ji, ne giyudo ni Jonathan gi jating’ne gige lweny onge. 18 Saulo ne onyiso Ahija+ niya: “Kel Sandug Singruok mar Nyasaye kae!” (Nimar Jo-Israel ne nigi Sandug Singruok mar Nyasaye kindeno.*) 19 To ka ne Saulo dhi nyime wuoyo gi jadolo, tungni ma ne nie kambi mar Jo-Filistia ne medore ameda. Omiyo, Saulo ne owacho ne jadolo niya: “We aweya gima itimono.” 20 Saulo gi jolweny duto ne ochokore mi gidhi kedo gi Jo-Filistia. Ka ne gichopo, ne giyudo ka Jo-Filistia negore kendgi kendo ne nitie chochni maduong’. 21 Jo-Hibrania ma ne oyudo oriwore gi Jo-Filistia mi obiro goyo kambi kodgi kuno ne odok ir Saulo gi Jonathan. 22 Jo-Israel duto ma ne opondo+ e piny gode mag Efraim ne owinjo ni Jo-Filistia oringo mi gin bende ne giriwore gi jolweny mi gilawogi. 23 Omiyo, Jehova ne oreso Jo-Israel e odiechieng’no+ kendo ne gikedo nyaka Bethaven.+

24 Jo-Israel ne ool ahinya e odiechieng’no nikech Saulo ne otamo ji chiemo kowacho niya: “Okuong’ ng’ato ang’ata mochiemo ka pok ochopo odhiambo kendo ka pok achulo kuor ne wasika!” Omiyo, onge ng’ato ang’ata ma ne ochamo gimoro.+

25 Jolweny duto ne ochopo e bunge mi giyudo mor kich mang’eny piny. 26 Ka ne gidonjo e bungego ne gineno ka mor kich ton, to onge ng’at ma ne obilo mor kichno nikech ne giluoro kuong’ mar Saulo. 27 Kata kamano, Jonathan ne ok owinjo ka wuon-gi kwero ji ni kik gicham gimoro amora,+ omiyo ne orieyo ludhe mi olute e peth kich. To ka ne onang’o mor kichno, tekone ne oduogo.* 28 Bang’ neno mano, achiel kuom jolwenygo ne owachone niya: “Wuonu ne osiemo ji matek kowacho ni, ‘Okuong’ ng’ato ang’ata mochiemo kawuono!’+ Mano e momiyo ji ool kama.” 29 Jonathan ne owacho kama: “Wuonwa osekelo ne pinyni chandruok mang’eny.* Ne kaka tekona oseduogo bang’ bilo mana mor kich matin. 30 Donge dine wanego Jo-Filistia mang’eny moloyo ka dine oyiene ji chamo+ gik ma gisepeyo kuom wasigu!”

31  Chieng’no ne ginego Jo-Filistia chakre Mikmash nyaka Aijalon+ mi jolweny ne ool ahinya. 32 Omiyo, jolweny ne orikni chamo gik ma ne gipeyo. Ne gikawo rombe gi dhok gi nyiroye mi ginegogi kanyo gi kanyo, kendo ne gichamo ring’o ka pod otimo remo.+ 33 Omiyo, ne oter wach ne Saulo niya: “Jolweny timo richo ne Jehova kuom chamo ring’o ma pod otimo remo.”+ Ka ne Saulo owinjo kamano, ne owacho kama: “Utimo marach. Ng’ieluru kidi maduong’ ukelna kae.” 34 Kae to Saulo ne owacho niya: “Wuothuru e kind ji duto kuwachonegi ni, ‘Ng’ato ka ng’ato okel ruadhe kata rombone mondo oneg e wi kidini kendo ochame ka. Kik utim richo ne Jehova kuom chamo ring’o ma pod nigi remo.’”+ Omiyo, ng’ato ka ng’ato kuomgi ne okelo ruadhe monego kanyo. 35 Mi bang’e Saulo ne ogero ne Jehova kendo mar misango.+ Mano e kendo mokwongo mar misango ma ne Saulo ogero ne Jehova.

