Samuel Mokwongo
20 Eka Daudi ne oringo mowuok Nayoth man Rama. Ne obiro ir Jonathan mopenje niya: “Ang’o ma asetimo?+ En ketho mane moyud kuoma? Koso en ang’o marach ma asetimo ne wuonu momiyo odwaro nega?” 2 Jonathan ne odwoke kama: “Ok ibi tho. Mano ok nyalre ngang’!+ Onge gima wuora nyalo timo ma ok onyisa, bed ni en gima tin kata gima duong’. Be wuonwa diwe ma ok onyisa gima chalo kama? Mano ok nyal timore.” 3 Daudi ne odwoke niya: “Adier, wuonu oseng’eyo ni wan osiepe.+ Omiyo, obiro pandi gima ochano timo mondo kik iwinj marach. Akuong’ora gi nying Jehova ni odong’ mana matin to inega.”+
4 Eka Jonathan ne onyiso Daudi niya: “Abiro timoni gimora amora miwacho.” 5 Daudi ne owacho ne Jonathan kama: “Kiny en sawo mar dwe manyien+ kendo ibiro dwar ni achiem gi ruoth. Yiena adhi apond e thim nyaka chieng’ mar adek godhiambo. 6 Ka wuonu openjo kama adhiye, to nyise ni ne akwayi rusa mondo adhi dalawa Bethlehem,+ nimar nitie misango ma joodwa chiwoga kuno higa ka higa.+ 7 Ka odwoki ni, ‘onge wach,’ to kare onge gima onego aluor. To ka iye owang’ gi wachno, to ng’e ni kare pod odwaro timona gima rach. 8 Omiyo, nyisa ng’wono+ nikech isetimo koda singruok e nyim Jehova.+ To ka ineno ni aseketho,+ to nega in iwuon. Ang’o ma dimi itera ir wuonu?”
9 Eka Jonathan ne owachone kama: “Mano ok nyal timoreni ngang’! Ka afwenyo ni wuonwa dwaro timoni marach adier, abiro nyisi.”+ 10 Mi Daudi nopenjo Jonathan niya: “Ng’ano ma biro nyisa ka wuoru odwoki gi gero?” 11 Jonathan ne owacho ne Daudi kama: “Bi wadhi e pap.” Mi ne gidhi. 12 Kae to Jonathan ne onyiso Daudi niya: “Akuong’ora e nyim Jehova Nyasach Israel ni kiny kata orucha, sa ma kama, nang’e gima wuora paro. Ka ayudo ni oonge wach kodi to abiro nyisi. 13 To ka po ni wuora dwaro timoni gima rach, to aling’ aling’a mi ok anyisi mondo itony, we Jehova okuma marach moloyo. Mad Jehova obed kodi+ mana kaka ne en gi wuora chon.+ 14 Kendo inyisa ng’wono mar Jehova ka pod angima kata ka asetho.+ 15 Kik iwe nyiso jooda+ ng’wono kata mana e kinde ma Jehova osetieko wasiki duto e piny ngima.” 16 Omiyo, Jonathan notimo singruok gi od Daudi kowacho ni, “Jehova biro neno ni ochul kuor ne wasiki.” 17 Eka Jonathan ne onyiso Daudi mondo ochak okuong’rene ni ohere, nimar Jonathan ne ohero Daudi mana kaka ne oherore owuon.+
18 Jonathan nowachone kama: “Kiny en sawo mar dwe manyien+ kendo ji biro penji nikech ka ma ibetiega biro dong’ nono. 19 Kochopo chieng’ mar adek, gibiro manyi ahinya. Omiyo, onego ibi ka ma nyocha ipondoeni mondo irita but kidini. 20 Abiro bayo asere adek e bath kidi konchiel ka gima achielo gimoro kanyo. 21 Kae to abiro oro jatija mondo odhi okelgi. To ka iwinjo ka anyise ni, ‘Ne! Aserego nie bathi koni, kelgi,’ to inyalo duogo, nikech akuong’ora gi nying Jehova ni mano biro nyiso ni weche beyo kendo onge gima rach ma biro timoreni. 22 To ka iwinjo ka anyiso jatijano ni, ‘Ne! Asernigo ni nyime,’ to kare ng’e ni Jehova dwaro ni idhi. 23 To kuom wach singruok ma wasetimo kodi,+ Jehova e ma mondo obed janeno e kindwa nyaka chieng’.”+
