Samuel Mokwongo
26 Bang’ kinde, Jo-Zif+ nodhi Gibea+ ir Saulo ma ginyise niya: “Daudi opondo e got Hakila momanyore gi Jeshimon.”*+ 2 Omiyo, Saulo noyiero jolweny 3,000 molony e Israel mi gidhi e thim mar Zif+ mondo gimany Daudi kuno. 3 Daudi ne odak e thim kendo ne owinjo ni Saulo obiro manye kuno. Saulo ne ogoyo kambi e bath ndara manie got Hakila momanyore gi Jeshimon. 4 Omiyo, Daudi nooro ji mondo odhi onon ka be Saulo obiro adier. 5 Bang’e, Daudi ne odhi ka ma Saulo ne ogoyoe kambi moneno ka ma Saulo gi Abner+ wuod Ner nonindoe. Abner ne en jatend jolweny. Saulo ne onindo e kambi ka jolweny duto olwore. 6 Kae to Daudi nopenjo Ahimelek Ja-Hiti+ kod Abishai+ wuod Zeruya+ ma owadgi Joab niya: “Ng’ano ma biro dhi koda e kambi mar Saulo?” Abishai nodwoke ni, “Abiro dhi kodi.” 7 Daudi gi Abishai nodhi e kambi mar Saulo gotienono. Ne giyudo ka Saulo nindo koguro tong’ e lowo gi ka wiye. Abner gi jolweny mamoko duto ne onindo kolwore.
8 Abishai nowacho ne Daudi niya: “Kawuono Nyasaye oseketo jasiki e lweti.+ Omiyo, yiena achwoye gi tong’ dichiel agurego e lowo. Abiro chwoye mana dichiel ma ok anwoyo kendo.” 9 Kata kamano, Daudi nowacho ne Abishai kama: “Kik ihinye. Nimar en ng’a ma nyalo tero lwete mondo otim marach ne ng’at ma Jehova owalo+ mi odong’ ma onge bura?”+ 10 Daudi nomedo wacho ni, “Akuong’ora gi nying Jehova ni Jehova owuon biro nege,+ kata odiechienge+ biro chopo mi otho athoya kaka jomamoko, kata obiro dhi e lweny ma otho kuno.+ 11 An to nikech aluoro Jehova, ok anyal tero lweta ngang’ mondo atim marach ne ng’at ma Jehova owalo.+ Omiyo, kaw tong’ man ka wiyeno gi njagi mar pi mondo wawuog kae.” 12 Daudi nokawo tong’ gi njagi mar pi ma ne ni but wi Saulo ma gidhigo. Onge ng’at ma ne onenogi+ kata winjogi, kendo onge ng’at ma ne ochiewo nimar Jehova nokelonegi nindo matut. 13 Daudi ne ong’ado modhi loka machielo mi ochung’ e wi got ka mabor gi ka ma Saulo ne nitie.
14 Daudi nokok ne jolweny kod Abner+ wuod Ner kowacho niya: “Abner, be iwinja?” Abner nodwoke niya: “Mano ng’a ma goyo ne ruoth kokono?” 15 Nowacho ne Abner niya: “Donge in thuon? Be nitie ng’at ma dipim kodi e Israel? To koro, ang’o momiyo ne ok irito ruodhi kendo iweyo jalweny moro odonjo e kambiu mondo oneg ruoth?+ 16 Gima itimono ok ber. Akuong’ora gi nying Jehova ni owinjore itho nikech ne ok irito ruodhi ma en ng’at ma Jehova owalo.+ Koro ng’i ane ka ma intiereno maber. Tong ruoth kod njagi+ ma ne ni but wiye ni kanye?”
17 Saulo nowinjo dwond Daudi mi owacho niya: “Dibed ni mano dwondi, Daudi wuoda?”+ Daudi ne odwoke kama: “Ee ruodha, mano dwonda.” 18 Daudi nomedo wachone niya: “Ang’o momiyo ruodha lawa kama?+ Ang’o ma asetimo? Koso en ketho mane moseyud kuoma?+ 19 Akwayi ruodha ni iwinj wechenagi: Ka Jehova e ma othuwi koda to we mondo oyie gi misango mar cham ma abiro chiwone. To ka dhano e ma othuwi koda,+ we gibed jo ma okuong’ e nyim Jehova nikech kawuononi giseriemba mondo kik abed gi oganda Jehova+ ka giwachona ni, ‘Dhi itine nyiseche manono!’ 20 Omiyo, kik iwe remba ochuer nono mabor gi Jehova, nimar ruodh Israel lawore gi omboto achiel,*+ mana ka gima olawo aluru manie wi gode.”
21 Saulo nodwoke niya: “Asetimo richo.+ Yaye, Daudi wuoda duogi. Ok nachak atimni marach kendo, nimar kawuono ikwano ngimana ka gima duong’ e wang’i.+ Adier asetimo tim fuwo kendo asetimo richo maduong’.” 22 Daudi nodwoke niya: “Eri tong ruoth. Or jalweny moro mondo obi okawe. 23 Jehova e ma biro chulo ng’ato ka ng’ato kaluwore gi timne makare+ kod adierane, nimar kawuono Jehova ne oketi e lweta to ne ok atimoni marach nikech in ng’at ma Jehova owalo.+ 24 Mana kaka kawuono ne akwano ngimani ka gima duong’, mad Jehova bende kwan ngimana kaka gima duong’ kendo oresa e masiche duto.”+ 25 Saulo nodwoko Daudi niya: “Oguedhi Daudi wuoda. Ibiro timo gik madongo kendo ibiro dhi maber e gik mitimo.”+ Eka Daudi nodhi yore to Saulo nodok dalane.+