36 Bang’e Saulo ne owacho kama: “Wadhiuru wamonj Jo-Filistia gotieno kendo waked kodgi nyaka piny ru. Ok wabi weyo kata mana ng’ato achiel ka ngima.” Ne gidwoke niya: “Tim atima gima ineno ni ber.” Kata kamano, jadolo ne owachone kama: “We wapenj Nyasaye madier wachno kae.”+ 37 Saulo ne openjo Nyasaye niya: “Adhi aked gi Jo-Filistia, koso?+ Be ibiro ketogi e lwet Jo-Israel?” Kata kamano, chieng’no Nyasaye ne ok odwoke. 38 Omiyo, Saulo ne owacho niya: “Biuru kae un jotelo duto mag oganda mondo umany kendo uyud richo mosetim kawuono. 39 Akuong’ora gi nying Jehova Nyasaye ma ne oreso Jo-Israel ni, kata ka Jonathan wuoda e ma otimo richono, obiro tho.” Kata kamano, onge ng’at ma ne odwoke. 40 Kae to ne owacho ne Jo-Israel duto kama: “Ubiro chung’ konchiel, to an gi Jonathan wuoda wabiro chung’ komachielo.” Ne gidwoke ni, “Tim atima gima ineno ni ber.”

41 Saulo ne okwayo Jehova niya: “A Nyasach Israel, miwa dwoko kitiyo gi Thumim!”+ Ne oyier Jonathan gi Saulo, Jo-Israel to ne owe. 42 Kae to Saulo ne owacho niya: “Gouru ombulu+ mondo ufweny ka en an kata ka en Jonathan wuoda.” Mi ombulu ne olwar ne Jonathan. 43 Eka Saulo nowacho ne Jonathan kama: “Nyisa ane, ang’o mitimo?” Jonathan ne odwoke niya: “Ne abilo mor kich matin gi luth ma ne nie lweta.+ Eri an ka! Ayie tho!”

44 Saulo ne odwoke kama: “Mad Nyasaye okuma mager Jonathan, ka ok itho.”+ 45 Kata kamano, oganda ne owacho ne Saulo niya: “Be kuom adier, owinjore Jonathan otho, to en e ma omiyo Jo-Israel olocho* kama?+ Mano gima ok nyalre! Wakuong’ore gi nying Jehova, ni onge kata yie wiye achiel ma biro lwar e lowo, nikech Nyasaye e ma otiyo kode kawuono.”+ Omiyo, oganda ne oreso Jonathan mi ne ok otho.

46 Omiyo, Saulo ne oweyo lawo Jo-Filistia mi Jo-Filistia ne odok e pinygi.

47 Saulo ne omedo guro lochne e wi Jo-Israel kendo ne okedo gi wasigu duto ma ne olwore. Ne okedo gi Jo-Moab,+ Jo-Amon,+ Jo-Edom,+ gi ruodhi mag Zoba,+ kod Jo-Filistia,+ kendo ne oloyo lwenjego duto. 48 Ne okedo gi chir mi oloyo Jo-Amalek+ kendo ne oreso Jo-Israel e lwet jo ma ne monjogi.

49 Yawuot Saulo ne gin, Jonathan, Ishvi, kod Malki-shua.+ Bende, ne en gi nyiri ariyo; nyako maduong’ ne iluongo ni Merab+ to nyako matin ne iluongo ni Mikal.+ 50 Chi Saulo ne en Ahinoam ma nyar Ahimaaz. To jatend jolweny mage ne en Abner+ wuod Ner, ma owadgi wuon Saulo. 51 Kish+ ne en wuon Saulo, to Ner,+ wuon Abner ne en wuod Abiel.

52 Lweny ne ger e kind Jo-Filistia gi Jo-Israel e ndalo duto mag Saulo.+ Omiyo, ka ne Saulo oneno ng’ato ang’ata ma ratego kendo ma jachir, ne orwake e lweny.+