24 Omiyo, Daudi ne opondo e pap. Ka sawo mar dwe manyien nochopo, ruoth Saulo ne obet e kome mondo gichiem.+ 25 Nobet e kome mapile ma nitie but kor ot, Jonathan ne obet ka ochomore kode tir, kendo Abner+ ne obet e bath Saulo konchiel, to kom Daudi ne ni nono. 26 Chieng’no, Saulo ne ok openjo wach Daudi nimar nowacho e chunye niya: ‘Nyalo bedo ni gimoro otimorene mi koro ok oler.+ Ee, nyaka bed ni ok oler.’ 27 Kinyne bang’ sawo mar dwe manyien kom Daudi ne pod odong’ nono. Omiyo, Saulo ne openjo Jonathan wuode niya: “Ang’o momiyo wuod Jesse+ ne ok obiro chiemo kodwa nyoro kod kawuono?” 28 Jonathan nodwoke niya: “Daudi nyocha okwaya rusa mondo odhi Bethlehem,+ 29 kowacho ni, ‘Asayi, yiena adhi thurwa nikech nitie misango ma joodwa chiwo kuno kendo owadwa e ma ne oluonga. Asayi, yiena aring’ adhi ane owetena.’ Mano e momiyo ok osebedo kobiro e mesa kae.” 30 Gikanyono, Saulo iye nowang’ mi oyanyo Jonathan kama: “In wuod dhako ma wiye tek, iparo ni ok ang’eyo ni idokne wuod Jesse? Ikelo wich-kuot kuomi kendo ne meru.* 31 Ng’e ni pinyruodhi ok nogurre motegno+ ka wuod Jesse pod ngima. Omiyo, or ng’ato mondo okele kae, nimar nyaka nege.”+
32 Kata kamano, Jonathan ne odwoko wuon-gi niya: “Idwaro ni onege nikech ang’o?+ Otimo ang’o?” 33 Gikanyono, Saulo ne obaye gi tong’+ mi Jonathan nofwenyo ni kare wuon-gi ne dwaro nego Daudi adier.+ 34 Mirima nomako Jonathan mi owuok e mesa kanyo gi kanyo kendo chieng’no ne ok ochiemo nikech wach Daudi ne litne+ kendo nikech wuon-gi ne okuodo wiye.
35 Kinyne gokinyi, Jonathan ne owuok gi jatije ma pod rawera+ mi odhi ir Daudi kaka ne gisewinjore. 36 Kendo nowacho ne jatije niya: “Ero, dhi ikelna asere ma adwaro bayogi.” Jatijeno ne oringo ka dhi kendo Jonathan ne obayo asere mokale. 37 Ka ne jatijno ochopo ka ma Jonathan ne osebaye asere, Jonathan ne okok gi dwol niya: “Donge asere pod ni nyimi kono? 38 Tim piyo! Ring matek ikelgi.” Mi jatij Jonathan ne okelogi ire. 39 Jatijno ne ok ong’eyo gima ne dhi nyime, Jonathan gi Daudi kende e ma ne ong’eyo. 40 Eka Jonathan ne omiyo jatijeno gige mag lweny mi onyise niya: “Ternagi dala.”
41 Ka ne jatijno osedhi, Daudi ne owuok gi yo milambo ka machiegni gi kanyo. Ne ogoyo chonge piny mokulore nyadidek kendo ne gikwakore* ka giywak, to Daudi e ma ne oywakie moloyo. 42 Jonathan nonyiso Daudi niya: “Dhi gi kuwe nimar wasekuong’ore+ e nying Jehova ni, ‘Jehova e janeno e kinda kodi kendo e kind nyithindi* gi nyithinda* nyaka chieng’.’”+
Kamano Daudi nowuok modhi, to Jonathan ne odok dala.